1,2 Kenle ko bie eza menli dɔɔnwo bie yiale bieko la, bɛ aleɛ eza wiele. Gyisɛse vɛlɛle ye ɛdoavolɛma ne mɔ na ɔ nee bɛ dwenledwenlenle nwo.

Ɔzele bɛ kɛ, "Menli ɛhye mɔ anwo yɛ me anwunvɔne, ɔluakɛ bɛ nee yɛ ɛdɛnla ɛke too kenle nsa, mɔɔ aleɛ biala noko ɛnle ɛke ɛmmaa bɛ mɔɔ bɛdi a. 3 Saa megyakyi bɛ adenle memaa bɛkɔ sua nu wɔ melɛ mɔɔ bɛtɛdile debie la noko a, bɛ nye zo babulu bɛ wɔ adenle nu! Ɔluakɛ, bie mɔ vi adenle nzi moamoa kpalɛ a rale a."

4 Ɛdoavolɛma ne mɔ buale ye kɛ, "Na yɛmɛ ala a ɔwɔ kɛ yɛkpondɛ aleɛ wɔ ɛsɛlɛ resee ɛhye azo yɛmaa bɛ ɔ?"

5 Ɔbizale bɛ kɛ, "Kpanwo dolɔfo nyɛ a bɛlɛ ye wɔ ɛke a?" Bɛbuale ye kɛ, "Nsuu." 6 Akee ɔmaanle menli ne mɔ dɛnlanle aze. Na akee ɔmaanle kpanwo dolɔfo nsuu ne zo, na ɔyɛle Nyamenle mo, ɔbubule nu ngyikyi ngyikyi na ɔvale ɔmaanle ye ɛdoavolɛma ne mɔ kɛ bɛva bɛmaa menli dɔɔnwo ne. 7 Eza bɛnyianle fɛlɛ ekyii noko, ɔti Gyisɛse yilale ɔdaye noko azo, na ɔvale ɔmaanle ye ɛdoavolɛma ne mɔ kɛ bɛhyɛ bɛmaa menli ɛwolaa ne.

8,9 Na bɛ muala bɛlile dedee bɛ ko yile tetɛkɛɛ, na akee nzinlii, ɔmaanle bɛ adenle ɔmaanle bɛhɔle bɛ azua nu. Bɛlua kɛyɛ apenle nna a bɛlile aleɛ ne kenle ko zɔhane a, na mɔɔ bɛsesale ɔ bo zo mgbokpoleka ne la, eza bɛnyianle ahɛndɛne mgbole tetɛkɛɛ nsuu!

10 Ɛhye pɛle nu ala la, ɔ nee ye ɛdoavolɛma ne mɔ vole ɛlɛne nu na bɛrale Dalemanuta maanzinli nu. 11 Na mɔɔ Dwuuma mgbanyima ne mɔ dele ye nganeɛ la bɛrale kɛ bɛba bɛarabizebiza ye edwɛkɛ. Bɛzele ye kɛ, "Yɛ nwanwane debie maa yɛnlea. Maa debie ɛzi wɔ anwomanyunlu na akee yɛbalie wɔ yɛali."

12 Ɛhye zinle ɔ nwo totohyia, na ɔzele bɛ kɛ, "Ɛhye yemɔ, Kyɛkyɛ. Duzu nwanwanendeɛ bieko a bɛkponde a?"

13 Ɔti ɔziale ɔ nzi ɔvole ɛlɛne ne anu bieko na ɔgyakyile bɛ ɛkɛ ɔpɛle azule tandane ne ɔhɔle ɔ nzi nehane. 14 Ɛnee ɛdoavolɛma ne mɔ arɛle ɛvi kɛ bɛkɛva aleɛ, ɔti kpanwo dolɔfo ko pɛ ala a ɛnee ɛha a.

15 Na mɔɔ bɛpɛ azule tandane ne la, Gyisɛse zele bɛ ahunlunyele nu ala kɛ, "Bɛnlea bɛ nwo boɛ wɔ Hɛlɔdo nee Falasiima ne mɔ mgbɔvonle ne anwo."

16 Na ɛdoavolɛma ne mɔ ande ɔ bo, na bɛzele bɛ nwo ngoko ngoko kɛ, "Duzu a ɔkpondɛ yeahile a?" Amozi ye, akee bɛdwenlenle kɛ aleɛ mɔɔ bɛanva la ati a ɛmaa ɔlɛka ɛhye a.

17 Na Gyisɛse nwunle mɔɔ bɛlɛsuzu nwo a, na ɔzele bɛ kɛ, "Kyɛkyɛ, tɛ ye zɔhane hweledede ɔ! Bɛnde ɛhye abo ɔ? Bɛ ahonle ne mɔ ɛyɛ ɛsesebɛ mɔɔ ɔti bɛnde ɛhwee abo anzɛɛ? 18 Ɔti a Ayezaya hanle la kɛ: ‘Bɛlɛ ɛnyelɛ, noko bɛnnwu debie. Duzu ati a bɛnyɛ bɛ nzo gyɛlɛɛnye na bɛndie a?’ Bɛngakye ɛhwee ɔ?

19 "Bɛngakye menli apenle nnu ne mɔɔ memaanle bɛ kpanwo dolɔfo nnu ala bɛlile mɔɔ bɛ ko yiyile la ɔ? Ɔ bo zo mgbokpoleka ahɛndɛne nyɛ a bɛsesale ye amozi ye a?" Bɛzele ye kɛ, "Bulu nee nwiɔ!"

20 "Na mɔɔ menvale kpanwo dolɔfo nsuu ne noko memaanle menli apenle nna ne noko lile la, ahɛndɛne nyɛ a hale ɔ bo a?" Bɛbuale ye kɛ, "Ahɛndɛne nsuu."

21 "Duzu ati a akee noko bɛtɛdwenle kɛ aleɛ mɔɔ yɛnle ye la ɛhyia me a?"

22 Mɔɔ bɛdwule Bɛteseeyeda la, bɛvale nrenyia anyezinliravolɛ bie bɛrɛlɛle ye, na bɛbodole ye kɛ ɔva ɔ sa ɔha ye ɔmaa ɔde kpɔkɛ. 23 Gyisɛse zɔle nrenyia anyezinliravolɛ ne asa, na ɔ nee ye vile namule ne azo bɛhɔle, na ɔdole nyɛlɛ ɔguale ɔ nye ne mɔ azo, na akee ɔvale ɔ sa ɔbutule ɔ nye ne mɔ azo. Gyisɛse bizale ye kɛ, "Akee ɛkola ɛnwu debie ɔ?"

24 Nrenyia ne dole ɔ nye nleanle ahanle ahanle na ɔzele ye kɛ, "Ɛhɛe! Menwu menli! Na emomu mennwu bɛ kpalɛ; bɛzɔho mbaka azinli mɔɔ bɛlɛtia la!"

25 Akee Gyisɛse vale ɔ sa butule nrenyia ne anye ne mɔ azo bieko, na mɔɔ nrenyia ne nleanle ye kpoonwu la ɔ nye zo tetele ye wienyi, na akee ɔnwunle debie kpalɛ, na ɔlile fɛlɛko somaa ne ala.

26 Gyisɛse akee maanle ɔhɔle ye awovolɛma sua nu. Na ɔzele ye kɛ, "Mmaka kɛ ɛkɔ namule ne azo bɔbɔ."

27 Akee Gyisɛse nee ye ɛdoavolɛma ne mɔ vile Galeli na bɛhɔle Sizalia Felepe namunamu ne mɔ azo. Na mɔɔ bɛlua adenle nu bɛkɔ la ɔbizale bɛ kɛ, "Kɛ menli si dwenle me ɛ? Duzu a bɛka ye wɔ me nwo a?"

28 Ɛdoavolɛma ne mɔ buale ye kɛ, "Bie mɔ dwenle kɛ wɔmɔ a ɛle Dwɔn Sɔnevolɛ ne a, yɛɛ bie mɔ noko se ɛle Yilaegya anzɛɛ mɔmoane ngapezoma ne mɔ bie mɔɔ ɛzia ɛra ngoane nu bieko a."

29 Akee ɔbizale bɛ kɛ, "Na bɛdabɛ noko bɛdwenle kɛ nwane a le me?" Na Pita buale kɛ, "Wɔmɔ a ɛle Ngoanedievolɛ ne a." 30 Na Gyisɛse bɔle bɛ kɔkɔ kɛ bɛmmaka bɛkile awie biala.

31 Akee ɔbɔle ɔ bo ɔhanle anwubɛnyunlu mɔɔ ɔbayia la ɔhilele bɛ kɛ, Yemɔ ɔdaye Sonla Ra ne, Asɔne mgbanyima ne mɔ nee Azɛlɛvolɛ Mgbanyinli ne mɔ nee Dwuuma mgbanyima ne mɔ baye ye bɛamaana bɛahu ye, na ye kenle nsa ne azo ɔbadwazo bieko. 32 Ɔhanle ɛhye anwo bie ɔhilele bɛ anyelielɛ nu ala, ɔti Pita hwenle ye hɔle ahanle na ɔbɔle ɔ bo kɛ ɔtwi ɔ nyunlu. Ɔzele Gyisɛse kɛ, "Ɔnle kɛ ɛkɛha edwɛkɛ mɔɔ le kɛ ɛhye mɔ la."

33 Gyisɛse hakyile ɔ nye nleanle ye ɛdoavolɛma ne mɔ amuala na akee ɔzele Pita wɔ kɔkɔbɔlɛ nu ala kɛ, "Kɔ nehane, Abɔnsam! Wɔmɔ menli adwenle a ɛlɛfa wɔado ɛhye anwo a na tɛ Nyamenle adwenle ne ɔ."

34 Akee ɔvɛlɛle ye ɛdoavolɛma ne mɔ nee menli dɔɔnwo ne amuala kɛ bɛradie. Na ɔzele bɛ kɛ, "Saa bɛ nuhua bie kulo kɛ ɔyɛ me ɛdoavolɛ a, kyesɛ ɔkpo ɔ nwo ninyɛne nee ye anyelielɛ muala, na ɔsoa ye meanubaka ne, na ɔtoa me nanamogya nanamogya. 35 Saa wɔandie na ɛse kɛ ɛkpondɛ wɔ ngoane wɔalie ye a, ɛbaminli ye. Na mɔɔ kɛkpo ye ngoane wɔ Mame nee Edwɛkpa ne ati la yemɔ a banyia ngoane mɔɔ ɔnlɛ awieleɛ a.

36 "Na saa awie nyia ewiade amuala na ɔminli ye ɛkɛla a duzu nvasoɛ a ɔbanyia ye a? 37 Asoo debie bie wɔ ɛkɛ mɔɔ ɔhyia ɔtɛla ɔdaye sonla mumua ne ye ɛkɛla ɔ? 38 Na awie biala mɔɔ kɛze me nee me edwɛkpa ne anwo nyiane wɔ kpolerazulɛ nee ɛtaneyɛlɛ ewiade ɛhye anu la, Mame, Sonla Ra ne noko mebaze ɔ nwo nyiane wɔ mekɛ mɔɔ me nee anwumabɔvolɛma ne mɔ bara wɔ Egya ne anyunlunyia nu la."