Marcos 9

17 Nrenyia ko vi menli ne anu zele kɛ, "Kilehilevolɛ, menvale me ra ko membale kɛ bɛyɛ ye ayile, ɔngola tendɛ, ɔluakɛ bozonle ɛva ye. 18 Na mekɛ biala bozonle ne bawolo ye nu a ɔpɛ ye ɔto aze na akee ɔmaa ɔ nloa nyɛlɛ yɛ awubue fukaa, ɔtwi ɔ gye, na akee ɔsa kahelee zɛhae. Yemɔti mɔɔ me nee ye rale la membodole wɔ ɛdoavolɛma ne mɔ kɛ bɛdu bozonle ne bɛvi ye nu, noko akee bɛangola."

19 Na Gyisɛse zele ye ɛdoavolɛma ne mɔ kɛ, "O, duzu ati a bɛ diedi le ekyi zɛhae a; me nee bɛ ɛdɛnla ɛhɔdwu kenle nzu bieko kolaa na bɛalie bɛali? Menzi bɛ nwo abotane mengɔnkpula kenle nzu bieko? Bɛva kakula nrenyia ne bɛrɛlɛ me wɔ ɛke."

20 Ɔti bɛ nee kakula nrenyia ne rale, na mɔɔ ɔnwunle Gyisɛse ala la, bozonle ne pɛle ye dole ye aze ɛzulolɛ nu ala maanle ɔbedebedele na ɔ nloa anu kpule awubue fukaa zɛhae.

21 Gyisɛse bizale kakula ne ɔ ze kɛ, "Na zɛhae deɛ ye rale ɔ nwo la yeli kenle nyɛ?"

Kakula ne ɔ ze buale kɛ, "Sumunli ye ngakula nu a deɛ ne yɛle ye a, 22 na ɔtɔ kenle ne bie bɔbɔ a ɔmaa ɔtɔ senle nu, anzɛɛ nzule nu kɛ ɔku ye. Ɔti nwu ye anwunvɔne, na yɛ nwole bie maa yɛ, saa ɛkɛhola a."

23 Gyisɛse zele ye kɛ, "Saa Mame menwɔhola a! Saa ɛlɛ diedi ɛdeɛ a, yemɔ debie biala kola yɛ ɛkɛ."

24 Ndɛndɛ ne ala selɛ ne buale ye kɛ, "Melɛ diedi; O, boa me maa menyia ye molozo!"

25 Na mɔɔ Gyisɛse nwunle kɛ ɛlɔne ne anu ɛlɛpi la ɔdeanle bozonle ne nu kɛ,

"Wɔmɔ bozonle tibili, wɔ tumi nu, ɛvi kakula ne nu finde na mmawolo ye nu bieko!"

26 Akee bozonle ne kponlenle ɔ bo basaa bie, na ɔpɛle kakula nrenyia ne ɔdole ye aze na ɔvile ye nu ɔhɔle; na kakula nrenyia ne lale ɛkɛ ne koonwu, kɛ asɛɛ yewu la. Bɛlɛbɛlɛyivo bie vale ɛnriandinlɛ vile menli ne anu razele kɛ "Yewu." 27 Na Gyisɛse nzinlii zɔle ɔ sa maanle ye zo, na ɔboale ye ɔmaanle ɔgyinlanle, na ɔdwazole, na akee ɔdele kpɔkɛ bɔkɔɔ.