Mateus 9

Me azɛlɛ ye azo gyima

1 Ɔti Gyisɛse vole ɛlɛne nu na bɛpɛle tandane ne bɛhɔle Kapɛnayɛm, mɔɔ le ɔdaye ye sua zo la.

2 Na yeangyɛ biala yɛɛ mrenyia bie vale kakula nrenyia bie mɔɔ ɛbubu la ɛkpa zo la rɛlɛle ye a. Na mɔɔ Gyisɛse nwunle bɛ diedi ne la, ɔzele kakula nrenyia wuliravolɛ ne kɛ, "Bɔzɔ ɛ nwo, me ra nrenyia. Ɔluakɛ bɛva wɔ ɛtane bɛhyɛ wɔ!"

3 Na Asɔne mgbanyima ne bie mɔ deanle nu zele bɛ nwo kɛ, "Munzusɛm! Nrenyia ɛhye ɛleka kɛ ɔle Nyamenle!"

4 Gyisɛse ze deɛ mɔɔ ɛnee bɛlɛdwenle nwolɛ a, yemɔti ɔzele bɛ kɛ, "Duzu ati a bɛlɛdwenle adwenle ɛtane ɛhye ɛ? 5 Mame Ngoanedievolɛ ne, melɛ tumi wɔ azɛlɛ ye azo kɛ mefa ɛtane mekyɛ." Na mebiza bɛ kɛ: ɛtanefakyɛ ne ɛhanlɛ ye se tɛla ayileyɛle ɔ? 6 Amaa yeahile kɛ ɔlɛ tumi ɔfa ɛtane ɔkyɛ wɔ azɛlɛ ye azo la, ɔhakyile ɔ nye ɔnleanle kakula nrenyia ne mɔɔ ɛbubu la na ɔzele ye kɛ, "Dwazo foa, nyenya wɔ ɛkpa ne na kɔ, ɔluakɛ ɛ nwo ɛza!"

7 Na kakula nrenyia ne dwazole foa na ɔhɔle.

8 Mɔɔ menli dɔɔnwo ne nwunle ɛhye bɛ nye zo la ɛzulolɛ hanle bɛ na bɛyele Nana Nyamenle ayɛlɛ kpole kpalɛ kɛ yeva tumi zɛhae yemaa sonla dasanli a!

9 Na mɔɔ Gyisɛse dɔle adenle zo kɛ ɔkɔ ɔ nyunlu la, ɔnwunle Mateyu, adwuledievolɛ ne, kɛ ɔde adwulelielɛ kpɔda bo. Na Gyisɛse zele ye kɛ, "Bɛla na bayɛ me ɛdoavolɛ." Na amgba noko Mateyu dwazole ɔdoale ye, na ɔ nee ye bɛhɔle.

10 Nzinlii mɔɔ Gyisɛse nee ye ɛdoavolɛma ne mɔ bɛkpula bɛ sa wɔ Mateyu sua nu la, adwuledievolɛma nee ɛtanevolɛma dɔɔnwo ne ala noko rale ɛkɛ ne bie kɛ asɛɛ bɛle nyɛvolɛ la. 11 Na Falasiima ne mɔ nyianle ɛya na bɛbizale bɛ kɛ, "Duzu ati a bɛ kilehilevolɛ ne fa ɔ nwo bɔnlebɔnle menli mɔɔ le kɛ ɛhye mɔ la anwo a?"

12 Gyisɛse buale bɛ kɛ, "Bɛdabɛ mɔɔ bɛte kpɔkɛ la ɛngyia dɔketa nwo! Na emomu wuliravolɛma yɛɛ ahyia ɔ nwo a!" 13 Na ɔvale ɔzɔle zo kɛ, "Akee bɛhɔ na bɛhɔzukoa edwɛkɛ kpɔkɛ ɛhye mɔɔ vi Buluku Nwuanzanwuanza ne anu la. ‘Tɛ bɛ azubɔndeɛ ne mɔ nee bɛ ahyɛlɛndeɛ ne mɔ a mekpondɛ a, emomu anwunvɔne mɔɔ bɛse la ɔ.’ Ɔluakɛ mera kɛ meba mearavɛlɛ ɛtaneyɛvoma, tɛ tenlenema, meamaa bɛazia bɛ nzi bɛanwu Nana Nyamenle."

14 Kenle ko Dwɔn Sɔnevolɛ ne ɛdoavolɛma ne mɔ rale Gyisɛse anwo ɛkɛ na bɛbizale ye kɛ, "Duzu ati a wɔ ɛdoavolɛma ne mɔ ɛngye ɛhɔne kɛmɔ yɛ nee Falasiima ne mɔ yɛyɛ ye la ɛ?"

15 Na Gyisɛse bizale bɛ kɛ, "Ɔle kpalɛ kɛ atɔfolɛ nrenyia ne agɔnwo mɔ kɛli nyane na bɛkɛhye ɛhɔne wɔ melɛ mɔɔ ɔ nee bɛ de la ɔ? Na mese bɛ kɛ, mekɛ ne ɛlɛba mɔɔ medame mumua ne bɛbaye me bɛavi bɛ avinli a. Na mekɛ ɛhye anu a le melɛ mɔɔ akee bɛbakpo aleɛ a.

16 "Na nwane ala a bava fuazinli ada ɛdanlɛ fofolɛ nu a? Ɔluakɛ, ɛleka mɔɔ bɛda la bade ahɔ amaa tokule ne ayɛ haanwu kpole. 17 Na nwane a bava nwanye fofolɛ agua nwanye kodoku dɛba nu a? Kodoku dɛba ne bakpuke ɔlua nwanye ne anu ɛsesebɛ mɔɔ ɔyɛ la ati, na nwanye ne noko agua aze ayɛ mgbane. Nwanye kodoku fofolɛ ngome ala a bɛfa nwanye fofolɛ bɛgua nu a; amaa nwanye ne nee kodoku ne amu nwiɔ anzɛkye."

18 Na mɔɔ ɔ nloa wɔ zo mɔɔ ɔlɛka ɛhye la, maanzinli ne anu ayialeka kilehilevolɛ ne rale na ɔrahotole ɔ nyunlu ɔzele kɛ, "Me ra raalɛ ekyi ne ɛwu kɛkala, na saa ɛba ɛbafa ɛ sa ɛka ye mgbane bɔbɔ a ɔbazia yeara ngoane nu bieko."

19 Na mɔɔ Gyisɛse nee ye ɛdoavolɛma ne mɔ bɛkɔ kilehilevolɛ ne sua nu la, 20,21 raalɛ bie mɔɔ mogya ɛdu ye dedee ɛvolɛ bulu nee nwiɔ la bikyele ɔ nwo ɛkɛ ne na ɔzɔle ye tɛladeɛ ne anloa, ɔluakɛ ɔdwenlenle kɛ, "Saa me sa sɔ ye nu ala mgbane bɔbɔ a me nwo baza."

22 Gyisɛse hakyile ɔ nye nleanle ye na ɔzele ye kɛ, "Me ra raalɛ, ɔ muala le kpalɛ! Wɔ diedi ɛyɛ wɔ ayile." Na ɔvi zɔhane mekɛ ne anu raalɛ ne anwo zale bɔkɔɔ.

23 Mɔɔ Gyisɛse dwule kilehilevolɛ ne sua nu na ɔnwunle menli anwo alɛra ne, na eza ɔdele bɛ awolɛyelɛ nee bɛ agole edwɛne ne la, ɔzele kɛ, 24 "Bɛha bɛ bɛvinde, ɔluakɛ kakula raalɛ ne ɛtɛwule; na ɔlɛda ala!" Na bɛ muala bɛzile ye amgbu, na bɛzelele ye!

25 Mɔɔ menli dɔɔnwo ne akee vindele alie nwo la, Gyisɛse wolole ekpumgbunli ne mɔɔ kakula raalɛ ekyi ne la nu la anu na ɔzɔle ɔ sa ɔmaanle ye zo, na kakula raalɛ ne wulule kyela, ɔgyinlanle na ɔyɛle ye kɛ ye dɛba ne ala la! 26 Nwanwanedeɛ ɛhye anwo edwɛkɛ kpondenle hɔle ɛkɛ ne maanzinli ne anu ɛleka biala. 27 Na mɔɔ Gyisɛse vile kakula ne sua nu la, anyezinliravolɛma nwiɔ bie lile ɔ nzi, na bɛdeɛdeanle nu bɛzele kɛ, "O Devidi Ara, nwu yɛ anwunvɔne."

28 Bɛhɔle sua ne mɔɔ Gyisɛse de nu la anu, na Gyisɛse bizale bɛ kɛ, "Asoo bɛdie bɛdi kɛ mebahola meamaa bɛanwu debie ɔ?" Bɛzele ye kɛ, "Ɛhɛe, Awulae, yɛdie yɛdi."

29 Akee ɔvale ɔ sa ɔhanle bɛ nye ne mɔ na ɔzele bɛ kɛ, "ɔlua bɛ diedi ne ati ɔbayɛ ɛkɛ."

30 Na ɛkɛ ne ala bɛ nye ne mɔ bukebukele. Gyisɛse bɔle bɛ kɔkɔ ɛsesebɛ ɛsesebɛ kɛ bɛmmaka bɛkile awie biala, 31 noko akee bɛanli zo na bɛvale ye dumalielɛ ne bɛkpondenle sua ne azo ɛleka biala.

32 Gyisɛse vile ɛkɛ ne la ɔ nee nrenyia bie mɔɔ bozonle wɔ ye nu na ɔlua ɛhye ati ɔngola tendɛ la yiale. 33 Gyisɛse dule bozonle ne mɔɔ wɔ ye nu la, na ɛkɛ ne ala ɔholale tendɛ. Ɔyɛle menli dɔɔnwo ne ala azibɛnwo totohyia! Na bɛdeɛdeanle nu bɛzele kɛ, "Yɛtɛnwunle nwanwanedeɛ mɔɔ le zɛhae la bie ɛlɛ wɔ Yizilayɛ."

34 Na Falasiima ne zele kɛ, "Ɔdaye mumua ne ɔdua abɔnsam tumi nu a ɔkola ɔtu awozonle a."

Gyimayɛvoma Mɔɔ ɔhyianle bɛ nwo, na ɔvɛlɛle bɛ la

35 Gyisɛse kpɔsale azua mgbole nee namunamu mɔɔ wɔ maanle ne anu la amuala azo na ɔhilehilele debie wɔ Dwuuma ayialeka ne mɔ na ɔlale Edwɛkpa ne mɔɔ fale Belemgbunli maanle ne anwo la ali. Na ɛleka biala noko mɔɔ ɔhɔle la ɔyɛle menli mɔɔ ɛlɛwu ewule ngakyile ngakyile la ayile. 36 Na ɔlile menli ne mɔ anwo nyane kpole kpalɛ, ɔboalekɛ, bɛ ngyianlɛdeɛ ne mɔ zonle, na eza bɛnze mɔɔ ɔwɔ kɛ bɛyɛ anzɛɛ ɛleka mɔɔ bɛto bɛ ti bɛakpondɛ moalɛ bie a. Bɛyɛle kɛ mboane mɔɔ bɛnlɛ boaneneavolɛ la.

37,38 Akee ɔzele ye ɛdoavolɛma ne mɔ kɛ, "Egyinli ne anu aleɛbulɛ gyima ne le kpole, na gyimayɛvoma ne mɔ noko le ekyi. Ɛhye ati bɛzɛlɛ Awulae, mɔɔ le egyinli menle ne la bɛmaa ɔva gyimayɛvoma dɔɔnwo wɔ ye egyinli ne mɔ anu."