1 एप्रैम गोत्रे धारा बाखे मुल्खै त रामतैम-सोपीम* नगरी एलकाना नाओं एक मणछ। एलकाना त एप्रैम गोत्रा दी सूप खिंबा का जेरोहामो शोहरू, अर एलीहूओ पोचअ अर तोहू थिअ तेऊओ पल़दादू।✝ 2 एलकाने ती दूई बेटल़ी* हन्‍ना* अर पनिन्‍ना*। पनिन्‍ने हुई आजू लुआद पर हन्‍ने निं लुआद हुई।✝

3 एलकाना डेओआ त हर साल शिलोह* नगरी लै कि सह स्वर्गे सारी सैने मालक बिधाता सेटा माथै टेक्‍कदअ अर मेल़-ज़ोल़ो बल़ीदान करदअ। शिलोह तै हुपनी अर पिनहास एलीए दूई शोहरू, तिंयां थिऐ तिधी बिधाते प्रोहत।

4 ज़ेभै बी एलकाना मेल़-ज़ोल़ो बल़ीदान करा त, सह दैआ तेभै-तेभै तेते शिखा आपणीं लाल़ी पनिन्‍ना अर तैहा का हुऐ दै आपणैं शोहरू-शोहरी लै बांडी। 5 बिधाता निं अज़ी हन्‍नो ओदर खोल्हअ आथी त। तज़ी बी दैआ त एलकाना हन्‍ना लै बी दोगी किल्हैकि सह झ़ूरा त तैहा लै खास्सअ।

6 पर हन्‍ने दैणी पनिन्‍ना लागा ती तैहा लै टाभा बाहंदी कि तेसे निं किछ़ै हुअ-ज़ाअ आथी। 7 इहअ हआ त हर साल, ज़ेभै बी तिंयां बिधाते पबित्र ज़ैगा डेओआ तै, पनिन्‍ना करा ती तैहा लै टाभ बाही अर हन्‍ना रहा ती फलिल्ही हई लेरा लांदी लागी अर तेखअ निं सह रोटी बी खांदी ती। 8 तेसो लाल़अ एलकाना बोला त तैहा लै इहअ बी, "हन्‍ना, तूह किल्है हआ लेरदी लागी दी? तूह रोटी किल्है निं खांदी? तंऐं हआ धैल़ मुंह शेऊई डाहअ द! तेरै दस शोहरू हणैं का बी खास्सी बडी गल्‍ल आसा अह कि ताखा आसा हुंह भाल़ ज़ुंण ताल्है झ़ूरा।"

9 एकी बारी ज़ांऊं तिंयां शिलोह बिधाते पबित्र ज़ैगा भोज़ खाई-झुटी मुक्‍कै, हन्‍ना उझ़ुई तिधा का खल़ी संघा डेऊई बिधाता सेटा अरज़ करदी। खिम्भे दुआरा सेटा थिअ एली प्रोहत आपणीं गाद्दी दी बेठअ द। 10 हन्‍ना ती भितरा का खास्सी दुखी अर हिक्‍की-सल़िक्‍की लेरा लाई बिधाता का एही अरज़ करदी लागी दी, 11 "स्वर्गे सारी सैने मालक बिधाता, मुंह तेरी दासी बाखा भाल़! तूह भाल़ मेरी खरी, मुंह निं बिस्सरै आथी, ज़ै मेरै शोहरू होए, तै आसा मेरी तेता लै एही मानत कि सह शोहरू हणअ सारी ज़िन्दगी ताह बिधाता लै✝ बांधअ* अर मुंह निं तेऊए ज़ल़ू कधि काटणै।"✝

12 हन्‍ना ती बिधाता सेटा खास्सी घल़ी एही अरज़ करदी लागी दी, अर एली प्रोहत त तैहा बाखा भाल़अ लागअ द। 13 हन्‍ना ती मन्‍नैं अरज़ करदी लागी दी, तेसे होठ ता शुझिआ तै च़ुक्‍कदै पर इहअ निं शुण्हदअ आथी त कि सह किज़ै बोला। एली ज़ाणअ इहअ कि ऐहा आसा नशअ झुटअ द! 14 तैही बोलअ एली हन्‍ना लै, "ताह केभै तैणीं रहणअ इहै नशै दी? पोर्ही छ़ाड एता!"

15 हन्‍ना दैनअ एली प्रोहता लै ज़बाब, "मेरै मालक, हुंह निं शूर-शराब झुटदी! नां मंऐं कधू नशअ किअ आथी, मुंह आसा भितरी खास्सअ दुख, हुंह आसा तैहा खरी बिधाता सेटा दिल खोल्ही खोज़दी लागी दी। 16 तूह निं मुल्है इहअ ज़ाणीं कि हुंह आसा बूरी बेटल़ी। मुंह त भितरी खास्सअ कोप फिरअ द, अर तैही ती हुंह एही अरज़ करदी लागी दी।"

17 एली प्रोहतै बोलअ इहअ, "राज्ज़ी-खुशी डेऊ घअरा लै, ज़िहअ तंऐं मांगअ इज़राईले परमेशर बिधाता लोल़ी ताल्है तिहअ ई दैनअ।"

18 हन्‍ना बोलअ इहअ, "मेरै मालक, थारी मुल्है ऐहा झींण करना लै करा हुंह थारअ शूकर।" तेखअ डेऊई सह तिधा का संघा खाई आपणैं रोटी। तधा पोर्ही रही हन्‍ना खुश।

19 दुजै धैल़ै दोत्ती-दोत्थी उझ़ुअ एलकाना तेऊए टबर, संघा डेऊऐ बिधाता सेटा माथअ टेक्‍की रामाह नगरी आपणैं घअरा लै फिरी। घअरै डेऊई डेऊअ एलकाना आपणीं लाल़ी हन्‍ना सेटा, अर बिधाता दैनअ तेतो ज़बाब ज़ुंण तैहा अरज़ किई ती, 20 इहअ करै हुई हन्‍ना सुंदी अर तेसो हुअ एक शोहरू। तैहा डाहअ तेऊ शोहरू नाअं शमूएल, किल्हैकि सह रहा ती इहअ बोल्दी लागी, "अह आसा मेरै बिधाता का मांगी करै हुअ द।"

21 तेखअ गअ भिई साला बाद सह बगत एछी अर एलकाना डेऊअ आपणैं सोभी टबरा संघा निंईं बिधाते पबित्र ज़ैगा शिलोह। तिधी किअ तेऊ हर साल हणैं आल़अ मेल़-ज़ोल़ो बल़ीदान अर आपणीं मानत पूरी। 22 पर ऐहा बारी निं हन्‍ना तिन्‍नां संघै शिलोह डेऊई, तैहा बोलअ आपणैं लाल़ै लै, "ज़ांऊं हुंह शोहरू का च़ूई चल़ाऊई मुक्‍के, तेभै निंणअ मुंह अह शिलोह बिधाता सेटा, अर तेभा पोर्ही रहणअ अह आपणीं सारी ज़िन्दगी तिधी।"

23 एलकाना बोलअ तैहा लै, "ज़िहअ तूह ठीक समझ़ा, तूह कर तिहअ, तै रह तूह एऊए च़ूई चल़ाऊंणैं तैणीं घअरै। पर बिधाता लै ज़ेऊ बांधै दैणें मानत तंऐं मनी दी आसा, सह गल्‍ल लोल़ी बिधाता पूरी किई।"

ज़ांऊं तैणीं हन्‍ना तेऊ शोहरू का च़ूई निं चल़ाऊई, तेभै तैणीं निं सह शिलोह बिधाता सेटा डेऊई आथी सह रही तेऊ शोहरू धाचदी लागी। 24 बादा का ज़ांऊं तेऊ शोहरू का च़ूई छ़ुटी, तेखअ निंयं हन्‍ना सह शोहरू शिलोह बिधाता सेटा, संघा निंयं चिई सालो बाछ़ू, कोई एक मण पिठअ, अर एक खाल्हल़ी दाखो रस। हन्‍ना पजैल़अ शमूएल शिलोह बिधाते पबित्र ज़ैगा, तधू त सह लान्हअ ई। 25 तेऊ बाछ़ूओ बल़ीदान करी निंयं सह शोहरू एली प्रोहता सेटा। 26 हन्‍ना बोलअ एली प्रोहता लै, "हे मेरै मालक, तेरै सोह! हुंह आसा सह ई बेटल़ी ज़ुंण एकी बारी इधी बिधाता सेटा अरज़ करदी ती लागी दी, 27 अह आसा सह ई शोहरू ज़ेता लै मंऐं बिधाता सेटा अरज़ किई ती, अर बिधाता दैनअ मुल्है ज़िहअ मंऐं मांगअ तिहअ ई। 28 मंऐं त अह शोहरू बिधाता लै बांधअ मनअ द कि अह सारी ज़िन्दगी इधी बिधाते च़ाकरी करे। ऐबै दैनअ मंऐं अह इधी पजैल़ी करै सभाल़ी।"

तेखअ टेक्‍कअ तेऊ तिधी बिधाता सेटा माथअ।