प्रकाशन 14

मिम्मूं अर तेऊए लोग

1 एता बाद भाल़अ मंऐं किज़ै होर, सह थिअ इहअ कि मंऐं भाल़अ कि मिम्मूं आसा सियोन धारा खल़्हुअ द अर तेऊ संघै आसा तेऊए 144,000 मणछ, तिन्‍नें माथै दी त तेऊओ अर तेऊए बाबो नाअं लिखअ द। 2 मंऐं शूणअ स्वर्गा का पाणींए छ़ोआ ज़िहअ शणकार या बडै गुल़ूबिज़ल़ू ज़िहै बोल। अह बोल ज़ाण्हिंआं त इहअ ज़ाणनअ बींन बाज़णैं आल़ै आसा बींन बाज़दै लागै दै।✝14:2 एज. 43:2

3 तिंयां 144,000 आसा राज़गाद्दी, तिन्‍नां ज़िऊंदै प्राणीं अर टोलीए सैणैं सम्हनै एक नऊंईं गिहा बोल्दै लागै ज़ेता सिधै तिंयां ई सका तै शिखल़ी। तिंयां आसा तिंयां पबित्र मणछ ज़ुंण परमेशरै तिन्‍नां मणछा मांझ़ा का आणै तै बच़ाऊई ज़ुंण पृथूई दी रहा। 4 ईंयां आसा तिंयां ज़ुंण इहै मणछा ज़िहै पबित्र आसा ज़ुंणी कधि कंज़रैई निं किई, इहै ई तिन्‍नैं निं मिम्मूं का सुआई होरी कोहिए पूज़ा किई। ज़िधा लै बी मिम्मूं डेओआ, तिंयां बी डेओआ तेऊ पिछ़ू-पिछ़ू। तिंयां आसा तिंयां ई ज़ुंण पृथूईए सोभी मणछा मांझ़ा का आसा बच़ाऊऐ दै। ज़िहै लोग तिन्‍नें फसला का पैहलअ फल़ परमेशरा लै दैआ, तिंयां बी आसा तिहै ई परमेशर अर मिम्मूं लै पैहलै फल़ भैंट किऐ दै। 5 तिन्‍नें खाखा का निं कधि झ़ुठअ निखल़दअ त, तिंयां थिऐ नर्दोश।