1 Linyongolo lyuku Sheba pajhohina malobhe gha Chelemane pahina gwake na Bhambo Chapanga, ngannyendelela Chelemane kupala kuntegha kukunkonya machwale majhundupahu. 2 Ngajhenda kwenio ku Yeluchalemo kongo abhii na akatumiche bhake ndii, pamonga na ngamiya ndii igheghite mahuta ghina kunungilila petelele pamonga na chaabo na maghanga gha bei ngolongwa. Chelemane pammona ngannyambucha linyongolo lyenio, na linyongolo jwenio pahikita kwa Chelemane ngankonyita machwale ndii hake ghakibha nagho. 3 Jwenio Chelemane ngajhangwila machwale ghoha, likibha jhe lichwale lyalepelile kujhangula. 4 Linyongolo lya ku Sheba ngakangicha pahweina malango ghoha gha munahota nkolongwa Chelemane pajhangwila kwa malango na paiweina nyumba jhikinahota nkolongwa, 5 kabhele ngakibhona chakulya chikiletitwe pakichangwale cha Chelemane, na ilongoche yake pibhatamite pakichangwale, na akatumiche chibhawalite makanjo ghabhe maha na bhando bhibhatekana yu kunywe na matambiko ghu kukomelekeya ghighapihwa ku Nyumba jha Bhambo Chapanga, ngahechwika nu kukangacha hake. 6 Peniya, ngannobholila munahota nkolongwa, chakaka ilebhe yoha inyohina ku kilambo chango na ilebhe mbwe ino na malango ghino ghalenganile! 7 Nambo nikakung'ii jhe mihalo jhenio ade panaika namwene kuibhona ilebhe yenio. Ata yene bhannobholii jhe ilebhe yoha wala nucho jhake bhalongii jhe, malango ghino pamonga ni ilebhe ino kupeta panajhohagha. 8 Bhina mota bhando bhino! Na kabhele bhina mota akatumiche bhino bhibhajhema nnonge jhino kongo kupeta na kujhokanikiya malango ghino! 9 Alombwa Bhambo Chapanga, Chapanga gwino, nhwalo jwenio ntehi ahalalichwe na mwenga ade ammekite mme manahota akolongwa bhikilambo chuku Ichilahele! Nhwalo Bhambo Chapanga ate kwapala bhando bhuku Ichilahele machiko ghoha ghangapeta, kabhele ammekite mwenga kubhehe manahota akolongwa kupala ntunja mihilo na umbone ngita chiipalwa.

10 Peniya, linyongolo jwenio ngampila munahota nkolongwa Chelemane hupo yagheghite. Ngampila kuikii tane elufo ncheche ya chaabo pamonga na mahuta ghina kuningila njiii na maghanga gha bei ngolongwa. Ujholoko gwa mahuta ngita ghenio ghapekilwe munahota nkolongwa Chelemane ghinaletwa jhe kabhele ngita gheniya ade pa deleno.

11 Kabhele mwanja gwa mele jha munahota nkolongwa Hilamo jhuku Ofile ngailetita mikongo twe jha michandale pamonga na maghanga gha bei ngolongwa. 12 Munahota nkolongwa Chelemane ngaitumila ngita heke mikongo jhenio jha kutendekeya Nyumba jha Bhambo Chapanga na liboma pamonga nu kutendekeya nkangala pamonga na malimba ku nhwalo gwa bhando bhibhajhemba. Helahela kujholoka kwa mikongo ngita jhenio inawahii jhe kubhonekana ade deleno.

13 Helahela munahota nkolongwa Chelemane ngampila linyongolo jwenio jhuku Sheba kila kilebhe chaghanita na kujhopa. Ngampila hupo henge ndii kupeta chabhapila bhange bhando bhibhawelita kuika peniya na ngita chibhayobhalii na umbone gwa kinahota nkolongwa. Jwenio pamonga na bhando bhake bhoha bhakibha nabho ngabhabhujha kukilambo chabhe.

14 Kila chaka ngabhannetila munahota nkolongwa Chelemane kilo elufo ichiline niibhele ya chaabo. 15 Chaabo jhenio jhikibha panga jhonjekeya chaabo jhibhaleta bhando bhibhachulucha amu kode mu kuchulucha ilebhe ibhatohila akanahota bhoha bhuku Alabiya pamonga na akanahota bhoha bhu kilambo chuku Ichilahele.

16 Chelemane ngatendekeya ngao ngolongolo miya ibhele kwa chaabo jhiyanitwe, kila ngao ikibha na kilo chaba jha chaabo. 17 Kabhele ngatendekeya ngao njokonjoko miya itato kwa chaabo jhiyanitwe, kila ngao ikibha na kilo jhimo na nucho jha chaabo, peniya, munahota nkolongwa Chelemane ngao yenio ngabheka mu nyumba jhikemitwa, Litogholo lya Lebanone.

18 Helahela akatengeniche kigoda kikolongwa chi kinahota nkolongwa kwa mino gha ndembo nu kulembeke chaabo jhambone jhiyanitwe. 19 Kigoda chenie kikibha na ngache chita yu kuhobhokela. Panane nu kunyuma jhi kigoda chenie kikabhilingine unyuma. Na kila upande pakibha na pukujheghemeke lubhoko, pakibha ni inyagho iliimba ijhemite pahupele jha kila upande. 20 Inyagho ya maimba kome na mabhele ngabhajhemeka muupele jha ngache chita, limo kila upande gwa ngache. Na hilu panapitii jhe kigoda cha kinahota nkolongwa ngita chenio.

21 Ikombe yoha yukunywelela munahota nkolongwa ikibha ya chaabo, na yombo yoha ikibha ibhekitwe ku nyumba jhikemitwa Litogholo lya Lebanone na yombo yoha ikatenganichwe kwa chaabo. Ikatenganichwe jhe kwa madine ghighakemwa Feza, nhwalo kipinde chenie madine gha feza ghakibha jhe na bei ngolongwa. 22 Helahela munahota nkolongwa Chelemane akibha na mele ngolongwa jhikujhende kukilambo chuku Talishishi pamonga na mele jha munahota nkolongwa Hilamo. Jhenie ubhujha kila jhimo kwa yaka itato ndi jhinnetila chaabo na madine gha feza na mino gha ndembo na majhane na ijhune ikemitwa tausi.

23 Munahota nkolongwa Chelemane ngabhila mundo jhuna ilebhe mbwe hake na jhuna malango hake kupeta akanahota akakolongwa bhoha pannema. 24 Bhando kuhumii kila chehemo pannema ngabhapala kujhenda kujhokanikiya malango ghapatite kuhumii kwa Bhambo Chapanga. 25 Kila mundo ngannete hupo yake, yombo itendikilwe kwa madine gha feza na chaabo, pamonga na ngobho ina kuhalala na chilaa na mahuta ghina kunungilila njiii na falache pamonga na maponda. Hupo yenio apokila chaka ade chaka.

26 Chelemane akibha na mutuka jhihutitwa na falache na bhando bhukuhobhoke mu falache, akibha na mutuka jhihutitwa na falache elufo jhimo na miya ncheche pamonga na akahobhoke falache elufo kome na bhabhele, bheniya ngabhabheka mu miche jhibhii na chehemo jhikubheke mutuka ghighahutwa na falache pahina na munahota nkolongwa, na ghange ghakibha ku Yeluchalemo. 27 Bhahe, munahota nkolongwa Chelamane ngaghatenda madine gha feza ngita maghanga ghange, kwenio ku Yeluchalemo, na mbau ya mieleze ikibha ndi ngita mbau ya mikongo mikojho jhimelite mu lulambo lwa mbwane. 28 Chelemane ngalaghila bhannete falache kuhumii ku Michile pamonga nu kukilambo chuku Kilikiya, kwenio akachulucha bhake bhakahemii kuhumii kwenio. 29 Mutuka jhimo jhikuhutwa kwa falache bhahemila kwa kilo chaba jha madine gha feza, na falache jhumo bhahemila kwa kilo ibhele ya madine gha feza. Akachulucha bha ilebhe ya munahota nkolongwa, ngabhapelika mutuka na falache yenio kwachuluchila akanahota akakolongwa bhoha bha Akahite na Akasiliya.