1 Chelemane ngalombina na Falao munahota nkolongwa jwaku Michile, kukuntolela kamwale jwa Falao. Nganneta bite Falao ku muche gwa Daude, ade pajhomwila kuchenga nyumba jhake jhu unahota nkolongwa jwenie, na nyumba jha Bhambo Chapanga, pamonga na kuchenga lipamanda kutindii muche gwa ku Yeluchalemo. 2 Ade kuhiki kipinde chenie bhando bhakibha bhamela bhipiya matambiko ghukukomelekelwa kuitombe, ku nhwalo nyumba jha Bhambo Chapanga ikibha jhammela ichengitwe ndeka, 3 Chelemane ngampaila Bhambo Chapanga, kukukengama malaghalikilo ghapeilwa na Daude, tatemundo, ata yene akibha apihita matambiko ghukukomelekelwa na kututukiya ubane muitombe.

4 Lichiko limo, Chelemane ngajhenda kupiya litambiko kwenio ku Gibeone, nhwalo pakibha chehemo jhimanyikine hake pa kunnyinamila Chapanga. Chelemane Akayobhalile kupiya matambiko maelufo ghu kutiniya chehemo jhu kupiikiya matambiko gheniya. 5 Kwenio ku Gideone, Bhambo Chapanga ngampitila mu maloto Chelemane kilo ngannobholila, "Nnyopa chochoha chimipala nanimpela."

6 Chelemane ngajhangwila, "Nnangiye upalo gwangokoma kwa ntumiche gwino Daude tate gwango. Ku nhwalo akibha jhunakuhobholeka kwino na jhuna kujheketelwa na jhuna mwojho gwa mbone, namwe nnyendilii munnyonjekii umbone nkolongwa, kukumpe mwana jwa kutama pa kigoda chake chu unahota nkolongwa ngita chibhii ngohe. 7 Mwe ma Bhambo Chapanga, Chapanga gwango, umekite natumiche bhino me munahota nkolongwa chehemo jha tate gwango Daude, nambo nenga namwana jwandina na nimanyii jhe kulongocha. 8 Pamba nitama pakate jha bhando twe bhimahagwii mabhene, bheniya ndi bhamahele hake, atabhibhalangika jhe ku nhwalo gwa ghukujholoka kwabhe. 9 Yene, chonde ninnyopa umbe nenga natumiche gwino malango ghukumanya pakate jha ghambone na ghanganandela, kupala nhoto kwalongocha bhando bhino kwa umbone, nhwalo nanhotola bhole kwalongocha bhando twe ngita bhamba?"

10 Lujhopo lwenio lwa Chelemane lwakanhalalii hake Bhambo Chapanga, 11 Chapanga ngannobholila, "Ku nhwalo nnyopite kilebhe chenie, mikijhopii jhe mabhene ghome ndii amu ilebhe mbwe, hilu nnyopite jhe akamakoko bhino bhakomwe, nambo nnyopite malango nu umanye gwa kutenda changalolekeya kumiho, 12 ngohe, nanenganikiya chenie chunnyopite. Bhahe, nanimpela malango na uhotolo gwa kubangatuka, yenio anapitii jhe mundo jhojhoha pannema pano ngita mwenga, hilu napitila jhe mundo jhonge jhojhoha. 13 Helahela, nanimpela ghange ghunnyopite jhe, nanimpela ilebhe mbwe na ichima, kupeta akanahota akakolongwa bhange bhobhoha bhala. 14 Kabhele anda nantembekeya nu kwikamula mihilo jhango na ngita chateila tate gwino Daude, peniya, nanimpela ghome gwa machiko twe."

15 Chelemane pajhimwika, ngamanya kubhehe Chapanga alongile nako mumaloto. Ngabhujha ku Yeluchalemo, ngajhema nnonge jha Lichanduko lya lilaghano lya Bhambo Chapanga, ngapiya litambiko lya kukomelekelwa na lya uteeke. Peniya ngabhatendela unyagho akatumiche bhake bhoha.

16 Lichiko limo, akakeghe bhabhele akangongola, ngabhajhenda ku munahota nkolongwa Chelemane. 17 Jhumo ngalonge, "Mwe manahota makolongwa," ne na mwikeghe ojho tutama nyumba jhimo, nenga ngambapita mwana munalome kipinde ojho abhii peniya. 18 Machiko matato nnonge, ojho ngapapa mwana munalome. Mwenio akibha jhe mundo jhonge, nambo twe tu tabhele. 19 Nambo lichiko limo, kilo mwana gwake ngajhomoka nhwalo akatehi kung'olokela. 20 Pang'ang'anwika kilo, ngantola mwana jwanenga kipinde nenga mmi lughono likitii, ngang'oneka pikindanda chake. Peniya, ngatola ntuhe gwa mwana gwake ngammeka pakindanda chanenga. 21 Pinyimwika lukela nu kupala kumpe mwanango libhele ajhonge, ngannimmona ajhomwike. Paninningukiya hake, ngahumbwila kubhehe akibha mwanango jhe.

22 Nambo mwikeghe jhonge jhola ngalonge, "Uwange! Mwana jwabhii ghome ndi jwango na mwana jwajhomwike ndi jwino."

Na mwikeghe jwatumbwila kulonge jhola, "Uwange! Mwana gwino ndi jwajhomwike, na jwango ndi jwabhii ghome!"

Yene ndi chibhajhendilila kutaungana nnonge jha munahota nkolongwa.

23 Munahota nkolongwa Chelemane ngalonge, "Mabhoha milonge mwana gwango ndi jwabhii ghome na jhola jwajhomwike ndi jwino." 24 Peniya, munahota nkolongwa ngannobholila ntumiche gwake, "Netela upanga!" Na bhene ngabhannetila. 25 Munahota nkolongwa ngalongila, "Munhwekete mwana jwabhii ghome ipande ibhele, mumpela jhumo kipande chimo na jhonge kipande chenge."

26 Mwikeghe jwakibha majhe jwa mwana jwenio jwabhii ghome, ngabhila na kiya, ngalonge, "Nai jhe, manganhanjulana jhe mwana mbaha mumpela ojho antole, kongo abhii ghome."

Nambo mwikeghe jhonge jhola ngalongila, "Nai jhe! Mbaha mwana jwenio munkenjulane ipande ibhele. Angabhehe jhe mwana jwango hilu jwake."

27 Peniya, munahota nkolongwa ngalonge, "Mangankoma jhe mwana! Mumpela mwikeghe jhu kutumbula antole, nhwalo chakaka jwenio ndi majhe mundo."

28 Bhando bhoha ku Ichilahele pibhajhohina panane jha luhadabulo lwapihita munahota nkolongwa, ngabhannyogwipa, nhwalo ngabhamanya kubhehe akibha na malango gha Chapanga ghighannongwiya kwahadabula bhando changalolekeya kumiho.