1 Hilamo munahota nkolongwa jhuku Tilo jwakibha nkochemundo munahota nkolongwa Daude, pajhoha kubhehe Chelemane bhamminile mahuta abhehe munahota nkolongwa chehemo jha tatemundo Daude, ngabhatuma akatumiche bhake kwajwenio. 2 Bhahe, Chelemane ngabhujhicha malobhe kwa munahota nkolongwa Hilamo kulonge, 3 "Umanye kubhehe tate gwango Daude akanchengii jhe Bhambo Chapanga, Chapanga gwake nyumba jhukunnyinamila, nhwalo akibha na ngondo ndiii kubhoke mu ilambo yoha itindila ade Bhambo Chapanga pampila kwahotola." 4 Nambo ngohe Bhambo Chapanga, Chapanga gwango ambii uteeke pandi yoha mu ilambo. Ngohe abhii jhe likoko na kabhele kibhii jhe kilebhe changanandela. 5 Bhambo Chapanga, Chapanga gwito ngalaghina na tategwango kulonge, "Mwana gwino jwapa kubhehe munahota nkolongwa kubhoke kwino mwenga, aichenga Nyumba jhu kunyinamila nenga. Ku nhwalo gwenio mbakunchenge Nyumba jha kunyinamila Bhambo Chapanga! 6 Bhahe, malaghalikiye bhando bhino bhajhende ku Lebanone bhakapengulile heke ya mieleze. Bhando bhango nabhalombana na bhando bhino mu lihengo lyenie, nanenga nanalepa akatumiche bhino ngita chibhapala kulonge. Nhwalo tikweti jhe mundo jhojhoha jwahoto kupengu mikongo ngita akatumiche bhino bhuku Sidone."

7 Kipinde Hilamo pajhohina nhwalo gwenio ngahanginala hake kumwojho, ngalonge, "Deleno alombwe Bhambo Chapanga, kukumpe Daude mwana jhuna malango alongoche kilambo chenje kikolongwa." 8 Hilamo ngammujhichila Chelemane malobhe ghanga, "Nyohine malobhe ghino, nanenga nandenda ngita chimipala ku nhwalo gwa mbau ya mieleze na yi mibeloshe. 9 Bhando bhango nabhabhilimbiya magogo kubhoke ku Lebanone ade ku mbwane, napeniya bhitabha mihigho kupala ghajhebhela panane jha mache ade chehemo jhimpakupokela. Peniya bhando bhango nabhakwilughana na bhando bhino bhitola. Nambo chimipalwa mwenga kwape chakulya bhando bhango."

10 Yene Hilamo ngampila Chelemane magogo ghoha imieleze na ya mibeloshe yaipalita, 11 Chelemane kila chaka ngampila Hilamo ngano madebe lake ibhele na alobaine na mahuta gha mbone gha micheitune madebe miya ibhele kila chaka, kupala ibhaha yakulya ya bhando bhibhabhii munyumba jhake.

12 Yene Bhambo Chapanga ngampila Chelemane malango ngita chalongila. Chelemane na Hilamo, ngabhateila majhetelano ghu kubhe teeke panakate jhi ilambo yabhe.

13 Munahota nkolongwa Chelemane ngakonganicha bhando elufo chelachine kubhoke kila chehemo kukilambo cha Ichilahele, kupala kuhenga mahengo gha kwachokolekeya, 14 ngabhapelika ku Lebanone kwa chamo jha bhando elufo kome kwa mwehe. Yene ngabhatama ku Lebanone kwa mwehe ghumo na myehe mibhele ukajha, Adonilamo ndi jwakibha kilongoche jwa mahengo gheniya. 15 Chelemane akibha helahela akaghegha mihigho elufo chabine, na akakajhuu maghanga elufo chemanine kwenio kuitombe, 16 pamonga na akajhemelela elufo itato na miya itato bhibhajhemelila lihengo lyenie, na akahenga mahengo bhoha. 17 Kwa malaghalikilo jha munahota nkolongwa, ngabhahembula maghanga makolongwa na ghambone, kupala ghabhachwa ku nhwalo gwa kuchenge nchinge gwa nyumba. 18 Bhahe, yene ndi mapunde kuchenga bha Chelemane na Hilamo na bhando bhi kilambo cha Gebale chibhalenganikiya maghanga na mbau yu kuchengela Nyumba jhenio jha Chapanga.