1 Lichiko limo, Yeloboamo akajhemite pahina na chehemo jhukupiikiya matambiko kupala kututukiya ubane pa chehemo jhenio. Peniya, nnondole jwa Chapanga kuhumii ku Yuda ngaika kwenio ku Betele akatumitwe na Bhambo Chapanga. 2 Bhahe, mundo jwenio ngachobhila kanonoho chehemo jhenio jhukupiikiya matambiko kukulonge, "Mwe ma chehemo jhukupiikiya matambiko, mwe ma chehemo jhikupiikiya matambiko, Bhambo Chapanga ilonge naha, ‘Nabhelukwa mwana mu lukolo lwa Daude liina lyake Yoseya. Jwenio nabhatola akapiya matambiko bhibhatumikii pamba kubhehe matambiko ghu kukomelekeya pamba chehemo jhitondobhile natiniya ihupa ya bhando bhibhawilingine panane jhino!’ " 3 Lichiko lele, mundo jwenio ngabhoha nginyililo kulonge, "Jhenje ndi nginyililo jhalongila Bhambo Chapanga, ‘Chehemo jhikupiikiya matambiko naitilulwana na malihu ghighabhii panane jhake naghajhitika kutu.’ "

4 Munahota nkolongwa Yeloboamo pamanya malobhe ghala ghalongila ntumiche jwa Chapanga, ngatondobhiya lubhoko lwake nu kulonge, "Mukamule mundo jwenio!" Papa, lubhoko lwenio lwatondobhiya ngulujhoma chwaaa, akahotwii jhe kabhele kulukungutaya. 5 Na chehemo jhikupiikiya matambiko jhenio ngaitulwikana nu malihu ngaghajhitika pahe, anda nginyililo jhela jhalongila nnondole jwa Chapanga ku liina lya Bhambo Chapanga. 6 Peniya, munahota nkolongwa Yeloboamo ngannobholila mundo jwa Chapanga kubhehe, "Chonde unnyope kwa Bhambo Chapanga gwino kwa malola ghango nenga, mbala anamiche lubhoko lwango!"

Nnondole jwenio ngannyopita Bhambo Chapanga lubhoko lwa munahota nkolongwa Yeloboamo ngulubhila njelembo.

7 Munahota nkolongwa ngannobholila nnondole kubhehe, "Chonde tujhenda kajhango makalye chakulya. Ne mbala nihupe hupo kunhwalo ghu ntehile."

8 Nambo nnondole jwa Chapanga jwenio ngalonge, "Ata makambii nucho jha ilebhe ino yoha nijhekete jhe kujhenda pamonga namwenga hilu nilye jhe amu kunywe pamba. 9 Kunhwalo Bhambo Chapanga ande kunaghalikiya kubhehe nangalye jhe hilu kunywe na hilu nangabhujhii jhe ku ndela jhinahikila pamba." 10 Bhahe, mundo jwenio ngajhawila hilu abhujhii jhe mundela jhahikila ku Betele, nambo ngabhujha kundela jhenge.

11 Kipinde chenie pakibha na nnondole jhumo kighogholo ku Betele. Yana yake ngijhenda kunchimulila tategwabhe nhwalo gwenio pamonga na ilebhe yoha itendike kwenio na nnondole jwenio jhuku Betele, na ngabhalonge malobhe ghalongila munahota nkolongwa Yeloboamo. 12 Tate gwabhe ngabhakonya, "Apetita ndela ghane pabhoka peniya?" Na yana mundo ngabhannangiya ndela jhapetite mundo jwa Chapanga jwenio jwahumila ku Yuda. 13 Jwenio ngabhailobholila yana yake, "Bhannenganikiye liponda." Ngabhateila yene na jwenio ngahobhokela mu liponda lyenio, 14 ngankengamila mundo jwa Chapanga ngankolila atamite nhwina jha nkongo ghukemitwa mwalone. Jwenio ngankonya nnondole, "Bho, mwe ndi ma mundo bha Chapanga kuhumii ku Yuda?"

Jwenio ngajhangwila, "Ena! Ndi nenga."

15 Bhahe, nnondole kighogholo ngajhendilila kulonge, "Tijha kajhango makalye chakulya."

16 Nambo mundo jwa Chapanga jhola ngalonge, "Ne nihoto jhe kubhujha na mwe amu kulye chakulya hilu kunywe kilebhe chochoha pamba, 17 nhwalo Bhambo Chapanga ande kunaghalikiya nangalye jhe chakulya amu kunywe kilebhe chochoha chehemo jhenje na hilu nangabhujha jhe ku ndela jhinhikilagha."

18 Nnondole kighogholo jwenio jhuku Betele, ngajhangwila kukulonge, "Nenga hele nalondole jwa Chapanga ngita mwenga, kabhele Bhambo Chapanga andehi kunduma kupete ntumiche jhukunane kwa Chapanga kulonge, ‘Hike kuntola mwenga tujhende kajhango kupala makalyeghe nu kunywegha.’ " Nambo nnondole kighogholo jwenio akibha nhwange tugha.

19 Peniya, nnondole jwenio ngabhujha pamonga na kighogholo jwenio, ngalye chakulya nu kunywe mache mu nyumba jha nnondole jhola kighogholo. 20 Kipinde chalila, lilobhe lya Bhambo Chapanga ngalihika kwa nnondole kighogholo jwamujhicha nnondole jwa Chapanga, 21 nu ngannobholila jwenio nnondole jhuku Yuda, "Bhambo Chapanga lilonge naha, Mwenga mukalijhokanikii jhe na mijhokanikii jhe mihilo jhapila Bhambo Chapanga, Chapanga gwino jhannaghalikiye. 22 Nambo mwenga mmujhite kulye chakulya nu kunywe mache pamba punnaghilwa mangalye jhe hilu kunywe mache, ku nhwalo gwenio ntuhe gwino uchikwa jhe ku mambe jha akahoko bhino."

23 Bhahe, mundo jwa Chapanga jhuku Yuda pajhomolila kulyegha, jhola nnondole kighogholo ngalenganikiya liponda kunhwalo jha jwenio, na jwenio ngajhawila. 24 Pakibha akajhenda ngakongina na liimba ngilinkoma na ntuhe gwake ngubhe papa pandela, liponda lyake pamonga na liimba ngabhabhila bhajhemite paupele jha ntuhe. 25 Bhando bhibhapeta peniya nu kubhona ntuhe gwenio pandela, ni liimba lijhemite pahina, ngabhajhenda kwatama nnondole jwenio kunchimulila ghibhaghawene.

26 Nnondole jwenio pajhoha gheniya ngamanya kubhehe, "Jwenio ndi jwajho mundo jwa Chapanga jwakana kukengama mihilo jha Bhambo Chapanga! Na yene Bhambo Chapanga alitumite liimba linkachulane nu kunkoma ngita chalongila." 27 Nnondole kighogholo jhola ngailobholila yana mundo, "Umbanganikiye liponda." Na bheniya ngabhannenganikiya. 28 Kighogholo jwenio ngajhenda ngaukole ntuhe gwa nnondole jwenio, pahina lijhemite liimba pamonga ni liponda. Liimba lyenio lilii jhe ntuhe gwenio, hilu kulikwachulana liponda. 29 Peniya, kighogholo jwenio ngautola ntuhe gwa mundo jwa Chapanga, ngaubheka panane jha liponda lyake na ngauleta, ngalelita malelo ghake nu kunchika. 30 Bhahe, nganchika ku mambe jhake, jwenio pamonga na yanamundo ngabhalelita malelo gheniya kulonge, mwe malongo bhito tunkole kiya! 31 Kuhumii pu kunchika malelo gheniya nnondole kighogholo jwenio ngailobholila yanamundo, "Nenga anda nyomwike, unjikila mumambe jhenjeno pamonga na mundo jwa Chapanga, mmeka ihupa yango pahina na ihupa ya mundo jwa Chapanga. 32 Ilebhe yoha ghalongila Bhambo Chapanga kunhwalo gwa chehemo jhi kupiikiya matambiko ghuku Betele na chehemo yoha patondobhahu kumuche ghuku Samaliya, chakaka ipakulenganila."

33 Ata yene, munahota nkolongwa Yeloboamo jhuku Ichilahele akalekite jhe ubhoho gwake, ngajhendilila kabhele kwahaghuu bhando akabhoho kubhehe akapiya matambiko, bhakantumikile chehemo jhitondobhile jhibhachenga. Ngammeka mpiya litambiko kila mundo jwampalita. 34 Uhakaho gwenio ngutenda lukolo lwa Yeloboamo kukomelekelwa nu kuputwa pulutu pannema.