1 Munahota nkolongwa Chelemane pajhomolila kuchenga nyumba jha Bhambo Chapanga pamonga na nyumba jhake jha kinahota na ilebhe yoha yapala kuhenga, 2 Bhambo Chapanga ngampitila kabhele ngita champitila kwenio ku Gebione. 3 Bhambo Chapanga ngannobholila munahota nkolongwa Chelemane kubhehe, "Nyohine kujhopa kwino na chimijhopa, nenga nijhelewiye nyumba jhenie kubhehe kupala bhando bhanyinamila mwenio machiko ghoha ghangapeta. Ne naniilonda nu kuijhemelela machiko ghoha. 4 Na mwenga anda undumikii kwa mwojho gwino gwoha nu kukuhobholeka ngita tate gwino Daude, na anda mijhokanikii mihilo jhango nu kulenganikiya ghoha ghininnaghalikiya, 5 nenga nannikangamalicha ulongoche gwino kilambo chuku Ichilahele machiko ghoha ngita channaghina Daude tate gwino kubhehe, Napelulwa jhe mundo jwa kulongocha munahota gwa aka Ichilahele machiko ghoha ghangapeta." 6 Nambo mangota na yana ino nng'alamwike nu kuleka kungengama nenga nu kuikamu jhe malaghalikilo ghango na mihilo jhango jhinimpehile na mangota kujhenda kuitumikii ichapanga yenge nukuijhimila, 7 bhahe, nanahamicha bhando bhango aka Ichilahele mu kilambo chenje chinapile na kuikana nyumba jhenje jhinyeketile kubhehe jhango. Ndi bhando bha ilambo henge nabhaheka nu kumpucha. 8 Kabhele nyumba jhenje jhipa kutilukana nu kubhehe lihame, kila mundo jwapakuibhona nachituka nu kukikonya kubhehe, Kwanike Bhambo Chapanga ateii naha kwa kilambo chenje na nyumba ejhe? 9 Bhando bhange nabhajhanga, "Ku nhwalo bhando bheniya bhannekite Bhambo Chapanga jwabhe, jwabhabhohita akahoko bhabhe kukilambo chuku Michile nu kuikengama ichapanga yenge, Bhambo Chapanga abhaletii malwalo gheniya."

10 Mupehekelo mwa chaka cha makome mabhele mwenio Chelemane ngachenga nyumba ibhele yane nyumba jha Chapanga na nyumba jhi kinahota, 11 munahota nkolongwa Chelemane ngampila Hilamo munahota nkolongwa jwaku Tilo miche makome mabhele munkowa gwaku Galilaya, nhwalo Hilamo akampekii munahota nkolongwa Chelamane mbau yi mieleze pamonga na mikongo jha mibeloshe pamonga na chaabo ngita chiipalitwa. 12 Nambo Hilamo pajhahwila ku Tilo kulolekeya miche yenio, likanhanganiche jhe. 13 Peniya, Hilamo ngankonya Chelemane, "Malongo bhango, miche ghane jhumbile?" Ndi nhwalo miche yenio ikemwa Kabul, yane ilambo ya kimbebhebhe, ibhii ade ngohe. 14 Hilamo akibha ampelikii munahota nkolongwa Chelemane chaabo kilo elufo tato miya chita.

15 Nghanga malobhe gha munahota nkolongwa Chelemane chibhahengicha bhando lihengo lya kuchokelekeya lya kuchenga Nyumba jha Bhambo Chapanga na nyumba jha kinahota nkolongwa na liboma li ku Milo na lipamanda li ku Yeluchalemo. Helahela ngabhachokolikiya bhando bheniya kuchenga kabhele miche jha Hazole na Megido pamonga na Gezele. 16 Falao munahota nkolongwa jhuku Michile akate kuujhingilila nu kutola muche gwa Gezele na ngaujhocha mwotu na ngabhakoma Akakanane bhibhatama mwenio. Peniya, palonge kamwale jwa Falao patolilwa na Chelemane, munahota nkolongwa Falao ngampila kamwale jwake muche gwenio gwa Gezele ubhehe hupo jha unyagho gwa ndowa. 17 Chelemane ngachenga kabhele muche gwenio gwaku Gezele helahela ngachenga kabhele Bete Holone jha pahe, 18 pamonga na miche jha Baalate na Tamale miche jhibhii kunjenga kukilambo chuku Yuda, 19 helahela ngachenga ikoko yukubheke ilebhe yake henge, na ngachenga liboma lyukubheke falache yake na ngachenga liboma pukubheke mutuka yukuhutwa na falache. Helahela ngachenga ilebhe henge yaipala jwene mu kilambo chuku Yeluchalemo pamonga nuku Lebanone pamonga na kilambo choha chalongwicha. 20 Bhando bhange bhibhahighilike pakate jha aka Amole na Akahite na aka Peliche na aka Hive pamonga na aka Yebuche, bhoha bhakibha jhe bhando bhuku Ichilahele, 21 pamonga na ibheluko yabhe bhibhahighilika kukilambo, aka Ichilahele bhakomitii jhe, bheniya Chelemane ngabhachokolikiya kuhenga mahengo ngita chibhii ade deleno. 22 Nambo Chelemane bhatehi jhe aka Ichilahele kubhehe akabhanda, bhamba ndi ngabhabheka kubhehe akakomana ngondo na bhange ilongoche ya ulongoche gwake na bhange akatumiche bha ulongoche gwake na bhange akatumiche bhake na bhange ilongoche bha akakomana ngondo na bibhahobhoke mutuka yukuhutwa na falache na bhibhahobhoke falache.

23 Na ilongoche ikolongwa bhakibha bhando miya nhwano na amuchine. Bheniya ndi bhibhajhemelela bhando kuhenga mahengo kwa munahota nkolongwa Chelemane.

24 Kubhoke pa bite Falao kuhama kuhumii ku muche gwa Daude nu kujhenda kunyumba jhi kinahota nkolongwa jhanchengila Chelemane, bhahe, Chelemane ngachenga liboma li ku Milo.

25 Chelemane ngapiya matambiko mala patato kwa chaka kwa Bhambo Chapanga, matambiko ghu kukomelekeya pamonga na matambiko gha uteeke chehemo jhukupiikiya matambiko jhanchengila Bhambo Chapanga na ngahukulikiya ubane. Yene, ngajhomolila kuchenga Nyumba jha Chapanga.

26 Peniya, munahota nkolongwa Chelemane ngatendekeya mingalabha mikolongwa twe ku muche jha Ezione Gebele, pahina na muche ghuku Elate pambwane jha Shamo, mu kilambo chuku Edomo. 27 Na munahota nkolongwa Hilamo ngabhatuma akatumiche bhake bhibhamanye ilebhe umache na bheniya ngabhahenga mahengo umele pamonga na akatumiche bha Chelemane. 28 Ngabhajhendecha kujhenda kukilambo chuku Ofile nu kuhumii kwenio ngabhaleta chaabo kilo elufo kome na ncheche nu kunnete munahota nkolongwa Chelemane.