1 Kipinde chenie, Abiya mwana jwa munahota nkolongwa Yeloboamo, atehila kulwalwa. 2 Yeloboamo ngannobholila nhwanamundo, "Nkopokeya kubhehe mundo jhonge kupala mangamanyikana kubhehe mahana bha munahota nkolongwa. Peniya, nnyende ku Shilo kwatama nnondole Ahiya jhola jwalongila kubhehe nenga mbakubhe nanahota nkolongwa jwaku Ichilahele. 3 Mupeleke mabumunda kome pamonga na maandache na chupa chimo cha bhuche, jwenio nannobholela chikinkolile mwana gwito."

4 Peniya, aana bha Yeloboamo ngabhoka, ngajhenda ku Shilo kajhake Ahiya. Kipinde chenio, Ahiya miho ghake ghakojhekine kunhwalo gwa ughohe. 5 Nambo Bhambo Chapanga akibha anobholii Ahiya kubhehe aana bha Yeloboamo bhitenda kuhika kukonyekeya ku nhwalo ghu kulwalwa kwa mwanamundo munalome. Bhambo Chapanga ngampila majhango ghukunnyanga nhwana gwa Yeloboamo kipinde chapakuhika.

Nhwana gwa Yeloboamo pahika ngakopokeya jwenio mundo jhonge tugha. 6 Kipinde chahikagha Ahiya ngajhoha kihindo pannyango ngalonge, "Jhingila nkate mone mwe maana bha Yeloboamo, kilebhe ghane mikitehi kubhehe jhonge mundo tugha? Ngwete nhwalo ghukunnobhela gwambone ndeka kwino!" 7 Nnyende makannobholele Yeloboamo kubhehe, "Bhambo Chapanga, Chapanga jwaka Ichilahele, ilonge naha, ‘Nikanhagwii panakate jha bhando bhuku Ichilahele nukummeka mme makilongoche bha bhando bhango aka Ichilahele. 8 Nganiukenjwila ulongoche kubhoke ku kibheluko cha Daude, nginimpila mwenga. Nambo mwenga mmii tela jhe na ntumiche jwango Daude, jwakibha alenganikiya maha mihilo jhango na atehila ghala tugha ghinninaghalikiya nu kungema kwa mwojho gwake ghoha. 9 Mwenga ntehi mabhoho twe kuliku akanahota akakolongwa bhoha bhibhalongolile. Mwe unganite nenga na undehi njimwe kwa kukitengenechela ichapanga yenge yu kuyana nu kuijhinamila. 10 Kunhwalo gwa ilebhe yenio mbakuleta malwalo mu nyumba jha Yeloboamo. Kila mwana munalome jhukujhomolela jwa lukolo lwa Yeloboamo naninkoma mu Ichilahele jhoha, abha mmanda jwake amu jwangabhe mmanda. Nanakomelekeya kwa mwotu bhando bha lukolo lwa Yeloboamo ngita mundo chatiniya mabule gha inyama ade ghamung'uka njwenjwe. 11 Mundo jhojhoha jwa lukolo lwa Yeloboamo, jwapa kujhomwoka pamuche, nalegwa na ghimbwa na jwapala kujhomwoke kung'onda nalegwa ni ijhune. Ne Bhambo Chapanga ndi nongile gheniya.’ "

12 Ahiya ngannobholila aana bha Yeloboamo, "Ajha, nnyinuke nnyende kajhino. Ndi kipinde tugha pumpakuhika kubomane mwana gwino najhomwoka. 13 Bhando bhoha bhuku Ichilahele, nabhahika kulela malelo nu kunchika. Jwenio ndo kanjika pakate jha mu lukolo lwa Yeloboamo jwapakuchikwa, nhwalo jwenio ndi jwanhalaliche Bhambo Chapanga. 14 Bhambo Chapanga nanyinula mundo jhonge kubhehe munahota nkolongwa jhonge jhuku Ichilahele, jwapa kukiputilii okwe lukolo lwa Yeloboamo. Ata ngohe, kilebhe chenio kitumbwile kupitila 15 Bhambo Chapanga abhakwachwapula bhando bhuku Ichilahele na bheniya nabhanyukanyuka ngita matete ghuku kuloche. Na apakwatupula mu kilambo china kuhalala chabhampii akahoko bhabhe na kwapechengana kwiye jhi lukemba lwa Efulate, nhwalo bhantehi Bhambo Chapanga abha nilindoghondogho kukutendekeya Ashela, kichapanga mwikeghe. 16 Bhambo Chapanga nabhaleka aka Ichilahele ku nhwalo gwa uhakaho ghatei Yeloboamo, na ngabhajhambukiya aka Ichilahele bhatende."

17 Peniya, aana bha Yeloboamo ngabhabhoka, na ngajhenda kajhake ku muche ghuku Tiliza. Kipinde tugha pibhahika kikola mino cha nnyango, mwana gwake ngajhomwika. 18 Bhando bhuku Ichilahele ngabhalelita malelo nu kunchika ngita Bhambo Chapanga chabhalobholila kupete nnondole Ahiya.

19 Ilebhe henge yatenda Yeloboamo na ngondo yabuline nu ulongoche ghu kinahota nkolongwa gwake, ghajhandikwe Mukitabo cha Kombokela chuku Ichilahele. 20 Yeloboamo ngalongwicha ku kipinde cha yaka ichiline niibhele, peniya ngajhomwika, na mwana mundo Nadabo ngalongwicha chehemo jha tatemundo.

21 Leoboamo mwana jwa Chelemane pahikicha yaka makome ncheche na limo ngabhila munahota nkolongwa jhuku Yuda. Ngailongwicha Yuda kuhumii Yeluchalemo yaka kome na chaba, muche gwauhagwila Bhambo Chapanga kubhehe chehemo jhikujhinamilwa pakate jha miche jhoha jha makabila ghaka Ichilahele. Majhemundo akemitwa Naama, jwa likabila lya Amone.

22 Bhando bhuku Yuda ngabhantende ubhoho Bhambo Chapanga na ngabhantenda abhe nililaka nhwalo gwa ubhoho gwabhe ndiii kupeta ubhoho ghubhatehila akahokomundo. 23 Kunhwalo bhakatendikii chehemo jhukujhinamila, na ngabhajhemeka heke ya maghanga pamonga ni inyagho ya ichapanga mwikeghe Ashela, chehemo pikitombe kitandamaho pamonga na nhwina jhi mikongo mikolongwa jhibhii na mahamba. 24 Kabhele mu kilambo chuku Yuda, mukibha na akanalome bhibhagholokina bhene kwa bhene kunhwalo gwa kujhinamila inyagho yabhe. Ilebhe yenio iteilwa na bhando ilambo henge, Bhambo Chapanga ngaghabhenga kabula aka Ichilahele bhanahika jhe ku kilambo chuku Kaanane.

25 Chaka chu nhwano chu kulongocha gwa Leoboamo, munahota nkolongwa shishake jhuku Michile, ngaujhingila muche ghuku Yeluchalaemo. 26 Ngatola ilebhe yoha ibhekitwe mu kihukilo cha Nyumba jha Bhambo Chapanga na mu kihukilo cha nyumba jha kinahota kikolongwa. Ngatola kila kilebhe na ikopa yoha ya chaabo yatendikiya Chelemane. 27 Yene, munahota nkolongwa Leoboamo ngatendekiya ikopa ya shaba na kwape akalonda bhu ulonda gwa litangala lya nyumba jhi kinahota. 28 Kila kipinde munahota nkolongwa pajhenda ku Nyumba jha Chapanga, akalonda bhatehila kughegha ikopa yenio kujhenda nayo kwenio, nu kubhujha najho mu chumba chu ulonda.

29 Itendwa yenge yu munahota nkolongwa Leoboamo ijhandikwe Mukitabo cha Kombokela ya Akanahota akakolongwa bhuku Yuda. 30 Machiko ghoha ngapabhila na ngondo pakate jha Yeloboamo pamonga na Leoboamo. 31 Kujhomolela kwa gheniya ghoha, Leoboamo ngajhomwika nu ngabhanchika mu mambe jha akahokomundo ku muche gwa Daude. Na majhemundo akemitwa Naama, kuhumii ku Amone. Abiyamo mwanamundo ngalongwicha chehemo jha tatemundo.