2 Coríntios 2

1 I pee ye juɛmi kaa i be nyɛ ngɔ bae kɛ kɔmɔ yemi kpa ko hu bɔ nɛ pee nɛ nyɛ bua nɛ jɔ nyɛ he. 2 Ejakaa ke i ha we nɛ nyɛ na bua jɔmi ɔ, lɛɛ mɛnɔ ji nɔ nɛ ma ha nɛ ye bua maa jɔ mɔ? Nɔ ko be kaa ja nyɛ, nɛ ke i ha nyɛ ye kɔmɔ ɔ, kɛ nyɛ ma plɛ kɛ ha ye bua maa jɔ kɛɛ? 3 Enɛ ɔ he je nɛ i ngma nyɛ sekpɛ womi ɔ ngɛ ja a nɛ, bɔ nɛ pee nɛ nyɛ dla níhi bɔ nɛ sa loko ma ba; konɛ ke i ba a, níhi nɛ ma ha nɛ ye bua maa jɔ ye he pe kulaa a, mɛ mohu a ko ba wo mi aywilɛho. Ejakaa i ngɛ hemi kɛ yemi kaa nyɛ naa nyɛ bua jɔmi kɛ jee ye bua jɔmi nami mi, nɛ lɔ ɔ he je ɔ, ja i ba nyɛ ngɔ kɛ bua jɔmi loko nyɛ ma na bua jɔmi.

4 Jinɛ i sume kaa ma ngma nyɛ jamɛ a womi ɔ. Se tsui yemi kɛ aywilɛho mi nɛ i je kɛ ngma nyɛ, tsa pi nɛ nyɛɛ ye kɔmɔ he je i, se mohu nɛ nyɛɛ na bɔ nɛ i suɔ nyɛ kɛ bɔ nɛ nyɛ he nɔ́ dɔɔ mi ha.

5,6 Nyɛ kai jamɛatsɛ ɔ nɛ kɛ sane nɛ ɔ kulaa ba a, kaa tsa pi ami nɔ kake nɛ e ha i hao, se e ha nyɛ kulaa nyɛ hao pe mi. I sume nɛ ma kã e hɛ mi fuu, ejakaa nyɛ tsuo nyɛ gbe lɛ zo momo. 7 Jehanɛ ɔ, e sa nɛ nyɛ kɛ pa lɛ nɛ nyɛɛ jɔɔ e bua, ke pi ja a, kɔmɔ yemi fuu ma ha nɛ e be e je mi nya nae. 8 I kpa nyɛ pɛɛ nɛ nyɛ ha nɛ e na kaa nyɛ suɔ lɛ saminya lolo.

Mɛnɔ sa kɛ ha ni tsumi nɛ ɔ?

9 I ngma nyɛ jamɛ a womi ɔ konɛ ma kɛ hyɛ ha kaa nyɛ yeɔ ye gbi nɔ lo. 10 Ke nyɛ kɛ nɔ́ ko pa nɔ ko ɔ, ami hu i kɛ paa nyɛ. Nɛ ke i kɛ nɔ́ ko nɛ kɔɔ ye he pa nɔ ko ɔ, i kɛ pa lɛ ngɛ Kristo he wami nya kɛ nyɛ kpakpa nami he je; 11 konɛ Abosiami nɛ ko ye wa nɔ, ejakaa wa le e blɔ nya tomi ɔmɛ.

12 Benɛ i ya su Troa ma a mi ɔ, Nutsɔ ɔ ha mi he blɔ nɛ i jaje Manye Munyu ɔ ngɔ tsɔɔ. 13 Se ye bua jɔɛ ye he, ejakaa i kɛ ye suɔlɔ Tito ya kpi ngɛ lejɛ ɔ, nɛ i li nɔ́ nɛ ba e nɔ hulɔ. Lɔ ɔ he je ɔ, i kɛ mɛ ye sɛ nɛ i pue nɔ kɛ ho Makedonia ya kaa i ma ya na lɛ ngɛ lejɛ ɔ lo.

14 Se sina ha Mawu, ejakaa kɛ gu nɔ́ nɛ Kristo tsu ɔ nɔ ɔ, e haa wa yeɔ kunimi, nɛ wa jajeɔ Nutsɔ ɔ Manye Munyu ɔ ngɔ tsɔɔ ngɛ he fɛɛ he nɛ a nyaa he. 15 Mawu ha nɛ Kristo he via liliili ngɛ wa mi. E ji he via nɛ bɔle wɔ kɛ ha nihi nɛ a he a yi wami kɛ nihi nɛ a he we a yi wami tsuo. 16 Wa he jee gbenɔ he via kɛ haa nihi nɛ a be a yi wami hee ɔ. Nɛ wa he jee wami he via kɛ haa nihi nɛ le Kristo ɔ. Se mɛnɔ nɛ sa ha ni tsumi nɛ ɔ? 17 Wa be kaa nihi nɛ juaa Mawu Munyu ɔ, se mohu nihi nɛ Mawu tsɔ mɛ nɛ a ngɛ juɛmi. Nɛ wa tuɔ munyu kɛ Kristo he wami ngɛ suɔmi kɛ anɔkuale yemi ngɛ Mawu hɛ mi kaa Kristo sɔmɔli.