1 Nɛ e tsɔɔ mi pa ko nɛ Wami Nyu nɛ mi tsɔ keikei ngɛ bee ngɛ mi kɛ je Mawu kɛ Tobi ɔ matsɛ sɛ ɔ mi 2 kɛ ngɛ ma gbɛjegbɛ ɔ kpɛti gue. Wami tsohi maa si ngɛ pa a kasa hiɛ kɛ hiɛ, nɛ e woɔ yiblii si nyɔngma kɛ enyɔ daa jeha, si kake daa hlami; nɛ a ngɔɔ e ba amɛ kɛ peeɔ tsopa kɛ tsaa nɔ.

3 Nɔ́ yobu ko be ma a mi hie, ejakaa Mawu kɛ Tobi ɔ matsɛ sɛ ɔ maa hi lejɛ ɔ, nɛ e sɔmɔli ɔmɛ ma ja lɛ. 4 A maa na e hɛ mi; nɛ a maa ngma e biɛ ngɛ a hɛ nya. 5 Diblii be woe ngɛ lejɛ ɔ, nɛ kane loo pu he be hiae, ejakaa Nutsɔ Mawu ɔ maa pee a kane, nɛ a maa ye matsɛ kɛ ya neneene.

6 Kɛkɛ nɛ bɔfo ɔ de mi ke, "Anɔkuale munyuhi ji enɛ ɔmɛ nɛ, e sa nɛ a he nɛ a ye. Nɛ Nutsɔ Mawu ɔ, nɔ nɛ deɔ e gbali ɔmɛ nihi nɛ maa ba a, tsɔ e bɔfo ɔ nɛ e ba tsɔɔ e sɔmɔli ɔmɛ níhi nɛ maa ba ngɛ be kpiti mi ɔ."

7 Nɛ Yesu de ke, "Nyɛɛ bu tue! I ma nɔuu. A jɔɔ nihi kulaa nɛ ma he gbami munyu nɛ ɔmɛ ngɛ womi nɛ ɔ mi ɔ maa ye ɔ."

8 Ami Yohane, i na, nɛ i nu nɔ́ nɛ ɔmɛ kulaa, nɛ i kpla si nɛ ma ja bɔfo ɔ nɛ tsɔɔ mi mɛ ɔ. 9 Se e kpale nɛ e de mi ekohu ke, "Dabi, koo pee nɔ ko kaa ja. Ami hu Yesu sɔmɔlɔ ji mi kaa mo kɛ o nyɛmimɛ gbali ɔmɛ, kɛ nihi kulaa nɛ buɔ anɔkuale ɔ nɛ a ngma ngɛ womi nɛ ɔ mi tue ɔ. Mo ja Mawu pɛ."

10 Jehanɛ ɔ, e de mi ke, "Koo sɔu womi nɛ ɔ mi gbami munyu ɔmɛ a nya, ejakaa be ɔ nɛ enɛ ɔmɛ kulaa maa ba mi ɔ su ta. 11 Nɔ nɛ ngɛ yayami pee ɔ, e ya nɔ nɛ e pee yayami ɔ, nɛ mutsɛ e ya nɔ nɛ e tsu e mu ni ɔmɛ, nɛ kpakpa peelɔ e pee e kpakpa a, nɛ nɔ nɛ ngɛ klɔuklɔu ɔ, e ya nɔ nɛ e hi klɔuklɔu."

12 "Hyɛ, i ma nɔuu, nɛ i hɛɛ ye hiɔwo ɔ. I ma wo nɔ tsuaa nɔ hiɔ ngɛ e ni tsumi ɔmɛ a he. 13 Ami ji A kɛ Z, Sisije kɛ Nyagbe ɔ, Kekle kɛ Sekpɛ ɔ. 14 A jɔɔ nihi kulaa nɛ ngɛ a tade ɔmɛ a he fɔe konɛ a na he blɔ kɛ gu agbo ɔ nya kɛ sɛ ma a mi nɛ a ye Wami Tso ɔ nɔ yiblii ɔ eko ɔ.

15 Nɛ nihi nɛ ngɛ ma a se ji, nihi nɛ tla blɔ kɛ je Mawu he, nyuali ɔmɛ, ajuama bɔli kɛ nɔ gbeli; amaga jali kɛ nɔ tsuaa nɔ nɛ suɔ lakpa yemi nɛ e peeɔ ja a. 16 Ami Yesu, i tsɔ ye bɔfo ɔ kɛ ba nyɛ ngɔ konɛ e ba de asafo ɔmɛ ní nɛ ɔmɛ kulaa. David sipoku kɛ e bibimibi ji mi. Ami ji Nɔkɔ nɛ ngɛ kpɛe ɔ nɛ." 17 Nɛ Mumi ɔ kɛ Ayɛflo ɔ de ke, "Ba". Nɔ fɛɛ nɔ nɛ kuma ngɛ lɛ yee ɔ e ba. Nɔ tsuaa nɔ nɛ suɔ kaa e maa ba a, e ba nɛ e ba nu Wami Nyu ɔ eko yaka gu. 18 Nɛ i ngɛ nɔ fɛɛ nɔ nɛ maa kane womi nɛ ɔ kɔkɔ bɔe ke, ke nɔ ko ngɔ nɔ́ ko ke piɛ nɔ́ nɛ a ngma ngɛ hiɛ ɔ he ɔ, Mawu maa ngɔ ajahi nɛ a tsɔɔ ngɛ womi nɛ ɔ mi ɔ kɛ piɛ he ha lɛ. 19 Nɛ ke nɔ ko je nɔ́ ko kɛ je gbami munyu ɔmɛ nɛ ngɛ womi nɛ ɔ mi ɔ mi ɔ, Mawu ma kpɔ e blɔ nya nɛ e ngɛ ngɛ Wami Tso ɔ mi kɛ Ma Klɔuklɔu ɔ nɛ a je kɛ tsɔɔ ɔ mi ɔ ngɛ e dɛ.

20 "Nɔ nɛ de ní nɛ ɔmɛ kulaa a ngɛ dee faii ke, Ee, i ma nɔuu!" Amen! Nutsɔ Yesu, ba!

21 Wa Nutsɔ Yesu Kristo dloomi ɔ nɛ kɛ nyɛ tsuo nɛ hi si. Amen!