1 Yuda bi ɔmɛ a Osɔfo Nɔkɔtɔma a ji nɔmlɔ kaa bɔ nɛ nɔ tsuaa nɔ ngɛ ɔ; se a hla lɛ konɛ e da nimli kulaa a nya ngɛ a kɛ Mawu a sanehi a mi. E ngɔɔ a nike ni ɔmɛ kɛ haa Mawu, nɛ e kɛ lohwehi a muɔ saa bɔ kɛ haa lɛ ngɛ nimli ɔmɛ a he yayami kɛ lɛ nitsɛ e he yayami ɔ he. 2 Akɛnɛ lɛ hu nɔmlɔ adesa ji lɛ he je ɔ, e naa tsui si tomi kɛ haa a gbɔjɔmi kɛ a tɔmi ɔmɛ, ejakaa lɛ nitsɛ hu e naa jamɛ a kami ɔmɛ nɔuu. 3 Nɛ kaa lɛ nitsɛ hu yayami peelɔ ji lɛ he je ɔ, e sa nɛ e sã bɔ, pi kɛ ha ni ɔmɛ kɛkɛ a he yayami, se lɛ nitsɛ hulɔ.

4 Nɔ kake nɛ e sa nɛ a kai ji kaa nɔ ko be nyɛe nɛ lɛ nitsɛ e maa pee e he Osɔfo Nɔkɔtɔma. E sa nɛ Mawu nɛ tsɛ lɛ kɛ ha ni tsumi nɛ ɔ kaa bɔ nɛ e tsɛ Aaron ɔ.

5 Lɔ ɔ he je nɛ Kristo nitsɛ wui e he Osɔfo Nɔkɔtɔma a nɛ; dabi, Mawu nɛ hla lɛ, nɛ e de lɛ ke, "Ye Bi ji mo, mwɔnɛ nɛ ɔ i wo o hɛ mi nyami." 6 Be kpa ko hu Mawu de lɛ ke, "I hla mo nɛ o ye osɔfo kɛ ya neneene, nɛ o maa hɛɛ blɔ nya nɛ Melkizedek hɛɛ ɔ pɛpɛɛpɛ."

7 Benɛ Kristo ngɛ je ɔ mi ɔ, e sɔle kɛ e hɛ mi vo nyu nɛ e susuma hao, nɛ e kpa Mawu, nɔ nɛ pɛ nɛ ma nyɛ kpɔ lɛ kɛ je gbenɔ dɛ mi ɔ pɛɛ. Nɛ e Mawu tue bumi he je ɔ, a nu e sɔlemi ɔ.

8 E ngɛ mi kaa Mawu Bi ji Yesu lɛɛ, se e gu nɔ́ nami nɔ kɛ kase tue bumi. 9 Nɛ benɛ Yesu, kɛ gu e nɔ́ nami ɔmɛ a mi ɔ e hi kɛ pi si ɔ, e ba plɛ nɔ nɛ mi nɛ neneene yi wami nami jee kɛ haa nɔ tsuaa nɔ nɛ buɔ lɛ tue ɔ. 10 Nɛ nyɛ kai kaa Mawu pee lɛ Osɔfo Nɔkɔtɔma nɛ hɛɛ blɔ nya nɛ kɛ Melkizedek nɔ́ ɔ sɔ.

11 Nɛ enɛ ɔ he munyu fuu ngɛ nɛ wa ma nyɛ maa tu kɛ tsɔɔ nya; se e nya tsɔɔmi ɔ maa wa, ejakaa nyɛ nɔ sisi numi ngɛ yee.

12 Nyɛ plɛ Kristo se nyɛɛli pi mwɔnɛ ɔ, nɛ jinɛ be nɛ ɔ mi ɔ, e sa kaa nyɛɛ hi ni kpahi ní tsɔɔe, se mohu nyɛ ba se kulaa bɔ nɛ e sa kaa nyɛ na nɔ ko nɛ e bɔni nyɛ Mawu munyu ɔ nɛ a tsɔɔ nyɛ kɛ je sisije ɔ tsɔɔmi ekohu. Nyɛ ngɛ kaa bimwɔwi nɛ nyɔ nyu nɛ e sa nɛ nyɛɛ nu se pi niye ni nɛ he wa. 13 Ejakaa nɔ tsuaa nɔ nɛ ngɛ nyɔ nya lolo ɔ, e tsɔɔ kaa e sui he ko kulaa ngɛ Kristo jami ɔ mi, nɛ lɔ ɔ he je ɔ, e li slɔɔto tsɔ ko nɛ ngɛ kpakpa kɛ yayami kpɛti. 14 Nyɛ be nyɛe maa ye mumi mi niye ni nɛ he wa a, nɛ nyɛ maa nu Mawu Munyu ɔ mi níhi nɛ mi kuɔ ɔmɛ a sisi kɛ ya si be mi nɛ nyɛ maa pee Kristo se nyɛɛli kpakpahi nɛ nyɛ maa le slɔɔto nɛ ngɛ kpakpa kɛ yayami kpɛti nɛ nyɛ maa di kpakpa peemi se.