1 Nɔ́ nɛ wa ngɛ dee ɔ ji: Kristo nɛ wa tu e osɔfo yemi he munyu piɔ ɔ ji wa Osɔfo Nɔkɔtɔma, nɛ e hii si ngɛ anunyami nɛ pe kulaa ngwɔ he ngɛ Mawu nitsɛ kasa nya ngɛ hiɔwe. 2 Nɛ e ngɛ sɔmɔe ngɛ sɔlemi we ɔ, anɔkua sɔlemi he nɛ tsa pi nɔmlɔ nɛ ma, se Nutsɔ ɔ nitsɛ nɛ e ma.

3 Akɛnɛ osɔfo tsuaa Osɔfo Nɔkɔtɔma a, a hla lɛ nɛ e wo nike ni kɛ ba nɛ e sã bɔ he je ɔ, e he hia kaa Kristo hu e sã bɔ. 4 Nɛ bɔ nɛ lɛɛ e sa a, e hi kulaa pe bɔ nɛ zugba nɛ ɔ nɔ osɔfo ɔmɛ saa a. Nɛ kaa e ngɛ zugba nɛ ɔ nɔ tete po ɔ, a be lɛ he blɔ hae nɛ e ye osɔfo, ejakaa je nɛ ɔ mi osɔfo ɔmɛ saa bɔ ngɛ Yuda bi ɔmɛ a blɔ nya tomi ɔmɛ a nɔ kɛ sa. 5 Mɛɛ lɛɛ hiɔwe sɔlemi we ɔ e nini ji nɔ́ nɛ mi nɛ a ngɛ sɔmɔe ngɛ ɔ nɛ. Ejakaa benɛ Mose maa ma bo tsu ɔ, Mawu de lɛ ke e hyɛ nɛ e pee nɔ́ tsuaa nɔ kaa hiɔwe sɔlemi we ɔ, nɛ a je kɛ tsɔɔ lɛ ngɛ Sinai Yoku ɔ nɔ ɔ. 6 Se amlɔ nɛ ɔ, a wo Kristo osɔfo ngɛ hiɔwe nɛ a ha lɛ blɔ nya nɛ hi hluu pe sɔmɔmi nɛ nihi sɔmɔ ngɛ somi momo ɔ sisi ɔ, ejakaa somi he ɔ nɛ e ngɔ kɛ ha wɔ kɛ je Mawu ngɔ ɔ hɛɛ si womihi nɛ hi pe kekle nɔ́ ɔ.

7 Somi momo ɔ tsu we ni tete po. Ejakaa kaa e tsu ni ɔ, jinɛ ekpa he ko hia we hu nɛ a ma kɛ to e nane mi. 8 Mawu nitsɛ na e nimli ɔmɛ a tɔmi ɔmɛ, nɛ lɔ ɔ he je nɛ e de ke, "Be ma nɛ i kɛ Israel we ɔ kɛ Yuda we ɔ maa so somi he. 9 Enɛ ɔ be hie kaa somi nɛ i kɛ a tsɛ ɔmɛ so be mi nɛ i nu a nine si nɛ i kpaka mɛ kɛ je Mizraim ɔ. Se mɛɛ a yi somi ɔ he nɛ kɔ a he ɔ nɔ, nɛ lɔ ɔ he je ɔ i po mi. 10 Nɛ Nutsɔ ɔ de ke, somi he ɔ nɛ i kɛ Israel we ɔ maa so ɔ ji enɛ ɔ nɛ: I ma ngma ye mlaa amɛ kɛ wo a juɛmi mi konɛ a le nɔ́ nɛ i ngɛ hlae nɛ a pee, nɛ ma ko de mɛ hu. Nɛ mlaa nɛ ɔmɛ maa hi a tsui mi bɔ nɛ pee nɛ a ye nɔ, nɛ i ma pee a Mawu, nɛ a maa pee ye nimli. 11 Nɛ e be hiae kaa a tsɔɔ a si bi loo a huɛmɛ loo a nyɛmimɛ nɛ a de ke, ‘Mo hu moo le Nutsɔ ɔ,’ ejakaa nɔ tsuaa nɔ, nɔkɔtɔma jio, jokuɛ jio, mɛ tsuo a le mi momo. 12 Nɛ i ma na mɛ mɔbɔ ngɛ a tɔmi ɔmɛ a he, nɛ i be a yayami ɔmɛ kaie hu."

13 Mawu tu si womi he nɛ ɔ kɛ somi he ɔ he munyu kaa nɔ́ nɛ e kɛ to momo ɔ nane mi, ejakaa momo ɔ e be be, nɛ e ngmɛɛ he.