1 Benɛ e piɛ ligbi ekpa nɛ a maa ye Hebemi Ligbi ɔ, Yesu ba Betania he nɛ e tle Lazaro si kɛ je gbeje ngɛ ɔ. 2 A ngmɛ Yesu okplɔɔ ngɛ lejɛ ɔ nɛ Marta sɔmɔ lɛ, nɛ Lazaro hu piɛ a he ngɛ okplɔɔ ɔ he. 3 Kɛkɛ nɛ Maria wo nu je via tɔ kake nɛ he jua wa saminya kɛ kpa Yesu nanehi a he nɛ e kɛ e yi bwɔmi tsu, nɛ nu ɔ he via a kpe we ɔ mi tsuo.

4 Se Yuda Iskariot nɛ ji e kaseli ɔmɛ a ti nɔ kake nɛ maa tsɔɔ Yesu se blɔ ɔ de ke, 5 "Nu je via nɛ ɔ he jua wa, nɛ e sa nɛ a jua lɛ nɛ a ngɔ sika a kɛ ha ohiafo ɔmɛ." 6 Se tsa pi ohiafo ɔmɛ a he nɔ́ nɛ ngɛ lɛ dɔe, se lɛ ji kaseli ɔmɛ a sika tolɔ nɛ e juɔ sika nɛ a kɛ ha lɛ si tomi ɔ eko.

7 Nɛ Yesu de lɛ ke, "Moo ngmɛɛ e he, e pee enɛ ɔ kɛ to ye pumi ligbi ɔ. 8 Nyɛ ma nyɛ ye kɛ bua ohiafo ɔmɛ daa, se ami lɛɛ pi daa nɛ i kɛ nyɛ maa hi si."

9 Benɛ Yerusalem bi ɔmɛ nu kaa Yesu ba lejɛ ɔ, a ba nɛ a ba hyɛ e kɛ Lazaro, nɔ nɛ e tle si kɛ je gbeje ɔ. 10 Nɛ osɔfo nikɔtɔma amɛ pee a juɛmi kaa a maa gbe Lazaro hu kɛ piɛ e he, 11 ejakaa e he je nɛ Yuda nikɔtɔma amɛ a ti nihi fuu he Yesu nɔ ye kaa lɛ ji a Mesia a nɛ.

12 E nɔ jena a, a nu ngɛ Yerusalem he tsuaa he kaa Yesu ma. Nɛ nihi fuu nɛ ba Hebemi ɔ yemi hyɛmi ɔ, 13 ku ta bahi kɛ ya kpee lɛ ngɛ blɔ ɔ nɔ nɛ a kpa ngmlaa nɛ a de ke, "Hosiana, Mawu nɛ gbaa Israel Matsɛ ɔ. A gbaa Mawu tsɔlɔ ɔ nɛ ma a!"

14 Nɛ Yesu kuɔ teji bi kaa bɔ nɛ a gba a ke, 15 "Koo ye gbeye Israel, ejakaa o matsɛ ɔ ma o ngɔ kɛ he si bami, nɛ e hi teji bi nɔ."

16 Se e kaseli ɔmɛ nui ni nɛ ɔmɛ a sisi jamɛ a be ɔ mi kaa si ko nɛ a wo ɔ nɛ ngɛ mi bae. Se benɛ Yesu kpale kɛ ho hiɔwe ya ngɛ e anunyami ɔ mi loko a kai kaa a de níhi fuu ngɛ Ngmami ɔ mi ngɛ e he, nɛ a ba mi, nɛ a na kɛ a hɛ ngmɛ.

17 Jehanɛ ɔ nihi nɛ ngɛ lejɛ ɔ benɛ Yesu tle Lazaro si kɛ je gbeje ɔ ye he odase kɛ tsɔɔ ni kpa amɛ. 18 Enɛ ɔ he je nɛ nihi fuu ya kpee lɛ ngɛ, ejakaa a nu nyakpɛ nɔ́ agbo nɛ ɔ nɛ e tsu ɔ he.

19 Kɛkɛ nɛ Farisi bi ɔmɛ de a he ke, "Wa pee ta; nyɛ nɛ je ɔ tsuo ngɛ e se nyɛɛe!"

20 Hela bi komɛ nɛ ba Yerusalem ngɛ Hebemi ɔ yemi ɔ he ɔ, 21 ya Filipo nɛ je Galilea ma ko nɛ a tsɛɛ ke Betsaida a ngɔ, nɛ a ya de lɛ ke, "Mawetsɛ, wa maa suɔ nɛ waa na Yesu." 22 Nɛ Filipo ya de Andrea, nɛ mɛ ni enyɔ ɔmɛ a ya de Yesu.

23 Se Yesu de mɛ ke, "Be nɛ Nɔmlɔ Bi ɔ maa kpale kɛ ho hiɔwe ya ngɛ e anunyami ɔ mi su. 24 Nɛ ja i nɔ si nɛ i gbo kaa blɛfo ngu sɛɛ zu mi loko e woɔ yiblii ɔ. Ke i gbo we ɔ, i be yiblii woe. 25 Nɔ nɛ dii e wami se ngɛ je nɛ ɔ mi ɔ, e maa laa lɛ, se nɔ nɛ di we se ɔ, e ma na neneene wami kɛ to nane mi.

26 Ke ji Hela bi ɔmɛ suɔ nɛ a pee ye kaseli ɔ, nyɛ de mɛ nɛ a ba nyɛɛ ye se, ejakaa he nɛ i ngɛ ɔ lejɛ ɔ nɔuu nɛ ye sɔmɔli hu maa hi. Nɛ Tsɛ ɔ maa wo a hɛ mi nyami ke a ba nyɛɛ ye se. 27 Ye klaa ngɛ haoe saminya amlɔ nɛ ɔ. Anɛ e sa kaa ma sɔle nɛ ma de ke, ‘Tsaatsɛ, mo je mi kɛ je haomi nɛ ma ngɛ ye hɛ mi nɛ ɔ mi?’ Se kɛ ɔ, lɔ ɔ nɔuu he nɛ i ba ngɛ. 28 Tsaatsɛ, moo wo o biɛ ɔ hɛ mi nyami."

Kɛkɛ nɛ gbi ko de kɛ je hiɔwe ke, "I wo e hɛ mi nyami momo, nɛ ma wo e hɛ mi nyami ekohu." 29 Benɛ nihi nɛ ngɛ lejɛ ɔ nu gbi nɛ ɔ, a ti ni komɛ de ke Mawu bɔfo nɛ e kɛ lɛ tu munyu. 30 Se Yesu de mɛ ke, "Tsa pi ye he nɛ gbi ɔ pɛ ngɛ, se nyɛ he i. 31 Be nɛ a kɛ maa kojo je ɔ su, nɛ a ma sake Abosiami nɛ ji je nɛ ɔ matsɛ bi ɔ ngɔ fɔ he. 32 Nɛ ke a wo ye nɔ kɛ je zugba a nɔ ɔ, i ma gbla nɔ tsuaa nɔ kɛ ba ye ngɔ." 33 Yesu tu munyu nɛ ɔ kɛ tsɔɔ gbenɔ nɛ e ma gbo ɔ.

34 Asafo ɔ bi ke, "Gbenɔ he munyu nɛ o ngɛ tue ɔ? Wɔɔ lɛɛ wa le kaa Mesia a be gboe gbleegbleegblee. Mɛni he je nɛ o ngɛ wɔ dee ke e ma gbo ɔ? Mesia te nɔ nɛ o ngɛ tsɔɔe nɛɛ?" 35 Yesu ha mɛ heto ke, "Be bɔɔ pɛ nɛ piɛ nɛ ye la a maa tso ha nyɛ. Be abɔ nɛ la a ngɛ tsoe nɛ ɔ, nyɛɛ nyɛɛ ngɛ la a nya kɛ ya he fɛɛ he nɛ nyɛ ngɛ hlae loko diblii ɔ nɛ ba wo. Ejakaa nɔ nɛ nyɛɛ ngɛ diblii mi ɔ, e laa blɔ. 36 Nyɛ tsu la a he ni ngɛ be nɛ ɔ mi nɛ nyɛ maa pee la bimɛ." Benɛ Yesu gbe munyu nɛ ɔmɛ a nya a, e je lejɛ ɔ nɛ e ya laa e he.

37 Nɛ ngɛ nyakpɛ níhi slɔɔtohi nɛ e pee ɔ se ɔ, nihi he we lɛ yi lolo kaa lɛ ji Mesia a. 38 Enɛ ɔ ba mi kaa bɔ nɛ Gbalɔ Yesaia de ɔ ke, "Nutsɔ, mɛnɔ ma he wɔ maa ye? Nɛ mɛnɔ maa ngɔ Mawu nyakpɛ okadi ɔmɛ kaa anɔkuale nihi?" 39 A he we yi, ejakaa Yesaia de ekohu ke, 40 "Mawu ha nɛ a hɛ yu, nɛ e ha mɛ tɛ tsui bɔ nɛ pee nɛ a ko hyɛ nɔ, nɛ a ko nu nɔ́ hulɔ, nɛ a ko ba ye ngɔ nɛ ma tsa mɛ." 41 Yesu he nɛ Yesaia tu munyu nɛ ɔ ngɛ, ejakaa a je Mesia a anunyami kpo kɛ tsɔɔ lɛ ngɛ ni nami mi.

42 Yuda nikɔtɔma amɛ a ti nihi fuu he Yesu nɔ ye kaa lɛ ji Mesia a, se a je we a he si, ejakaa a ngɛ gbeye yee kaa Farisi bi ɔmɛ maa fie mɛ kɛ je kpe he ɔ. 43 Nɛ a suɔ nɛ a sa nimli a hɛ mi pe Mawu.

44 Se Yesu de asafo ɔ kɛ ngmlaa ke, "Nɔ nɛ heɔ mi yeɔ ɔ, pi ami nɛ e heɔ yeɔ, se Mawu i. 45 Ejakaa nɔ nɛ na mi ɔ, Mawu, nɔ nɛ tsɔ mi ɔ nɛ e ngɛ hyɛe ɔ nɛ. 46 I ba kaa La nɛ ma ba tso kɛ ha diblii je ɔ, bɔ nɛ pee nɛ nɔ tsuaa nɔ nɛ heɔ ye nɔ yeɔ ɔ, e ko nyɛɛ ngɛ diblii mi hu . 47 Nɛ ke nɔ ko nu ye munyu ɔ se e bui tue ɔ, tsa pi ami nɛ ma kojo lɛ ejakaa i bɛ ngɛ je ɔ kojomi he, se mohu e yi wami hemi he nɛ i ba ngɛ. 48 Se nɔ tsuaa nɔ nɛ kua mi kɛ ye munyu ɔ, a maa kojo lɛ ngɛ nyagbe Kojomi Ligbi ɔ nɔ ngɛ anɔkuale munyuhi nɛ i tu ɔ he. 49 Ejakaa pi ami nitsɛ ye juɛmi nya níhi, se i de nyɛ níhi nɛ Tsɛ nɛ tsɔ mi ɔ ke ma ba de nyɛ. 50 Nɛ i le kaa e munyu ɔmɛ kpakaa nɔ kɛ yaa neneene wami mi; nɛ lɔ ɔ he je ɔ, nɔ́ tsuaa nɔ nɛ e kɛ wo ye nya ke ma de ɔ, i deɔ."