1 Yesu na le jamɛ a ligbi gbɔkuɛ ɔ nɛ a maa je Hebemi yemi ɔ sisi ɔ kaa e nyagbe ligbi ngɛ zugba a nɔ ɔ su, nɛ e maa kpale kɛ ho e Tsɛ ɔ ngɔ ya. 2 Lɔ ɔ he je ɔ benɛ a ngɛ gbɔkuɛ ni yee ɔ, Abosiami sɛ Yuda Iskariot nɛ ji Simon bi ɔ mi momo kaa e tsɔɔ Yesu se blɔ jamɛ a gbɔkuɛ ɔ. 3 Yesu le kaa Mawu to nɔ́ tsuaa nɔ kɛ wo e dɛ; nɛ e le kaa e je Mawu ngɔ nɛ e maa kpale kɛ ho Mawu ngɔ ya. Nɛ e suɔ e kaseli ɔmɛ saminya. 4 Kɛkɛ nɛ e te si ngɛ niye ni ɔ sisi nɛ e je e tade ɔmɛ ngɔ fɔ si, nɛ e ngɔ papahu kɛ muɔ e mlɛ mi. 5 E po nyu kɛ wo goga mi nɛ e kɛ fɔ e kaseli ɔmɛ a nanehi a he, nɛ e ngɔ papahu ɔ kɛ tsu a he. 6 Benɛ e su Simon Petro nɔ ɔ, Petro de lɛ ke, "Nutsɔ, e sɛ kaa o fɔɔ wa nanehi a he." 7 Yesu de lɛ ke, "O li nɔ́ nɛ i ngɛ pee amlɔ nɛ ɔ, se ke pee se ɔ o maa le." 8 Petro he nɔ nɛ e de lɛ ke, "Dabi! Mo ko fɔ ye nane he kɔkɔɔkɔ." Nɛ Yesu de lɛ ke, "Ke i fɔ we o nane he ɔ, o be blɔ nya ko ngɛ ye ngɔ." 9 Jehanɛ ɔ Petro hia ngmlaa ke, "Ke ja a, lɛɛ mo fɔ ye nine kɛ ye yi he kɛ piɛ ye nane ɔ he mɔ." 10 Se Yesu de lɛ ke, "Nɔ nɛ du e he ɔ, e hia we e he fɔmi hu, ja e nane he kɛkɛ, konɛ e he nɛ je kɛ pi si. Amlɔ nɛ ɔ, nyɛ he je momo, se pi nyɛ tsuo." 11 Yesu de enɛ ɔ, ejakaa e le nɔ nɛ maa tsɔɔ e se blɔ. Lɔ ɔ he je nɛ e de ke, "Tsa pi nyɛ kulaa nɛ nyɛ he je ɔ nɛ." 12 Benɛ Yesu gbe a nanehi a he fɔmi ɔ nya a, e wo e tade ɔmɛ ekohu nɛ e ho hi si nɛ e bi mɛ ke, "Anɛ nyɛ nu nɔ́ nɛ i pee ha nyɛ nɛ ɔ sisi lo? 13 Nyɛ tsɛɔ mi ke, ‘Nutsɔ’, kɛ ‘Tsɔɔlɔ’, nɛ e ji anɔkuale. 14 Nɛ si abɔ nɛ ami, Nutsɔ kɛ Tsɔɔlɔ ɔ fɔ nyɛ nanehi a he ɔ, e sa kaa nyɛ hu nyɛ fɔ nyɛ si bi a nane he ha mɛ. 15 Enɛ ɔ ji okadi ko nɛ i to nyɛ konɛ nyɛ hu nyɛɛ pee ja a nɔuu. 16 I ngɛ nyɛ dee anɔkuale mi ke sɔmɔlɔ pa we e nutsɔ, nɛ tsɔlɔ hu pa we nɔ nɛ tsɔ lɛ ɔ. 17 Ke nyɛ le ní nɛ ɔmɛ nɛ nyɛ ye nɔ ɔ, a maa jɔɔ nyɛ.

18 Tsa pi nyɛ tsuo nɛ i ngɛ ní nɛ ɔmɛ dee, ejakaa i le nyɛ ti nɔ tsuaa nɔ nɛ i hla a; se mohu bɔ nɛ pee nɛ nɔ́ nɛ Ngmami ɔ de ke, ‘Nɔ nɛ kɛ mi ngɛ ni yee ɔ ji nɔ nɛ maa tsɔɔ ye se blɔ’ ɔ nɛ ba mi. Nɛ e be kɛe nɛ enɛ ɔ maa ba mi. 19 I ngɛ nyɛ enɛ ɔmɛ dee konɛ ke a ba mi ɔ, nɛ nyɛ he ye nɔ nɛ nyɛɛ ye.

20 Anɔkuale munyu nɛ i ngɛ nyɛ tue ke, nɔ tsuaa nɔ nɛ ma he ye tsɔlɔ ɔ atuu ɔ, ami nɛ e ngɛ hee ɔ nɛ. Nɛ nɔ nɛ ma he mi atuu ɔ, ye Tsɛ nɛ tsɔ mi ɔ nɛ e ngɛ hee ɔ nɛ."

21 Benɛ Yesu gbe munyu nɛ ɔmɛ a nya a, e bɔni haomi ngɛ mumi mi wawɛɛ nɛ e de e kaseli ɔmɛ ke, "Niinɛ, nyɛ ti nɔ kake maa tsɔɔ ye se blɔ." 22 Enɛ ɔ ha nɛ e kaseli ɔmɛ bɔni a bi a hɛ mi hyɛmi kaa a maa na a ti nɔ nɛ he munyu nɛ e ngɛ tue ɔ lo. 23 Kaseli ɔmɛ a ti no kake nɛ Yesu suɔ saminya a hii si ngɛ e kasa mi tutuutu. 24 Kɛkɛ nɛ Simon Petro ma lɛ hɛ ngmɛ kaa e bi lɛ a ti nɔ nɛ he munyu nɛ e ngɛ tue ɔ. 25 Nɛ kaselɔ nɛ ɔ plɛ e he nɛ e bi Yesu ke, "Nutsɔ, mɛnɔ i?" 26 Yesu he nɔ ke, "Lɛ ji nɔ nɛ i ma ngɔ hɛ mi nyami womi abolo ɔ kɛ tsɔ nɔ́ ɔ mi ngɔ ha a nɛ." Nɛ benɛ e kɛ tsɔ mi ɔ, e ngɔ ha Yuda nɛ ji Simon Iskariot bi ɔ. 27 Yuda ye ni ɔ ta pɛ nɛ Abosiami sɛ e mi kɛkɛ nɛ Yesu de lɛ ke, "Moo pee nɔ́ nɛ o ngɛ pee ɔ mla." 28 Se ni kpa amɛ nɛ ngɛ okplɔɔ ɔ he ɔ, a ti nɔ ko li nɔ́ nɛ Yesu ngɛ tsɔɔe ɔ. 29 A ti ni komɛ susu kaa e ngɛ Yuda Iskariot nɛ ji a sika tolɔ ɔ tsɔe nɛ e ya wo niye ni ɔ hiɔ aloo nɛ e ya ke ohiafo ɔmɛ sika. 30 Amlɔ ɔ nɔuu nɛ Yuda je kpo kɛ sɛ diblii ɔ mi. 31 Yuda je tsu ɔ mi pɛ nɛ Yesu de ke, "Ye be ɔ su. E piɛ bɔɔ nɛ Mawu anunyami ɔ maa bɔle mi nɛ a ma je Mawu yi ngɛ níhi nɛ maa ba ye nɔ ɔ he. 32 Nɛ e be kɛe nɛ Mawu kɛ e anunyami ɔ ma ha mi. 33 Bimɛ nɛ i suɔ, be nɛ ɔmɛ a se be kɛe loko i ma si nyɛ. Nyɛ ma hla mi mohu, se kaa bɔ nɛ i de Yuda nikɔtɔma amɛ ɔ, he nɛ i yaa a, nyɛ be lejɛ ɔ nyɛe maa ba.

34 Nɛ lɔ ɔ he je ɔ, i ngɛ nyɛ kita he woe kaa nyɛɛ suɔ nyɛ he kaa bɔ nɛ i suɔ nyɛ ɔ. 35 Ejakaa ke nyɛ suɔ nyɛ he saminya a, nɛ je ɔ maa na kaa ye kaseli ji nyɛ niinɛ." 36 Simon Petro bi Yesu ke, "Nutsɔ, jije nɛ o yaa?" Yesu he nɔ de lɛ ke, "He nɛ i yaa a o be nyɛe nɛ o kɛ mi maa ya amlɔ nɛ ɔ, se o maa ba hwɔɔ se ko." 37 Nɛ Petro bi lɛ ekohu ke, "Mɛni he je nɛ i be nyɛe yami amlɔ nɛ ɔ? Ejakaa i dla ye he nɛ ma gbo ngɛ o he."

38 Yesu bi lɛ ke, "O ma gbo ngɛ ye he lo? Dabi! I ngɛ mo dee ke hwɔɔ ɔ, kungwɔ be nɔ́ kpae nɛ o ma kua si etɛ ke o li mi."