1 Benɛ Yesu tu munyu nɛ ɔmɛ se ɔ, e hyɛ hiɔwe nɛ e de ke, "Tsaatsɛ, be ɔ su. Moo wo o Bi ɔ hɛ mi nyami konɛ lɛ hu e wo o hɛ mi nyami. 2 Ejakaa o ha lɛ he wami ngɛ adesa fɛɛ adesa nɔ ngɛ zugba a nɔ, konɛ e ha a ti nɔ tsuaa nɔ nɛ o ngɔ ha lɛ ɔ neneene wami. 3 Nɛ neneene wami nɛ a ma na ji kaa a le mo nɔ nɛ ji anɔkuale Mawu kake too ɔ, kɛ Yesu Kristo nɔ nɛ o tsɔ kɛ ba zugba a nɔ ɔ. 4 I wo o hɛ mi nyami ngɛ zugba a nɔ, ejakaa i gbe ni tsumi nɛ o ha mi ɔ nya. 5 Jehanɛ ɔ, Tsaatsɛ, mo je anunyami nɛ i kɛ mo ngɛ loko je ɔ bɔ ade ɔ kpo kɛ wo ye hɛ mi nyami.

6 I de nimli ɔmɛ nɛ o ngɔ ha mi ngɛ je nɛ ɔ mi ɔ o he nɔ́ fɛɛ nɔ. O nihi ji mɛ, nɛ o ngɔ mɛ kɛ ha mi nɛ a bu mo tue. 7 Amlɔ nɛ ɔ, a le kaa nɔ tsuaa nɔ nɛ i ngɛ ɔ, mo o nike ni i. 8 I tsɔɔ mɛ kitahi nɛ o ngɔ ha mi ɔmɛ, nɛ a he mɛ atuu, nɛ a na le paa kaa o ngɔ nɛ i je kɛ ba zugba a nɔ, nɛ a he ye kaa mo nɛ o tsɔ mi.

9 Tsa pi je ɔ nɛ i ngɛ pɛɛ kpae ha, se mohu kɛ ha nihi nɛ o kɛ ha mi ɔ, ejakaa o nihi ji mɛ. 10 Akɛnɛ ye nihi ji mɛ tsuo ɔ, a peeɔ o nihi hulɔ. Nɛ o ngɔ mɛ kɛ nɔ fɛɛ nɔ nɛ o ngɛ ɔ kɛ ha mi konɛ a pee ye hɛ mi nyami. 11 Amlɔ nɛ ɔ, i ngɛ je ɔ mi sie, nɛ i ngɛ mɛ hu sie kɛ ma o ngɔ. Tsaatsɛ Klɔuklɔu, i ngɛ nihi nɛ o ngɔ ha mi ɔmɛ toe kɛ ngɛ o dɛ woe. A pee kake kaa bɔ nɛ wɔ hu wa ngɛ kake ɔ, nɛ a ti nɔ ko nɛ ko laa. 12 Benɛ i kɛ nihi nɛ o ngɔ ha mi ɔ hi si ngɛ je ɔ mi ɔ, i bu a he nɛ a ti nɔ ko laa we, ja hɛ mi kpatami bi ɔ pɛ, konɛ nɔ́ nɛ Ngmami ɔ de ɔ nɛ ba mi.

13 Jehanɛ ɔ, i ma o ngɔ, nɛ i de mɛ níhi fuu be mi nɛ i kɛ mɛ ngɛ ɔ, bɔ nɛ pee nɛ a na bua jɔmi. 14 I ha mɛ o mlaa amɛ nɛ je ɔ ngɛ mɛ nyɛe, ejakaa tsa pi je ɔ mi nɛ a je, kaa bɔ nɛ ami hu i ji je ɔ mi ɔ. 15 I bi we ke o je mɛ kɛ je je ɔ mi, se mohu o bu a he, nɛ o je mɛ kɛ je Abosiami dɛ mi. 16 A pi je ɔ mi bimɛ hu, kaa bɔ nɛ ami hu i pi je ɔ mi no ɔ. 17 Moo tsɔɔ mɛ o anɔkuale munyu ɔ nɛ e ha nɛ a he nɛ tsɔ nɛ a pee klɔuklɔu bimɛ. 18 I ngɛ mɛ tsɔe kɛ yaa je ɔ mi kaa bɔ nɛ o tsɔ mi ɔ. 19 I to ye he klɔuklɔu bɔ nɛ pee nɛ ma tsu a he ni nɛ a wa ngɛ anɔkuale kɛ he tsɔmi mi.

20 Tsa pi mɛ kɛkɛ nɛ i ngɛ sɔlee ngɛ pɛɛ kpae ha, se mohu kɛ ha nihi hu nɛ hwɔɔ se ɔ, a ma he ye munyu ɔ maa ye kɛ gu a odase yemi nɔ ɔ. 21 Ye sɔlemi ji, mɛ tsuo a pee kake ngɛ tsui kɛ juɛmi mi kaa bɔ nɛ mo, Tsaatsɛ, o kɛ mi ngɛ ɔ, nɛ o ngɛ ye mi nɛ ami hu i ngɛ o mi ɔ, konɛ mɛ hu a hi wa mi, bɔ nɛ pee nɛ je ɔ nɛ he ye kaa mo nɛ o tsɔ mi.

22 I ha mɛ anunyami nɛ o ngɔ ha mi ɔ, konɛ a pee kake kaa bɔ nɛ wɔ hu wa ngɛ kake ɔ. 23 I ngɛ a mi, nɛ mo hu o ngɛ ye mi, nɛ wɔ tsuo wa pee kake kɛ pi si, konɛ je ɔ nɛ na kaa mo nɛ o tsɔ mi, nɛ o suɔ mɛ kaa bɔ nɛ o suɔ mi ɔ. 24 Tsaatsɛ, i suɔ nɛ nihi nɛ o ngɔ ha mi ɔ, a hi ye ngɔ bɔ nɛ pee nɛ a na ye anunyami nɛ o ngɔ ha mi ɔ, ejakaa o suɔ mi loko je ɔ bɔ ade.

25 Oo Tsaatsɛ dalɔ, je ɔ li mo se ami lɛɛ i le mo nɛ kaseli nɛ ɔmɛ hu le kaa mo nɛ o tsɔ mi; 26 nɛ i je o he si ngɔ tsɔɔ mɛ, nɛ i ma hi o he si jee kɛ hi mɛ tsɔɔe bɔ nɛ pee nɛ suɔmi nɛ o ngɛ kɛ ha mi ɔ, e hi mɛ hu a mi, nɛ ami hu ma hi a mi."