1 Hɔgba mɔtu mla benɛ je mi tsɔ we lolo ɔ, Maria Magdalena ya he nɛ a to Yesu ngɛ ɔ, nɛ e na kaa a kpɛne tɛ ɔ nɛ a kɛ tsi yɔkɔ ɔ nya a kɛ ya se. 2 Lɔ ɔ he je ɔ, e wo fo kɛ ya bɔ Simon Petro kɛ kaselɔ ɔ nɛ Yesu suɔ ɔ amaniɛ ke, "A ba je Nutsɔ ɔ gbogboe ɔ kɛ je muɔ ɔ mi nɛ i li he nɛ a ngɔ lɛ kɛ ya to."

3 Kɛkɛ nɛ Petro kɛ kaselɔ ɔ hu sa fo kɛ ho muɔ ɔ he ya. 4 Benɛ a yaa a, nɔ kake ɔ sɛ Petro hlami nɛ e ya su muɔ ɔ he. 5 E ba si nɛ e hyɛ muɔ ɔ mi, nɛ e na klala a nɛ a kɛ blaa gbogboe ɔ, se e sɛ we mi. 6 Benɛ Simon Petro ba su muɔ ɔ nya a, e sɛ mi, nɛ lɛ hu e na klala a nɛ fɔɔ si ngɛ lejɛ ɔ. 7 Se nɔ́ nɛ a kɛ fi gbogboe ɔ yi ɔ lɛɛ e fɔɔ si ngɛ he ko banee. 8 Kɛkɛ nɛ kaselɔ ɔ nɛ ya su muɔ ɔ nya kekle ɔ hu sɛ muɔ ɔ mi, nɛ e na, nɛ e he ye. 9 Se jinɛ kɛ ba si jamɛ a be ɔ mi ɔ, a nui nɔ́ nɛ Ngmami ɔ de ɔ sisi kaa e maa te si kɛ je gbeje kɛ ba wami mi ekohu ɔ.

10 Kɛkɛ nɛ kaseli ɔmɛ kpale kɛ ho we mi ya. 11 Se Maria lɛɛ e kpale kɛ ho muɔ ɔ nya ya ekohu nɛ e ya ngɛ ya foe. Nɛ benɛ e ma e yi si nɛ e hyɛ muɔ ɔ mi ekohu ɔ, 12 e na Mawu bɔfohi enyɔ nɛ a wo tade futa nɛ nɔ kake hii si ngɛ yɔkɔ ɔ yi ma je, nɛ nɔ kake hu ngɛ nane si je, he nɛ Yesu gbogboe ɔ hwɔɔ.

13 Nɛ a bi lɛ ke, "Mɛni he je nɛ o ngɛ ya foe?" Nɛ e ha mɛ heto ke, "Ejakaa a ba wo ye Nutsɔ ɔ gbogboe ɔ kɛ je nɛ i li he nɛ a wo lɛ kɛ ya to ngɛ."

14 Se benɛ e plɛ e he ɔ, e na nɔ ko nɛ daa si ngɛ e se. Yesu i, se e yo we lɛ.

15 Kɛkɛ nɛ Yesu bi lɛ ke, "Mɛni ba nɛ o ngɛ ya foe? Mɛnɔ o ngɛ hlae?" Se Maria susu kaa abɔɔ ɔ nɔ hyɛlɔ ɔ ji nɔ nɛ kɛ lɛ ngɛ munyu ɔ tue. Lɔ ɔ he je ɔ, e de lɛ ke, "Mawetsɛ, ke mo nɛ o ba wo lɛ kɛ je hiɛ ɔ, lɛɛ moo tsɔɔ mi he nɛ o kɛ lɛ ya fɔ, nɛ ma ya wo lɛ."

16 Kɛkɛ nɛ Yesu tsɛ lɛ, "Maria!" Nɛ e he nɔ ke, "Tsɔɔlɔ!"

17 Nɛ Yesu de lɛ ke, "Koo ta ye he, ejakaa i na we ma su Tsɛ ɔ ngɔ ngɛ hiɔwe lolo. Se mohu yaa ye nyɛmi ɔmɛ a ngɔ nɛ o ya de mɛ ke, i yaa hiɔwe ngɛ ye Tsɛ kɛ nyɛ hu nyɛ Tsɛ, ye Mawu kɛ nyɛ hu nyɛ Mawu ɔ ngɔ."

18 Maria Magdalena si lejɛ ɔ nɛ e ya de kaseli ɔmɛ ke, "I na Nutsɔ ɔ!" Nɛ e de mɛ sɛ ɔ.

19 Jamɛ a ligbi ɔ gbɔkuɛ ɔ, kaseli ɔmɛ bua a he nya ngɛ tsu ko mi nɛ a nga a yi, ejakaa a ngɛ Yuda nikɔtɔma amɛ gbeye yee. Tlukaa a, Yesu ba da si ngɛ a kpɛti nɛ e nga mɛ, 20 nɛ e wo e nine ɔmɛ kɛ e kasa a ngɔ tsɔɔ mɛ, nɛ a bua jɔ a he kaa a na Nutsɔ ɔ.

21 Nɛ Yesu de mɛ ekohu ke, "I ngɛ nyɛ tsɔe kaa bɔ nɛ Tsɛ ɔ tsɔ mi ɔ." 22 Kɛkɛ nɛ e wo mumi ngɔ pue a nɔ, nɛ e de mɛ ke, "Nyɛ he Mumi Klɔuklɔu ɔ. 23 Ke nyɛ wo nihi a he yayami ngɔ ke mɛ ɔ, a ma ngɔ ke, se ke nyɛ ngɔɛ kɛ ki ɔ, a kɛ be kee."

24 Jamɛ a be ɔ mi ɔ, Toma nɛ ji e kaseli ɔmɛ a ti nɔ kake nɛ a tsɛɛ lɛ ke "Hawi" ɔ, be lejɛ ɔ nɛ Yesu ba a. 25 Ja a he je ɔ, benɛ kaseli nɛ ngɛ lejɛ ɔ de lɛ ke, "Wa na Nutsɔ ɔ," e de mɛ ke, "I he we yi, ja i na e dɛ mi plɛɛko pa amɛ a nya nɛ i slaa mɛ hyɛ nɛ i kɛ ye nine nguɛ hɔ e kasa nya he nɛ a gbɔ ɔ loko ma he ye."

26 Ligbi kpaanyɔ se ɔ kaseli ɔmɛ bua a he nya ekohu ngɛ tsu mi nɛ Toma hu piɛ a he. A nga sinya amɛ, se tlukaa a, Yesu ba je a kpɛti ekohu nɛ e nga mɛ.

27 Kɛkɛ nɛ e de Toma ke, "Mo ba slaa ye dɛ mi ɔ nɛ o ngɔ o nine nguɛ kɛ hɔ ye kasa nya a nɛ o hyɛ konɛ o ko je nɔ hu se mohu o he nɛ o ye."

28 Toma he nɔ nɛ e de Yesu ke, "Ye Nutsɔ kɛ ye Mawu!"

29 Kɛkɛ nɛ Yesu de lɛ ke, "Akɛnɛ o na mi ɔ he je nɛ o he ye nɛ ɔ nɛ. A maa jɔɔ ni nɛmɛ nɛ a nɛ mi se a he ye ɔ."

30,31 Yesu pee nyakpɛ nihi fuu ngɛ kaseli ɔmɛ a hɛ mi se a ngmɛ ngɛ womi nɛ ɔ mi. Nɛ nyakpɛ ni nɛ ɔmɛ lɛɛ a ngma konɛ nyɛ he nɛ nyɛɛ ye kaa lɛ ji Mesia a, Mawu Bi, nɛ ke nyɛ he e nɔ ye ɔ, nyɛ ma na wami.