1 Ligbi ko ɔ, Farisi bi ɔmɛ kɛ mlaa leli komɛ je Yerusalem kɛ ba Yesu ngɔ. 2 A to he hɛ kaa Yesu kaseli ɔmɛ ngɛ Yuda bi ɔmɛ a kusumi ɔ nɔ tɔe, ejakaa a fɔ we a dɛ loko a yeɔ ni. 3 E ji Yuda bi ɔmɛ a kusumi kaa ja Yuda no fɔ e dɛ loko e ngɛ he blɔ nɛ e maa po ni kɛ wo e nya mi. 4 Nɛ be saa be nɛ Yuda no maa je ma loo jua mi kɛ ba we mi ɔ, ja e fɔ e he loko e maa ta niye ni he. Yuda bi ɔmɛ ngɛ kusumi kpa komɛ hu nɛ kɔɔ a ni peemihi a he, nɛ ekomɛ ji kusumi nɛ kɔɔ nyu numi níhi kɛ tsesihi kɛ kahi kɛ buɛhi a he fɔmi he.

5 Enɛ ɔ he je ɔ, Farisi bi ɔmɛ kɛ mlaa leli ɔmɛ bi Yesu ke, "Kɛ e peeɔ kɛɛ nɛ o kaseli ɔmɛ yi blema kusumi ɔmɛ a nɔ nɛ a woɔ a gu ninehi nɛ a fɔ we he ɔ kɛ yeɔ ni kɛɛ?"

6 Yesu ha mɛ heto nɛ e de ke, "Gbalɔ Yesaia tɛ ji enɛ. Ejakaa blema lokoo nɛ a je nyɛ osato peemi nɛ ɔ kpo kɛ tsɔɔ lɛ nɛ e gba ngɛ nyɛ he nɛ e de ke, ‘Yaka tsuaa nɛ ni nɛ ɔmɛ ke a ngɛ mi jae; a nya gu nɛ a kɛ ngɛ dee, ejakaa nɔ nɛ a ngɛ pee ɔ, e ji a tsui mi fɛɛ; a tsui be he. 7 A wo nimli a blɔ nya tomi kɛ nile ngɔ fɔ si nɛ a ngɛ mɛ tsɛe ke Mawu mlaahi.’ 8 Nyɛ si Mawu mlaa amɛ a se nɛ nyɛ pɛtɛ nimli a blɔ nya tomi kɛ nile he wawɛɛ nɛ nyɛ ke nyɛ ngɛ Mawu mlaahi a nɔ yee. 9 Nyɛ kua Mawu mlaa amɛ nɛ nyɛ ngɛ nyɛ nitsɛmɛ nyɛ blema kusumi ɔmɛ a nɔ yee.

10 Mose de nyɛ ke, ‘Moo bu o tsɛ kɛ o nyɛ.’ Nɛ e de nyɛ hu ke, ‘Nɔ tsuaa nɔ nɛ woɔ e nya nɔ ngɛ e tsɛ loo e nyɛ nɔ ɔ, a gbe lɛ.’ 11 Se nyɛɛ lɛɛ nyɛ de ke, nɔ tsuaa nɔ ngɛ he blɔ nɛ e deɔ e tsɛ loo e nyɛ ke, ‘Maa loo Tsaatsɛ, nɔ nɛ jinɛ i ko ha mo ɔ, i wo kɛ ya ha Mawu, lɔ ɔ he je ɔ, i be nyɛe ma ye kɛ bua mo.’ 12 Kɛkɛ ɔ, nyɛ ha we lɛ he blɔ nɛ e hyɛɔ e fɔli hu, aloo nɛ e peeɔ nɔ ko kɛ haa mɛ. 13 Nɛ nyɛ wo nyɛ blema kusumi ɔmɛ kɛ nyɛ nitsɛmɛ nyɛ blɔ nya tomihi kaa enɛ ɔmɛ kɛ ba ye Mawu Munyu ɔ nane mi."

14 Kɛkɛ nɛ Yesu tsɛ ni ɔmɛ kulaa kɛ ba e ngɔ nɛ e de mɛ ke, "Nyɛɛ bu nɔ́ nɛ i ma de nɛ ɔ tue saminya nɛ nyɛɛ nu sisi! 15 Nɔ́ ko be nɛ jee kpo nɔ blɔ kɛ sɛɔ nɔmlɔ mi nɛ e woɔ nɔmlɔ he mu. Se níhi nɛ jee Nɔmlɔ nitsɛ mi ɔmɛ ji níhi nɛ woɔ e he mu. 16 Ke nyɛ ngɛ tue ɔ, nyɛɛ nu nɔ́ nɛ i ngɛ nyɛ dee nɛ ɔ saminya."

17 Pee se benɛ e ba we mi nɛ e piɛ e kɛ e kaseli ɔmɛ pɛ ɔ, e kaseli ɔmɛ bi lɛ abɛ ɔ nɛ e bu ɔ sisi.

18 Nɛ e bi mɛ ke, "Anɛ nyɛ hu nyɛ nui sisi lo? Nyɛ li kaa nɔ́ ko be nɛ sɛɔ nɔ mi kɛ jee kpo nɔ blɔ nɛ e woɔ nɔ ɔ he mu, ejakaa e sɛ we e tsui mi lo? 19 Ke nɔ ko ye nɔ́ ko kɛ gu e nya mi ɔ nɛɛ tsa pi e muklii mi nɛ e ya sɛɔ, nɛ be bɔɔ se ɔ e ya jeɔ ngɔ pueɔ si lo?"

20 E ya nɔ nɛ e de mɛ ke, "Nɔ tsuaa nɔ nɛ jee nɔmlɔ tsui kɛ e susumi mi ɔ woɔ nɔmlɔ he mu. 21 Ejakaa nɔmlɔ tsui kɛ e juɛmi mi nɔ́ susumi kɛ ni yayamihi kulaa jee, níhi kaa gba puɛmi, ajuama bɔmi, nɔ gbemi, 22 jumi, hɛ kɔmi, je mi yaya bami, sisimi, ko bɔmi, ninyɛ, hɛ mi saami, musu bɔmi, he womi, tue kpɛkpɛɛ sane yemi kɛ ni. 23 Ni nɛ ɔmɛ kɛ subai yaya slɔɔto kpa amɛ kulaa a, nɔmlɔ tsui kɛ e susumi mi nɛ a puɛɛ kɛ jee; nɛ mɛ ji nihi nɛ woɔ nɔmlɔ tso ɔ he mu ɔ nɛ."

24 Enɛ ɔ se ɔ, Yesu je lejɛ ɔ kɛ ho Tiro kɛ Zidon ni ɔmɛ a mi ya. E ya sɛ we ko mi nɛ jinɛ e to nɛ e maa laa e he ngɛ lejɛ ɔ bɔɔ nɛ e jɔɔ e he, se e nyɛ we. Ejakaa e he sane gbɛ fia lejɛ ɔ nɔuu nɛ a nu he kaa e ngɛ jamɛ a we ɔ mi.

25 Kɛkɛ nɛ yo ko nɛ mumi yayami ngɛ nɔ́ dee ha e biyo ɔ nu e he nɛ e wo fo kɛ ba kpla si ngɛ e nane nya. 26 Nɛ e ba kpa Yesu pɛɛ ke e hia mumi yayami ɔ ngɛ e biyo ɔ mi. Se yo nɛ ɔ ma je nɔ i, nɛ he nɛ e je ji Fonisia ngɛ Siria zugba a nɔ.

27 Se Yesu de lɛ ke, "Mo ha nɛ ma ye kɛ bua ye wekuli Yuda bi ɔmɛ lolo. Ejakaa e sɛ kaa niye ni nɛ ji bi ɔmɛ a nɔ́ ɔ, a sakee ke fɔɔ he haa gbehi."

28 Nɛ yo ɔ hu ha heto nɛ e de lɛ ke, "Nutsɔ, munyu ngwɔhe nɛ o tu ɔ nɛ; se mohu ji niye ni bibliwi nɛ jee bi ɔmɛ a okplɔɔ nɔ kɛ pueɔ si ɔ, gbe bi ɔmɛ ngɛ okplɔɔ ɔ sisi ɔ hu yeɔ faa."

29 Yesu ha yo ɔ heto nɛ e de lɛ ke, "Ngɛ munyu nɛ o tu nɛ ɔ he je ɔ, moo kpale kɛ ho we mi ya; mumi yayami ɔ je o bi ɔ mi."

30 Niinɛ, benɛ yo ɔ kpale ya su we ɔ mi ɔ, e ya na e biyo ɔ nɛ e hwɔɔ si ngɛ sa nɔ nɛ mumi yayami ɔ je e mi nɛ e hɛ mi tɛ.

31 Yesu kpale kɛ je Tiro kɛ ya gu Zidon kɛ Dekapoli nɔ́ ɔmɛ a mi kɛ ba Galilea Wo ɔ nya. 32 Benɛ e ya su lejɛ ɔ, a wo tue kpokutsɛ ko nɛ mumui hu ji lɛ ɔ kɛ ba e ngɔ nɛ a ba kpa lɛ pɛɛ ke e wo e nine ngɔ fɔ e nɔ nɛ e tsa lɛ.

33 Yesu wo hiɔtsɛ ɔ kɛ ya se bɔɔ nɛ e wo e nine nguɛhi kɛ hɔ e tue puɔhi a mi nɛ e su lada nɛ e ngɔ kɛ sa hiɔtsɛ ɔ lilɛ nɔ. 34 Nɛ e wo e hɛ mi nɔ nɛ e hyɛ hiɔwe, nɛ e hao ngɛ e mumi mi. Kɛkɛ nɛ e nga nɛ e de ke, "Hefata!" E sisi ji, "Mo bli!" 35 Amlɔ ɔ nɔuu ɔ, nyumu ɔ tue bli nɛ e lilɛ hu pine nɛ e tu munyu paa.

36 Kɛkɛ nɛ Yesu wo ni ɔmɛ si veveeve ke a ko de nɛ nɔ ko nɛ nu. Se kpaloko mohu a nya wa he nɛ a fiɛ munyu nɛ ɔ kɛ kpe kpo ɔ mi tsuo. 37 Ejakaa a nya kpɛ a he kɛ be nɔ. Nɛ a de ke, "Nyakpɛ nɔ́ sɔuu e ngɛ tsue! E ha nɛ tue kpokutsɛ ngɛ nɔ nue, nɛ mumuihi hu ngɛ munyu tue."