1 Amlɔ nɛ ɔ, akɛnɛ a gu hemi kɛ yemi nɔ kɛ bu wɔ bemi he je ɔ, he jɔmi ba waa kɛ Mawu kpɛti ngɛ nɔ́ nɛ Yesu Kristo, wa Nutsɔ ɔ, tsu kɛ ha wɔ ɔ he. 2 Ejakaa ngɛ wa hemi kɛ yemi ɔ nya a, wa na he blɔ kɛ gu Yesu nɔ kɛ ba su e dloomi ɔ mi, nɛ wa ngɛ nɔ́ nɛ Mawu to kɛ ha wɔ ɔ blɔ hyɛe kɛ bua jɔmi.

3 Tsa pi enɛ ɔ kɛkɛ, se wa yi gbeye nɛ wa bua jɔɔ wa he ngɛ amanehluhi kɛ kahi a mi tete, ejakaa kikɛmɛ a ni nɛ ɔmɛ haa wa naa tsui si tomi.

4 Nɛ tsui si tomi haa wɔ subai kpakpa nɛ yeɔ kɛ buaa wɔ kɛ ya suu benɛ wa hemi kɛ yemi kɛ he nɔ kami ɔ pii si.

5 Kikɛmɛ a hɛ nɔ kami nɛ ɔ gbi wɔ zo, nɛ ngɛ nɔ́ fɛɛ nɔ mi ɔ, wa yi kɔmɔ. Wa le kaa Mawu suɔ wɔ saminya, nɛ wa nuɔ e suɔmi ɔ he ngɛ wa mi be fɛɛ be, ejakaa e ha wɔ Mumi Klɔuklɔu ɔ, nɔ nɛ ma ha wa tsui mi ma hyi tɔ ke e suɔmi ɔ.

6 Kristo ba gbo kɛ kpɔ wɔ yayami peeli ngɛ be nɛ sa mi, ejakaa wa be hɛ nɔ kami ko jamɛ a be ɔ mi. 7 Wa hɛ be nɔ kaa nɔ ko ma gbo ha wɔ yayami peeli, ejakaa e wa loko a gboɔ ngɛ dalɔ po nane mi. 8 Se Mawu je e suɔmi agbo nɛ e ngɛ ha wɔ ɔ kpo kɛ tsɔɔ wɔ, ejakaa e ha nɛ Kristo ba gbo ngɛ wa nane mi be mi nɛ wa ji yayami peeli. 9 Si abɔ nɛ a bu wɔ yayami peeli bemi ngɛ e muɔ ɔ he je ɔ, ja a nɔuu nɛ e ma he wa yi wami kɛ je Mawu abofu mi. 10 Benɛ wa ji e he nyɛli ɔ, e Bi ɔ ba kpata wa kpɛti kɛ gu e gbenɔ ɔ nɔ; nɛ amlɔ nɛ ɔ nɛ wa plɛ e huɛmɛ nɛ e ngɛ wa mi ɔ, mɛni gbaami nɛ wa be nae kɛ je e dɛ?

11 Tsa pi enɛ ɔ kɛkɛ, se amlɔ nɛ ɔ, wa bua jɔ si himi kpakpa nɛ ngɛ waa kɛ Mawu kpɛti kɛ gu wa Nutsɔ Yesu Kristo gbenɔ ɔ nɔ ɔ he.

12 Benɛ Adam pee yayami ɔ, yayami ba je nɛ ɔ mi, nɛ gbenɔ gu yayami nɔ kɛ ba, nɛ gbenɔ ba to adesa we, ejakaa nɔ tsuaa nɔ pee yayami. 13 Yayami ngɛ je ɔ mi loko ji a wo Mlaa a. Benɛ Mlaa a be ɔ, a bui yayami. 14 Gbenɔ ye matsɛ kɛ je Adam yi nɔ kɛ ya si Mose yi nɔ. Nɛ nihi tete nɛ pee we yayami nɛ ngɛ kaa bɔ nɛ Adam gbo Mawu tue ɔ, mɛ hu gbenɔ ye a nɔ. Nɛ Adam ji nɔ nɛ maa ba a he okadi. 15 Se slɔɔto agbo ngɛ adesa yayami peemi kɛ Mawu yayami pami kpɛti; ejakaa Adam nɔ kake pɛ e yayami nɛ e ha nɛ gbenɔ gu e yayami ɔ nɔ kɛ sa nihi babauu. Se Yesu Kristo lɛɛ e kɛ yayami pami ba ha nɔ tsuaa nɔ kɛ gu Mawu mɔbɔ nami nɔ. 16 Kaa bɔ nɛ gbenɔ je Adam tɔmi ɔ mi kɛ ba ha nihi babauu ɔ, ja a nɔuu nɛ Kristo ba, nɛ e ba ngɔ a yayami ɔmɛ kɛ ho nɛ e ha mɛ wami. 17 Ejakaa ke gbenɔ gu Adam nɔ kake yayami peemi nɔ kɛ ye matsɛ ɔ, lɛɛ nihi nɛ ma na Mawu dloomi nɔ́ke nɔ nɛ ji yayami pami kɛ gu Yesu Kristo nɔ ɔ hu maa ye matsɛ ngɛ a wami kulaa mi.

18 E ji anɔkuale kaa bɔ nɛ a bu adesa fɛɛ adesa fɔ ngɛ Adam tomi ɔ he ɔ, ja a kɛ̃ nɛ a gu Kristo dami ɔ nɔ kɛ kpata adesa kɛ Mawu kpɛti konɛ a na wami. 19 Adam ha nɛ nihi babauu pee yayami peeli, ejakaa e gbo Mawu tue nɛ Kristo ha nɛ nihi fuu plɛ dali ngɛ Mawu hɛ mi, ejakaa e ye Mawu gbi nɔ.

20 A ha wɔ Mlaa Nyɔngma amɛ konɛ waa na he nɛ wa gbo Mawu tue kɛ ya si. Se si abɔ nɛ wa naa wa yayami ɔmɛ ɔ, si abɔ nɛ wa yoɔ Mawu dloomi kɛ yayami pami ɔ. 21 Kekle ɔ, wa hi yayami nyɔguɛ yemi ɔ sisi nɛ wa na gbenɔ kɛ je mi, se amlɔ nɛ ɔ, Mawu mɔbɔ nami ɔ nɛ ngɛ matsɛ yee, nɛ e pee wɔ dali kɛ gu wa Nutsɔ Yesu Kristo nɔ kɛ yaa neneene wami mi.