1 Oo, ye nyɛmimɛ, Israel bi! I na nɛ nyɛ ba Kristo ngɔ. 2,3 I ngɛ nyɛ he kɔmɔ yee nyɔ kɛ pia, nɛ ye tsui ngɛ mi yee. Kristo kɛ Mumi Klɔuklɔu ɔ le kaa tsa pi lakpa nɛ i ngɛ yee, ke i de ke i ma suɔ nɛ a bu mi fɔ ngɛ nyɛ nane mi, ke ye fɔ bumi ɔ ma he nyɛ yi wami. 4 Mawu ke nyɛ níhi babauu se loloolo ɔ, nyɛ bui lɛ tue. E ngɔ nyɛ kaa lɛ nitsɛ e bimɛ pɔtɛɛ komɛ. Nyɛ ji nihi nɛ e hla, nɛ e kpaka nyɛ dɔdɔɔdɔ kɛ hɛ mi nyami nɛ e de nyɛ bɔ nɛ e suɔ nɛ e gbaa nyɛ ha. Ja a nɔuu nɛ e ha nyɛ mlaahi kɛ ha nyɛ wami si himi, bɔ nɛ pee nɛ nyɛɛ le nɔ́ nɛ e ngɛ hlae nɛ nyɛɛ pee. E ha nyɛ he blɔ nɛ nyɛ ja lɛ, nɛ e ha nyɛ si womi titli komɛ. 5 Mawu nimli nguahi ji nyɛ tsɛ ɔmɛ, nɛ Kristo nitsɛ hu peeɔ nyɛ ti nɔ kake, nɛ e ji Yuda no nɛ a fɔ lɛ ngɛ he lo blɔ fa mi; nɛ lɛ ji nɔ nɛ ngɛ nɔ tsuaa nɔ nɔ matsɛ yee amlɔ nɛ ɔ. A je Mawu yi kɛ ya neneene.

6 Anɛ Mawu yi si womi ɔmɛ nɛ e wo Yuda bi ɔmɛ a nɔ lo? Dabi! E si womi ɔmɛ ngɛ kɛ ha nihi nɛ ji Yuda bi tutuutu. Nɛ tsa pi nɔ tsuaa nɔ nɛ a fɔ ngɛ Yuda weku ɔ mi ji Yuda no kasakasa. 7 Ejakaa Ngmami ɔmɛ de ke Abraham ngɛ bi kpahi mohu, se si womi ɔmɛ ngɛ kɛ ha Abraham bi Isak kɛ e nina kɛkɛ. Lɔ ɔ he je ɔ, tsa pi nɔ tsuaa nɔ nɛ Abraham fɔ ɔ ji e bi kasakasa. 8 Enɛ ɔ tsɔɔ kaa tsa pi Abraham bi ɔmɛ tsuo ji Mawu bimɛ.

9 Ejakaa Mawu wo si ke, "Ma ha mo kɛ Sara binyumu jeha nɛ maa ba a mi." 10 Nɛ pi lɔ ɔ kɛkɛ, se benɛ Rebeka kɛ wa nɛnɛkasowa Isak na muklii, 11 nɛ e fɔ we e hawi ɔmɛ lolo, nɛ a maa pee nɔ́ kpakpa ko loo yayami, se bɔ nɛ pee nɛ Mawu yi mi tomi kɛ ha nɔ hlami ɔ nɛ tsa nɔ, pi ngɛ ni tsumi nya, se e tsɛmi nya a, 12 Mawu de Rebeka ke, "Nɔkɔtɔma a ma sɔmɔ jokuɛ ɔ." 13 Kaa bɔ nɛ a ngma ke, "I suɔ Yakob, se i sume Esau" ɔ.

14 Anɛ Mawu pee nɔ́ ko nɛ dɛ lo? Dabi! 15 Ejakaa Mawu de Mose ke, "I naa nɔ nɛ i suɔ ɔ mɔbɔ, nɛ i yeɔ kɛ buaa nɔ nɛ he nɔ́ dɔɔ mi." 16 Lɔ ɔ he je ɔ, Mawu jɔɔmi baa nɔ ko nɔ tsa pi ngɛ e suɔmi nya aloo e ni tsumi he je. Se mohu ɔ, Mawu kɛ haa nihi nɛ e suɔ mɛ nɛ e naa mɛ mɔbɔ ɔ.

17 Nɛ Farao nɛ ji Mizraim matsɛ ɔ ji okadi ngɛ sane nɛ ɔ he. Ejakaa Mawu de lɛ ke e ngɔ Mizraim matsɛ yemi ɔ ngɔ ha lɛ bɔ nɛ pee nɛ e je e he wami ɔ kpo kɛ gu e nɔ konɛ a tsi e anunyami biɛ ta ngɛ je ɔ mi he fɛɛ he. 18 Lɔ ɔ he je ɔ, Mawu naa nihi nɛ e suɔ ɔ mɔbɔ, nɛ e haa nɛ ni komɛ hu bui lɛ tue. 19 Ke kikɛ ɔ ji blɔ nya tomi ɔ, lɛɛ mɛni he je nɛ Mawu piaa nihi nɛ bui lɛ tue ɔ mɔ? Anɛ a pee we e suɔmi nya ni lo?

20 Dabi! O be he blɔ nɛ o deɔ ja. Mɛnɔ ji mo nɛ o tuɔ munyu kɛ siɔ Mawu? Anɛ e sa nɛ nɔ nɛ a bɔ ɔ nɛ e de nɔ nɛ bɔ lɛ ɔ ke, "Mɛni he je nɛ o bɔ mi kikɛ ɔ ngɛ?" 21 Anɛ buɛ puɛlɔ be he blɔ nɛ e kɛ zu kake nɛ e pɔtɔ ɔ eko puɛɛ bue nɛ ngɛ fɛu nɛ a kɛ mɔmɔ woɔ mi, nɛ e kɛ jamɛ a zu ɔ nɔuu eko puɛɛ buɛ nɛ a kɛ duɔmi woɔ mi lo? 22 Anɛ Mawu be he blɔ nɛ e jeɔ e abofu kɛ e he wami kpo kɛ tsɔɔ nihi nɛ sa hɛ mi kpatami, se e to e tsui si kɛ ha mɛ kɛ ba si piɔ lo? 23,24 Ja a nɔuu kɛ nɛ e ngɛ he blɔ nɛ e naa wɔ ni nɛmɛ nɛ e to nɛ a ngɔ e anunyami ɔ kɛ wo wa mi ɔ mɔbɔ, Yuda no jio, Hela no jio, bɔ nɛ pee nɛ nɔ tsuaa nɔ nɛ e na e anunyami ɔ agbo jemi ɔ.

25 Nyɛ kai nɔ nɛ Mawu de kɛ gu Gbalɔ Hosea nɔ ke e ma hla bi kpahi nɛ pi Yuda weku ɔ mi nɛ a je, nɛ nɔ ko sume mɛ hyɛ, nɛ e maa suɔ mɛ. 26 Nɛ wɔ jali nɛ a de ngɛ a he be ko nɛ be ɔ mi ke, "Tsa pi ye bimɛ ji nyɛ" ɔ, a ma tsɛ mɛ "Mawu Hɛ kalɔ ɔ bimɛ."

27 Gbalɔ Yesaia kpa ngmlaa nɛ e de ngɛ Yuda bi ɔmɛ a he ke, ke a yi bɔ hiɛ kaa wo nya zia tete, a ti nihi bɔɔ kɛkɛ a yi wami nɛ a ma he.

28 "Ejakaa Nutsɔ ɔ kojomi ɔ se be kɛe ngɛ zugba a nɔ, ejakaa e maa po e sane yemi ɔmɛ a nɔ kpiti ngɛ dami mi."

29 Nɛ Yesaia de ngɛ he kpa ko hu ke, ke pi Mawu mɔbɔ nami he je i ɔ, jinɛ e ma kpata Yuda bi ɔmɛ tsuo a hɛ mi kaa bɔ nɛ e ba mi ngɛ Sodom ke Gomora ma amɛ a mi ɔ.

30 Lɛɛ kɛ wa ma de ngɛ nɔ́ nɛ ɔmɛ a he kɛɛ? Lɔ ɔ kɛkɛ ji, ma je li ɔmɛ hla we Mawu se blɔ mohu, se e ha mɛ he blɔ nɛ a di hemi kɛ yemi ɔ se. 31 Se Yuda bi ɔmɛ mohu nɛ dii Mawu mlaa amɛ a nɔ yemi se veveeve, bɔ nɛ pee nɛ a sa Mawu hɛ mi ɔ, a nyɛ we. 32 Mɛni he je? Ejakaa a gui hemi kɛ yemi nɔ kɛ hla we yi wami hemi se blɔ, se mohu a ngɔ a hɛ kɛ fɔ mlaa amɛ a nɔ. Enɛ ɔ ha nɛ a tɛ tɛ ngua a, 33 kaa bɔ nɛ Mawu bɔ mɛ kɔkɔ ngɛ Ngmami ɔmɛ a mi ke, "I kɛ tɛ ngua ko ma si ngɛ Yuda bi ɔmɛ a blɔ mi, nɛ a ti nihi babauu ma tɛ; se a ti nihi nɛ ma he e nɔ maa ye ɔ, zo be mɛ gbee."