1 Neni na uluwa wa kulawa Sharoni,

uluwa wa kululalanda.

2 Handa uluwa pakati pa misontu

ndo ntambu yakawera yanimfira pakati pa wakawali.

3 handa mtera gwa mpera pakati pa mitera ya kuntundu,

ndo ntambu yakawera yanumfira pakati ya wantemba.

Nsekelera kulikala palisisi lyakuyi,

na kuwera pakwegela na neni ndo handa kuliya libwajubwaju linoga.

4 Kantoliti mpaka paligeleri lwa msambu gwa kuliya

na kila muntu mekawoni handa yomberi kanfira neni.

5 Gumpanani likakala kwa zabibu ziyuma,

na kunemiziyi kwa libwajubwaju lyawalishema matofaa,

mana mafiru gantenda ndwali.

6 Mtuyi gwangu gugonjera liwoku lyakuyi lya kumshigi lya mfiru gwangu liweriti msagamu gwa mtuwi gwangu,

na liwoku lyakuyi lya kumliwu linkisikira.

7 Mwenga wahinga wa Yerusalemu niwalagalira,

mlirapi kwa neni kwa makakala ga wanjapuli ama wafyembi wa kuntundu, namkwankanira pota kwimusiya mafiru,

mpaka shaka shakuyi pashisoka.

Mdala

8 Mpikinira liziwu lya mfiru gwangu,

pakiza, nakugulukaguluka kumigongu,

na kutuga kumigongu.

9 Mfiru gwangu ndo handa fyembi

ama shinjapuli mwana.

Kagoloka pakwegera

na shibambaza sha twenga

na kasungulira mulidirisha pakafira kulola munumba.

10 Mfiru gwangu kang'ambira.

su gugoloki, gwenga yanikufira,

gwizi tugendi zetu.

11 Guloli shaka sha mpepu shipita kala

na mvula zileka kala,

12 uluwa ubuma kila pahala.

Na shaka sha kwimba shisoka

liziwu lya ng'unda lipikanika mumalambu mwetu.

13 Mtera gwa mtini gwanja kulera

na mizabibu ibuma na kulaviya nunkira iherepa.

Gwizi su,

gwenga yanikufira, gwizi tugendi.

14 Gwenga ndo handa ng'unda,

yagulififiti mumatalabuwi. Gunanguziyi sheni shaku,

na nilipikiniri liziwu lyaku,

mana liziwu lyaku liherepa na sheni shaku shiherepera.

15 Kwana wantu wamonga wa handa wavibweta wadikawadika,

yawahalibisiya mizabibu yetu yayibuma, naguwaleka wankomangi.

16 Gwenga gwamfiru gwangu na neni namfiru gwaku.

Yomberi kaliyiziya kondolu wakuyi pauluwa wa yungiyungi,

17 Pamberi mshenji gwenilawi na luwindu kuwuka,

guwuyi mfiru gwangu, guweri handa fyembi,

ama shinjapuli mdidini pampindi pa migongu ya Beteri.