1 Gwee mhinga gwa mfalumi,

guloli ntambu yagafiriza magulu gaku muvirwatu!

Magulu gaku gana maringu handa mabuhi ga beyi nkulu,

lihengu lya mawoku ga fundi yakamanika.

2 Shitovu shaku gambira bakuli,

yeni yikosandiri divayi yayihanganyikiti na mashi.

Mtima gwakuyi handa limatilu lya nganu,

lyalizyengetitwi na uluwa wa yungiyungi.

3 Maweri gaku gawoneka handa shinjapuli

ndo handa fyembi wawili.

4 Singu yaku gambira shindwalingu sha magoli ga ntembu,

masu gaku handa litanda kumji gwa heshiboni,

pakwegera na ligomi lya Beti Rabi.

Mpula yaku gambira shindwalingu sha Lebanoni,

lweni lugenda kumji gwa Damasku.

5 Mtuwi gwaku mkulu handa lugongu Karimeli

na mviri zakuyi ntali ziherepa handa nguwu ya shifalumi,

Uherepa wakuyi uweza kumkwegiziya mfalumi.

6 Guloli ntambu yaguherepa,

Gwee mfiru na mwali yaguherepa!

7 Utali waku ulifana na mtendi,

maweri gaku galifana na visanya vya tendi.

8 Ntakuliti hanigukweni mtendi

na kwapa mabwajubwaju gakuyi.

Kwaneni maweri gaku handa visanya vya zabibu,

kupumula kwaku kununkila handa mabwajubwaju.

9 Na mlomu gwaku handa divai inoga.

divayi iseleri mpaka kwa mfiru gwangu,

ipiti pamilomu yakuyi na menu gakuyi!

10 Neni na gwakuyi mfiru gwangu na matamata ga yomberi ndo neni.

11 Gwizi mfiru gwangu tugendi mumalambu

na tukagonji kuvijiji aku.

12 Hatwimuki mandawira putiputi, tugendi mumalambu ga mizabibu,

twakaloli handa yanja kutomola

na handa uluwa wa mzabibu ubuma kala,

na viraa mikomamanga yanja kulaviya uluwa.

Patuwera aku ndo hanikupanani ufiru wangu.

13 Mavili galaviya nunkila yakuyi,

pakwegera na mlyangu gwetu

kwana kila ntambu ya libwajubwaju liherepa,

goseri ga syayi na ga makashu geni nikutulira gwenga yanikufira neni.