1 Alu ndo lwimbu luherepa lwa Selemani.

2 Shondi gunoneri kwa mlomu gwaku,

mana ufiru waku unemiziya kuliku divayi.

3 Utuli waku ununkira weri

na litawu lyaku ndo handa utuli wawumiminitwi.

Toziya ayi wakawali wakufira!

4 Guntoli, tugendi zyetu kalongola,

mfalumi kanjega mushumba shakuyi.

Hatusekeleri na kufyapilira toziya yaku,

hatuzyumi mafiru gaku kuliku divayi.

Hangu ndo mana wadala wakufira!

5 Mwenga wahinga wa Yerusalemu, neni namtitu kumbiti herepa,

namtitu handa malingu ga Kedari,

handa mapaziya ga liringu lya Selemani.

6 Namnkangasha toziya namtitu,

mana mshenji gununguziya.

Walongu wangu wankalalaliti

na wantenda mlolera gwa malambu ga mizabibu.

Kumbiti ndekiti kulilolera lirambu lyangu lya mizabibu.

7 Gung'ambiri gwee yanikufira,

haguwaliyiziyi koshi kondolu waku?

Na pamberi mshenji hagweni kalipi hawoyeri koshi?

Ntambu gaa neni nikusakuli pakati pavipinga vya wayagu?

8 Gwee yaguherepa kuliku wadala woseri,

handa guvimanandiri pahala pa kumpata.

Gufati maleka ga kondolu,

guwaliyiziyi wambuzi waku wadikawadika pakwegera na malingu ga washungaji.

9 Gwee yanikufira nikufaniziya

na farasi gwashidala yawakwega mbutuka za nkondu za falawu.

10 Hereni ziheripiziya sheni shaku,

na singu yaku ifiriziya kwa mikufu ya mabuhi ga beyi nkulu.

11 Hatukunyawiri hereni zya zahabu,

yazilembeziwitwi kwa feza.

12 Shaka mfalumi pakaweriti pameza pakuyi,

utuli wangu ununkira pahala poseri.

13 Yanimfira ndo handa lipaki lya linunkila kwaneni,

pakagonja pashifuwa pangu.

14 Mfiru gwangu ndo handa uluwa wa mtera yawubuma,

mu malambu ga mizabibu aku Engedi.

15 Nakaka gwenga guherepa, mfiru gwangu,

nakaka guherepa na masu gaku gang'ereng'eta kwa ufiru.

16 Nakaka guherepa gwenga yanikufira,

guherepa nakaka!

Pahala panu pa mihambi miwisi hapaweri shitanda shetu,

17 mitera ya muwanga hayiweri mpanda za numba yetu,

na midenki hayiweri litala lyakuyi.