1 Pashiru paweriti pashitanda shangu,

nimsakuliti mpalu ulii yanimfira,

kumbiti nimpatitindiri. 2 Shakapanu nilitakulira,

"Hanimuki na kumsakula mpalu gwangu munjira na paluwaga na kumjini,

na pamajojoniru ga wantu, nimsakuliti gwangu yulii gwa moyu,

kumbiti nimpatitindiri." 3 Walolera wa kumji wamoniti pawaweriti wamulihengu lyawu lya kulolera kumjini.

Su niwakosiya, "Hashi mumuwona yanimfira mpaka kumoyu?"

4 Katepu pandekaniti nawa,

nimwoniti yanimfira mpaka kumoyu.

Nimkoliti pota nimlekandiri kawuki

mpaka panimpelekiti ukaya kwa mawu gwangu

na mpaka kushumba kwa mawu yakaniwuliti.

5 Niwabeliziya mwenga wahinga wa Yerusalemu,

mlirapi kwa neni kwa makakala ga wanjapuli ama wafyembi wa kuntundu, namkwankanira pota kwimusiya mafiru,

mpaka shaka shakuyi pashisoka.

6 Gaa ayu yakiza kulawa kushiwala,

handa liwundi lya lyosi,

na yakanunkira utuli kulawa kwa yawushuwuza? 7 Guloli ndo Shiti shakuyi sha ukulu sha Selemani,

shashipapitwi na vikambaku sitini wa Israeli.

8 Woseri waweriti na magumba,

woseri wavimaniti ntambu ya kulikoma nkondu,

magumba gawu gaweriti kala kwa kutendera,

waweriti kala kwa makomangu ga pashiru.

9 Mfalumi Selemani kalinyawiriti shiti shakuyi,

kwa mbawu ziherepa kulawa Lebanoni.

10 Mpanda zakuyi za kulongolu mwashiti gagubikirwa kwa madini ga feza, mpanda za kumberi zya shiti zigibikirwa kwa zahabu,

shiti shakuyi shilembitwi kwa nguwu za zambalawu,

wadala wa Yerusalemu ndo yawasoniti kwa ufiru na kushigibikira.

11 Mwenga wadala wa Sayuni,

mwizi mumloli mfalumi Selemani.

Kavalira lijenjeri lyakavalisiwitwi na mawu gwakuyi,

lishaka lyakayugiti na lishaka lyakanemereliti.