1 Gwee yanikufira, guloli ntambu yaguherepa,

nakaka gwenga guherepa!

Masu gaku gaherepa gagibikwa na mtandiwu gwa shela,

viri zaku zivina gambira shipinga sha mbuzi shashiselera kulugongu lwa Gileyadi. 2 Menu gakuyi mafufu handa shipinga sha kondolu,

yawalimbatulitwi mibahira vinu na kugululwa.

Kila yumu kalela wawili na kwahera yoseri yakaweriti gweka yakuyi. 3 Miromu yaku ndo handa ubunta msheri,

mlomu gwaku guherepa. Sheni shaku shiherepa, masaya gaku handa vipandi viwili vya libwajubwaju lyawalishema komamanga. 4 Singu yaku iherepa handa shindwalingu sha Dawudi,

shashinyawitwi weri, su kutulirwa vintu vya kulikomangira elufu vya vikambaku. 5 Maweri gaku gaherepa handa vinjapuli wawili,

yawaliyiziwa pa uluwa wa yungiyungi.

6 Hanilikali kulugongu lwana utuli ununkira na hang'endi kulugongu lwana ubani,

mpaka pawushiya na lidunyu kuwuka. 7 Guloli ntambu yaguherepa gwee mfiru gwangu,

gwenga gwahera shidoda shoseri.

8 Gwee mdala gwangu gwa ndowa,

gwizi tugendi pamuhera na neni kulawa Lebanoni,

Guseleri kulawa kulugongu lwa Amana na kulawa pampindi pa lugongu lwa Seniri na Herimoni,

lweni simba na duma walikala kumpanga.

9 Gwee mfiru gwangu na mdala gwangu, yanikufira nentu

neni mbezandiri kukuleka,

mana pagundola hera mona ukufu musingu yaku.

10 Gwe mfiru gwangu na mdala gwangu,

ufiru waku kwaneni ungangasha,

nemelera ufiru waku kuliku kulanda divayi,

nunkira ya utuli waku upita utuli wa kila ntambu.

11 Gwee mdala gwangu, miromu yaku itulusiya lwashi,

lulimi lwaku lwana lwashi na maweri.

Nguwu zyaku zinunkira weri handa mitera ya miyerezi kulawa Lebanoni.

12 Gwee mfiru gwangu na mdala gwangu,

gwenga ndo handa bostani kwa neni,

gwenga ndo linegu lya mashi lyaligibikitwi,

gwenga ndo mbwiru ya mashi yayizyengetirwitwi,

su wantu wamonga nawalanda mashi.

13 Gwenga gwa handa bostani,

yayimemiti mitera ya makomamanga, yagana mabwajubwaju ganoga,

viraa kwana mitera ya hina na nado,

14 na mitera ya Nado na Zafarani,

mshai na mdalasini

mitera yayinunkira na udi

na vimeru vimonga yavyana nunkira iherepa.

15 Gwenga ndo handa bwiru kubostani,

na gwa handa linegu lya mashi gaherepa

na vishemba vyaviselera kulawa Lebanoni.

16 Guvumi gwee lyega lya kushana

gwizi gwenga lyega lya kusika,

muvumi pabostani yaneni na kulimemiziya lyera kwa utuli wakuyi.

Yanimfira kizi mubostani mwakuyi,

kaliyi mabwajubwaju gakuyi ganoga kuliku goseri.