1 Handa meguweri mlongu gwangu,

mweni kanoniziwa na mawu gwangu!

Hangu, meniliwoni na gwenga kunja,

menikunoneri na kwahera muntu mekaliholi handa ntenda vidoda.

2 Menikulonguziyi na kukufikiziya mpaka ukaya kwa mawu gwangu,

kwa yomberi yakafunditi ufiru.

Menikupanani divai iherepa yayigongomolwa

na menikupanani divai yangu ya mabwajubwaju ga makomamanga.

3 Liwoku lyaku lya kumshigi lya pasi pa mtuyi gwangu

na liwoku lyaku lya kumliwu linkisikira.

4 Nikuluwani mwenga, wadala wa Yerusalemu,

namsakula mafiru, mpaka shaka shakuyi pashisokaku.

5 Gaa ayu yakiza kulawa kushiwala,

agawu kamwegemera mfiru gwakuyi?

pasi pa mtera gwa mtofaa neni nikwimusiyiti,

pali peni mawu gwaku kawoniti utama na kwikwiwula.

6 Guntuli pakwegera na gwenga handa shimaniziwu mumoyu gwaku,

yina handa shimaniziwu mumawoku mwaku.

Toziya ufiru wana makakala handa kufuwa,

weya viraa unaunkesera handa lisembi.

Ufiru ulunguziya handa motu

na gwaka handa mlipulipu gwa motu.

7 Malawa hapeni gatendi ufiru uperi,

pota nshemba ziwezandiri kuwudibiziya.

Handa muntu mekalaviyi lunda yoseri ya ukaya kwakuyi toziya ya ufiru,

mekabeziwi nakamu.

8 Twana dada mdidini,

mweni kenifunduli maweri.

Hatumtenderi shishi dada gwetu

lishaka pawamhetaku?

9 Handa mekaweri shibambaza,

metumnyawiri shindwalingu sha madini ga feza.

Handa mekaweri mlyangu,

metutenderi mbawu za miyerezi kumnyawira felemu.

10 Neni weriti handa shibambaza,

na maweri gangu handa vindwalingu vyakuyi.

Pamasu gakuyi weriti handa yakajega ponga.

11 Selemani kaweriti kana lirambu la mizabibu

pahala papashemwa Baali Hamoni.

Kalaviyiti lirambu kwa walimi wa lirambu lyakuyi lya mizabibu,

kila yumu gwawu kalipiti vipandi elufu vya feza.

12 Lirambu ali lya mizabibu ndo lirambu lyangu namweni,

yina ndo lyangu! Gwenga Selemani gulikali na feza zaku,

na kila walolera wa mabwajubwaju kapananwi mia mbili zakuyi.

13 Gwenga yaguwera mulirambu,

wamaganja wangu wapikanira liziwu lyaku,

guleki na neni mpikaniri liziwu lyaku!

14 Gwee mfiru gwangu gutugi, kalongola, handa shinjapuli

gutugi handa fyembi pa migongu yana mitera ya viwungu yavinunkira.