1 Gwee mfiru gwangu na mdala gwangu niza mubostani yangu,

njojonira lipaki lyalinunkira na viwungu vyangu

ndiya lisega na lwashi lwangu,

nanda divai na maweri,

mliyi na kulanda mwawaganja waneni,

mlandi nentu mwee wafiru wangu.

2 Nsinditi kugonja, mana moyu gwangu guweriti gwankulihola.

Shakapanu mpikinira mfiru gwaneni kankukota mlyangu,

mfiru gwaneni, gumvuguliri mlyangu

gwenga ng'unda gwangu yagwahera shidoda.

Mtuyi gwangu gulowa mangami

na viri zangu zilowa lufolafola lwa pashiru.

3 Nilitakulira kuwera, "mvula kala nguwu zangu,

hashi nvali kayi?

Nawa kala magulu gangu,

hashi nigadodisiyi kayi?"

4 Mfiru gwangu kabatiti mlyangu

na moyu gwangu guweriti na matamata toziya kaweriti pakwegera.

5 Nimukiti kumvugulira mfiru gwangu,

mawoku gangu gamema utuli ununkira wa manimani,

vyala vyangu vitulusiya utuli ununkira wa manimani,

pankoliti shigobeku kuvugula mlyangu.

6 Nimvuguliriti mlyangu mfiru gwangu,

kumbiti yomberi kawukiti kala.

Moyu gwangu gutwezukiti!

Nimsakuliti, kumbiti nimpatandiri

na nimshemiti kumbiti kanitikirandiri.

7 Walolera wa muji wamoniti pawaweriti mulihengu lyawu lya kulolera kumjini,

wankomanga na kuntenda

na walolera wa ligomi likulu wampoka shela yangu.

8 Niwaluwani mwenga wadala wa Yerusalemu,

pamumwona mfiru gwangu,

mumgambiri handa mafiru gantenda ndwali!

9 Gwenga yaguherepa kuliku wadala woseri,

Hashi mfiru gwaku kana shintu gaa shimonga kuliku wamonga,

mpaka gutuluwi kwa kutuzyangazyanga hangu?

10 Mfiru gwangu kaherepa na kana makakala,

na kamanika kuliku wapalu elufu kumi.

11 Mtuyi gwakuyi guherepa handa zahabu iherepa,

viri zakuyi ndo zilinyengeta

na ntitu pii handa kungulu.

12 Masu gakuyi mafufu handa ng'unda pampeku pa lushemba,

yawamogiziyiti mu maweri yakaherepa gambira mabuhi ga beyi nkulu.

13 Masaya gakuyi ndo bostani ya mitera yayinunkira,

nunkiru yakuyi ndo handa utuli wa manimani.

Miromu yakuyi handa uluwa wa yungiyungi.

14 Mawoku gakuyi ganyawa weri handa luhonga lwa zahabu

na gagibikwa na mabuwi ga beyi nkulu.

Nshimba yakuyi ing'eleng'eta handa magoli ga ntembu yagalembiziwitwi

na madini ga buluu.

15 Magulu gakuyi handa supa yayinyawitwi kwa mabuwi ga alabasta

zyazigolosiwitwi mumiyanjiru ya zahabu.

Kawonekanika gambira lugongu lwa Lebanoni

yagwana mitera ya miyerezi.

16 Mlomu gwakuyi gumema visoweru vinoga,

nakaka yomberi ndo kaherepa.

Hangu ndo ntambu yakawera mfiru gwangu, yina ndo ntambu yakawera ganja gwangu,

mwee wadala wa Yerusalemu.