1 Guholi kumtendera Mlungu gwaku mashaka ga untemba waku, pamberi pa kwiza mashaka ga ntabiku, pota havyenisegeleri vinja pagulonga, nahera nemeru mu makaliru. 2 Paguwera mzewi, na kusinda kuwona langala lya mshenji, hapeni guwezi kuwona langala lya lyezi na ntondu, mashaka goseri hagaweri luwindu pa mvula kutowa. 3 Shaka mawoku gaku yagakulolera hagalendemeri na magulu gaku hagawerindiri na makakala. Haguweri na menu madidini ga kuliyira na masu gaku hagasindi kulola. 4 Shaka makutu gaku hapeni gapikaniri liziwu lya mji na hapeni gupikaniri liziwu lya watenda lihengu, hapeni gupikaniri liziwu lya wimba, kumbiti maziwu ga wampongu hagakwimusiyi. 5 Shaka ashi hagutili kukwena muvigongu na hagutiri atari za munjira, na haguweri na neziwu, hapaguwezi kugendagenda gamweni handa shibatala mzewi. Hapeni guwafiri kayi wadala, upeleru waku haguhowi na kufintirwa, wantu hawakudayiri. 6 Guholi kumtendera Mlungu gwaku shaka gwankali mntemba, mana lishaka limu hagusoki pawupeleru na lishaka ali haguweri handa kudumuka kwa mkufu gwa madini ga feza, ama kupantika kwa bakuli ya zaabu, ama kupantika kwa vulu kulinegu na handa kudumuka kwa lugoyi. 7 Nshimba hayiwuyi mlitapaka handa lidikudiku na rohu hayimwuyili Mlungu yakayiwumbiti.

8 Neni mfunda nonga hangu, "Vyoseri avi vyahera mana! Kila shintu shahera mana!"

9 Mfunda kaweritindiri hera na luhala, ira kawapananiti viraa wantu umani. Kaziholiti na kulolalola na kuzitula mumalembu matakulu gavuwa. 10 Mfunda kakazaniti kusakula visoweru vyavifiruwa na kila shakashilembiti shiweriti sha teratera na nakaka. 11 Visoweru vya wantu yawana luhala ndo handa luhonga lwalusongokiti lwa kuwalonguziya wankanyama na ulagilagi wawu ndo handa misumali yayikomilitwi mu shipandi sha mbawu na kukamalira, hangu ayu ndo Mlungu yakatupananiti ulagilagi awu twenga.

12 Nentu ya aga mwana gwangu, gujimiri maberiziwu. Mana kulemba vitabu kwahera upeleru na kusoma nentu kutokiziya nshimba.

13 Lyalifiruwa kwa goseri aga ndo, gumtiri na gumjimiri Mlungu na guzikola lagiru zyakuyi, toziya ali ndo lihengu lyakafiruwa kulitenda muntu. 14 Mana, Mlungu hakatozi matendu getu goseri, ata galii yagatendeka kwa bada, gaweri maheri ama madoda.