1 Avi ndo visoweru vya Mfunda, mwana gwa Dawudi na Dawudi kaweriti mfalumi gwa Yerusalemu.

2 Mfunda kalonga hangu. "Shintundiri, shintundiri mumakaliru aga. Vyoseri vyavilawira vyahera mana." 3 Muntu hakapati shishi kulawirana na lihengu lyakuyi lyoseri lyakatabikiriti pasipanu? 4 Viyiwuku viza na viyiwuku viwuka, kumbiti pasipanu hapalikali mashaka goseri. 5 Mshenji gulawa na mshenji guzyeta na gutenda kalongola kuwuya kwagulawiti. 6 Lyega livuma kugendera kushana na kugalambukira kusika, liwuyira mzyengetu gulagulii, shaka shoseri liwuyira njira yakuyi. 7 Nshemba zoseri zinyinyilikira mashi gakuyi mubahali, kumbiti bahali nakaka imemandiri. Pahala nshemba kwazirawila, aku ndo kwaziwuya kayi. 8 Mirandu yoseri imtenda muntu katoki, kuliku muntu ntambu yakaweza kutakula. Lisu litokandiri kulola na likutu lilekandiri kupikanira. 9 Vyavilawiriti vinu havyendeleyi kulawira kayi, vyawatenditi wantu pamberi, wamonga hawavitendi, nakaka kwahera shintu sha syayi pasipanu. 10 Wantu watakula, guloli, mlandu agu gwa syayi! Kumbiti gutendikiti kala kwanjira makashu. 11 Kwahera muntu yanakaliholi mirandu yayilawiriti makashu, pota yagalawira.

12 Neni Mfunda, weriti mfalumi gwa Israeli, aku Yerusalemu. 13 Njeriti kulifunda kila shintu shashilawira pasipanu, kwa luhala nfiriti kwerewa mlandu agu.

Su nivimaniti kuwera Mlungu kawapananiti wantu lihengu likamala. 14 Niyiwona mirandu yoseri yayitendekiti pasipanu, shakapanu nivimaniti kuwera yoseri ayi yahera mana, ndo handa kuwinga lyega. 15 Mirandu yayiwerandiri teratera iwezandiri kunyawiwa kayi,

shashiwerandiri shiwezandiri kuwera.

16 Niliholiti namweni, "Guloli vinu luhala lwangu longereka kuliku wafalumi yawanongoleriti kukolamlima mu Yerusalemu pamberi paneni. Su nivimana vintu vivuwa kuliku ntambu yawatenditi womberi." 17 Shakapanu njeriti kuvimana luhala ntambu yaluwera na lukwali ntambu yaluwera na upungasesi ndambu yaluwera. Kumbiti nivimaniti kuwera kutenda hangu ndo kufira kuwinga lyega. 18 Mana luhala luvuwa lujega lyoga na umani pawongera ujega ntabiku.