1 Avi ndo visoweru vya mfalumi Lemueli, vyakagambiritwi na mawu gwakuyi:

2 "Nikugambiri shishi mwanagwangu? Nikugambiri shishi mwanagwangu yanikwiwuliti? Nikugambiri shishi gwenga mwana yagulawinaniti na shantakuliti? 3 Nagumalira makakala gaku kwa wadala, naguwapanana uwezu waku awa yawawahalibisiya wafalumi. 4 Ifaandiri gwee Lemueli, ifaandiri mfalumi kulanda divayi, pota wakulu kufira ujimbi, 5 su nawalanda na kulwaluwa malagalira ga lagiru, kuwima wahushu shilii shawafiruwa kupata. 6 Gumpanani ujimbi muntu yakagamira, gumpanani divayi muntu yakana hinginika nentu; 7 Walandi na kulwaluwa uhushu wawu, nawalihola kayi ntabiku zawu."

8 "Kumbiti gwenga, gufiruwa gutakuli kwajili ya woseri yawawezandi kuyowera na kukomanira shili sheni wafiruwa kupata yawawezandiri kulitakulira. 9 Gutakuli toziya yawu na kwamuwa pota kumwonera muntu, guwatakuliri wahushu na yawananfiru shilii shawafiruwa kupata."

10 Mdala yakana zyuma ziherepa ndo gaa kaweza kumpata? Yomberi ndo gwa mana kuliku madini ga beyi nkula!

11 Mpalu gwakuyi kamwamini kwa moyu gwakuyi, hapeni kakosi shintu shoseri shiheri mashaka goseri.

12 Hapeni kamtenderi mpalu gwakuyi mirandu midoda, ilaa hakamtenderi mirandu miheri mukulikala kwakuyi koseri.

13 Kasakula mibahira ya kondolu na nguwu nvufu na kutenda lihengu kwa mawoku gakuyi kwa ugangamala.

14 Yomberi ndo handa meri za ushuhuzi, kajega shiboga shakuyi kulawa kutali.

15 Kimuka mandawira putiputi, kuyitandira kaya yakuyi shiboga na kuwapanana mahengu mayaya.

16 Kalihola kuhemera lirambu, kulawirana na vyakapata na kulima mizabibu.

17 Kawera kala kutenda lihegu kwa makakala na kugangamaziya mawoku gakuyi.

18 Kavimana handa mahengu gakuyi gana mota, katenda lihengu mpaka pashiru.

19 Kapota ubunda kwa mawoku gakuyi mweni, kasona nguwu kwa mawoku gakuyi.

20 Kayi kawapanana wahushu, katalipisiya liwoku kuwatanga yawahera vintu.

21 Kantirandiri shaka sha mpepu, toziya kila yumu kana nguwu za mpepu.

22 Kalinyawira matandiku, nguwu zakuyi za rangi zambarawu na nguwu nvufu nentu.

23 Mpalu gwakuyi kamanika muwamu mwa watoza wa mji, kalikala muwamu mwa wazewi wa isi.

24 Mdala ayu kanyawa nguwu nvufu na kashuwuza, kawawuzira washuwuzi wa mifunga.

25 Makakala na ligoya ndo zyuma zakuyi, kaseka na kaliholerandiri mashaka gagiza.

26 Kazumba kwa luhala na mafunda ga ufiru ga mululimi mwakuyi.

27 Kagatendera lihengu goseri yagatendeka munumba yakuyi, kalikayandiri shiboga sha uleri.

28 Wana wakuyi wimuka na kumgambira mayagashiii na mpalu gwakuyi viraa kamzyuma.

29 Kalonga, "Wadala wavuwa watenda mirandu iherepa nentu, kumbiti gwenga guwakanka woseri."

30 Maherepiziya gapayira na kuherepa kufaandiri, kumbiti mdala yakamguwira Mtuwa Mlungu ndo hakazyumwi.

31 Gumpanani zyuma kwa galii gakatenditi, lihengu lyakuyi lipananwi ligoya na wantu woseri.