1 Mwanagwangu, gupikanili luhala lwangu, gwambili likutu gupikini mafunda gangu. 2 Su guwezi kwamuwa weri na miromu yaku nayileka kutakula visoweru vya umani. 3 Mlomu gwa mdala mhumba gulaviya visoweru vinoga handa lwashi, visoweru vyakuyi vikwegeziya handa lipaki lya mzeyituni, 4 kumbiti upeleru wakuyi ndo ukalipa handa shikalikali na ukalipa handa ligumba lyalilikitula koseri. 5 Magulu gakuyi gagendera kumauti, maleka gakuyi gagenda pahala pa wantu yawahowiti. 6 Yomberi kayisherandiri njira ya ukomu, njira zakuyi zakuyerayera pota kavimanandiri.

7 Vinu mwenga wanawangu mumpikaniri, pota namlyaluwa visoweru vyangu. 8 Gulikali kutali nayomberi, pota nagusegelera ligomi lya numba yakuyi. 9 Nagwiza kuwapanana wamonga makakala gaku, na vinja vyaku kwa wankesera, 10 wahenga hawatoli lunda zaku, na livuki lyaku lipeleri kwa mhenga. 11 Upeleru wa kulikala kwaku hagudayi shaka nshimba yaku pagwagamiziwa. 12 Panu hagulongi, iweriti hashi nkalaliriti kufundwa, na kubeziya mabereziwu mumoyu gwangu? 13 Niwapikaniritindiri wafunda wangu, pota kuwayambira likutu kwa wagambiziya wangu. 14 Vinu napakwegera kwagamira nakamu, pakati pa shipinga shoseri sha wantu kusoniziwa.

15 Gulandi mashi ga mbwiru yaku gamweni, gulandi mashi ga linegu lyaku gamweni. 16 Hashi mbwiru zaku zipalasiwi kutali na nshemba za mashi zilipalasi munjira? 17 Ayi iweri yaku gamweni, pota naguwapanana wantu wamonga. 18 Mbwiru yaku na itekelerwi, gumnemeleri mdala gwaku yagumhetiti paguweriti mntemba. 19 Kaherepa handa mbalapi, kafiriziya handa mbawala. Maweri gakuyi gakufiriziyi mashaka goseri na ufiru wakuyi ukukisikiri mashaka goseri. 20 Mwanagwangu, ntambu gaa gulopolwa na mdala muhumba? Ntambu gaa kumkisikira pashifuwa mdala yumonga? 21 Toziya njira za muntu zyalupalahera kulongolu kwa Mtuwa Mlungu, yomberi kawona kila shintu shakatenda muntu. 22 Muntu mkontola kagomiziwa kwa ukontola wakuyi mweni, kabatwa na migomiziwu ya vidoda vyakuyi mweni. 23 Yomberi kahowa toziya kasinda kulilewelera, kagamira toziya ya uzigizigi wakuyi mkulu.