1 Luhala kanyawa numba yakuyi na numba yana mpanda saba. 2 Kawalikitula wavigongolu wa msambu, kayitanda divayi yakuyi, kazalira meza yakuyi. 3 Kawatumiti wantumintumi wakuyi wadala kumjini, washemi wantu kulawa kumpeleru za vidunda: 4 "Yoseri yakwera mzigizigi kizi panu!" Na yoseri yakaweramahala kamgambiraga. 5 Gwizi gulii shiboga na gulandi divayi yanyawiti. 6 Mleki njira zyenu za uzigizigi su guwezi kulikala, gufati njira ya mahala.

7 Muntu yoseri yakamkalapila yakana beziya kasakula kwigiranga, yoseri yakamkosola mkontola kapelera mukutenduwa. 8 Nagumkalipira yakana beziya mana hakakukalaliri, kumbiti pagumberiziyi yakana luhala nayomberi hakakufili. 9 Gumfundi yakana luhala nayomberi hakongeri kuwera na luhala, gumfundi yakana moyu guherepa nayomberi hakongeri kuvimana.

10 Kumguwira Mtuwa Mlungu ndo lyanjiru lya luhala na kummana yulii mnanagala ndo kupata mahala. 11 Toziya ya neni Luhala mashaka gaku hagongereki na hagongerewi vinja vivuwa mukulikala kwaku. 12 Paguwera gwana luhala, hakuweri na mpatiru gamweni, kumbiti pagwana beziya hagupati ntabiku gamweni.

13 Mdala mzigizigi kana umatu, kavimanandiri shintu pota kahera soni. 14 Kalikala pamlyangu gwa numba yakuyi na katula shiti shakuyi pahalia pavidunda pa mji, 15 na kuwashema wantu yawapita munjira, wantu yawagenda mumahengu gawu. 16 "Yoseri kapukapuka na kizi panu! Na yoseri yakawera mzigizigi kamgambiraga," 17 mashi ga kwiwa ganoga ng'anji, libumunda lyawaliliya kwa bada gunoga nentu. 18 Kumbiti wavimanandiri walii yawahowa wagenda kunumba yakuyi, wahenga yawawera amu wamumasembi.