1 Wakondola watuga tembera wawingwawingwandiri na muntu, kumbiti wantu yawatenda maheri wagangamala handa simba.

2 Shaka isi payitenda vidoda ijega walonguziya wavuwa, kumbiti kwa muntu yakana luhala na umani isi inyamalira.

3 Mhushu yakawawonera wahushu wayaguyi, ayu kalifana na mvula nkulu yayihalibisiya viboga vyoseri mumalambu.

4 Wantu yawamega lagiru wawazyuma wakontola, kumbiti yawakola lagiru wasingana nawa.

5 Mkontola kavimanandiri mana yakuwamula teratera, kumbiti yawamsakula Mtuwa Mlungu wayimana nentu.

6 Mbaka mhushu yakalikala kwa kutenda maheri, kuliku mlunda yakalikala kwa kutenda mapotuziya.

7 Mwana yakabata lagiru ndo yakana luhala, kumbiti yakawela ganja gwa walwaliya kamsoniziya tati gwakuyi.

8 Muntu ulii yakatola lunda kwa nongera na kutola mota, kamjojonilira yumonga yakawawonera lusungu wahushu.

9 Yakalema kujimira lagiru, ayu luwa yakuyi ndo nkalaliru kwa Mlungu.

10 Yakamzangazanga muntu maheri kutenda madoda, hakapatukiri mulirindi lyakuyi ulamweni,

kumbiti yawahera madoda hawanki vintu viherepa vyawatulilitwi.

11 Mlunda kaliwona mweni kuwera kana luhala, kumbiti mhushu yakana mahala kamwona ntambu yakawera.

12 Wantu waheri pawakanka kila muntu kanemelera, kumbiti wantu wakontola pawakolamlima wantu walififa.

13 Yakafifa vidoda vyakuyi hapenikafanikiwi, kumbiti yakalonga kanavidoda na kuvileka hakalekeziwi.

14 Mbaka muntu yakamguwira Mtuwa Mlungu mashaka goseri, kumbiti yakatenda moyu gwakuyi kuwera mkamala hakaguwiri muntabiku.

15 Mkolamlima mkontola yakawakolamlima wahushu, ndo handa simba yakaguguma ama kanyama yawamshema dubu yakakomanga.

16 Mkolamlima yakahera mahala ndo mnkesera kawawomera wantu, kumbiti yakakalalira vintu vya zuluma hakakolimlima shaka shitangala.

17 Muntu yakalitoza toziya ya kumlaga muntu, hakaweri mtugaisi mpaka kuhowa, muntu yoseri nakamtanga.

18 Muntu yakahera shidoda hakaponiziwi, kumbiti mpayira hakagamiziwi kalongola.

19 Yakalima lirambu lyakuyi hakapati shiboga shivuwa, kumbiti yakafata yagafaandiri hakapati uhushu uvuwa.

20 Muntu yakaminika hakapati tekelera zivuwa, kumbiti yakatenda kalongola kupata ulunda hapenikashapiri kukomangwa.

21 Iherepandiri kumbagula muntu, wantu watenda madoda ata kwa shipandi sha libumunda.

22 Muntu Yakanashapa katugira lunda, kumbiti kavimanandiri handa uhushu wankumuhepelera.

23 Yakamberiziya myaguyi upeleru hakajimiruwi, kuliku ulii yakajongera kwa visoweru vinoga.

24 Yakiwa lunda za tati gwakuyi ama mawu gwakuyi, nakalonga shidodandiri, yomberi ndo handa wantu yawahalibisiya.

25 Muntu yakana matamata kasongiziya ndewi, kumbiti yakamtumbira Mtuwa Mlungu hakaweri nampatiru.

26 Yakatumbira mahala gakuyi ulamweni ndo mzigizigi, kumbiti yakalikala kwa luhala hakaweri poneka.

27 Yakawapanana vintu wahushu hapeni kapungukiwi na shintu, kumbiti yakalema kuwalola hakapangirwi nentu.

28 Wakontola pawakolamlima wantu walififa, kumbiti pawagamira, wantu waheri hawongeleki.