1 Mdala yakana luhala hakanyawi numba yakuyi, kumbiti mzigizigi hakayibomoli kwa mawoku gakuyi ulamweni.

2 Yakatenda matendu maheri kamguwira Mtuwa Mlungu, kumbiti mpotuziya kambeziya Mlungu.

3 Mzigizigi kalitenda ulamweni kwa kutakula vuluvulu, kumbiti yakana luhala hakalolerwi kwa visoweru vyakuyi.

4 Pota ng'ombi gwa kulima lizizi lya lupalahera, kumbiti mabenangu gavuwa galawirana na makakala ga ng'ombi gwa kulima.

5 Kapitawu mwaminika kalongandiri mpayu, kumbiti yakaminikandiri kayowera mpayu.

6 Yakana beziya kasakula luhala kayipatandiri, kumbiti yakana mahala kapata umani kalongola.

7 Guwuki pahala pakawera mzigizigi, mana pakawera kwahera visoweru vya mahala.

8 Luhala lwa yawana mahala lulanguziya njira yakuyi, kumbiti uzigizigi wa wazigizigi uwapayira weni.

9 Wazigizigi wasekelera kutenda vidoda, kumbiti waminika wapata ligoya kulawa kwa Mlungu.

10 Moyu gugumana utama wakuyi weni, kumbiti nemeru yakuyi hapakayioni muntu yumonga.

11 Numba ya muntu mkontola hayibomoluwi, kumbiti kaya ya muntu mheri haligangamiziwi.

12 Matendu yagulishera kuwera ndo teratera, upeleru iweza kukulonguziya mkuhowa.

13 Nemeru iweza kulififa hinginika, kumbiti mpeleru za nemeru kwiza hinginika.

14 Muntu mpotuziya hakabenangi mabwajubwaju ga njira zakuyi na muntu muheri hakapananwi lifupu lya matendu gakuyi.

15 Mzigizigi kamini kila shintu shawamgambira, kumbiti yakana luhala kalihola uti pamberi pa kutenda.

16 Yakana luhala ndo kalilolera weri na kushapira ukontola, kumbiti mzigizigi kalilewelerandiri pota kalilolera werindiri.

17 Yakana maya kalongola katenda shizigizigi na muntu yakapyera kakalalwa.

18 Yawahera mahala wahala uzigizigi, kumbiti yawana luhala wapananwa lijenjeri lya umani.

19 Wakontola hawasuntamali kulongolu kwa wantu waheri na wantu wadoda hawasuntamali paligomi lya wantu waheri.

20 Wahushu wakalalilwa ata na wapakwegera wakuyi, kumbiti mlunda kana wamaganja wavuwa.

21 Yakambeziya gwapakwegera gwakuyi katenda vidoda, ila katekelelwa uli yakanalusungu kwa wahushu.

22 Yakapanga makontola nakaka katenda vidoda! Yawapanga kutenda maheri wafiruwa na kwaminiwa.

23 Gangamala mukila lihengu lijega mota, kumbiti visoweru hera vijega uhushu.

24 Lunda ndo lifupu lya nemelela yawana luhala, kumbiti uzigizigi ujega uzigizigi ng'anji.

25 Kapitawu gwa nakaka kalopula ukomu, kumbiti yakatakula mpaya kagamiziya ukomu.

26 Yakamguwira Mtuwa Mlungu kana litumbiru gangamala na wana wakuyi hawapati tugira ponera.

27 Kumguwira Mtuwa Mlungu ndo mbwiru ya ukomu, imtenda muntu kushapira migomiziwu ya kuhowa.

28 Uvuwa wa wantu ndo sekeleru ya mfalumi, kumbiti wantu pawadidini mkolamlima kagamira.

29 Muntu yakahera maya ga kalongola kana umani uvuwa, kumbiti yakakalala kalongola kalanguziya uzigizigi wakuyi.

30 Ponga mumoyu impanana muntu uponera, kumbiti matamata iwoluziya mihonju.

31 Yakamzulumu mhushu kamwigira mnyawa gwakuyi, kumbiti yakamwonera lusungu muhushu kampanana ligoya Mlungu.

32 Mkontola kagamiziwa kwa matendu gakuyi makontola, kumbiti muntu mheri hakapati uponera kwa maheri gakuyi.

33 Luhala lukala mumoyu mwa muntu yakana umani, kumbiti ata mumiyoyu ya wazigizigi lumanika.

34 Yawamfiriziya Mlungu watenda isi kuwera nkulu, kumbiti vidoda viwatenda wantu wawoni soni.

35 Mfalumi kafiliziwa na ntumintumi yakana luhala, kumbiti maya gakuyi gawapata wantu yawatenda yagafaandiri.