1 Divayi ijega lidufiya na ujimbi ujega ndewu, yoseri yakakwegwa nayi kahera luhala.

2 Maya ga mfalumi gakalipa handa kuguguma kwa simba na yakamkalaziya kulikala kwakuyi.

3 Ndo mlandu gwa ligoya kushapira ndewu, kumbiti wazigizigi ndo yawalilewa.

4 Mleri kalimandiri shaka shashifaa, kumbiti shaka sha kubenanga kasakula kapatandiri shoseri.

5 Maholu ga muntu galififa handa litiwa lya mashi, kumbiti muntu yakana mahala kavimana kugadidibula amu.

6 Wantu wavuwa walitumbira kuwera waheri, kumbiti mwaminika gaa hakampati?

7 Muntu mheri pakalikala kwa matendu maheri, wana wakuyi hawatekelerwi pa yomberi.

8 Shaka mfalumi pakalivaga kulaviya toza, kalolalola ukontola woseri kwa masu gakuyi.

9 Gaa yakajera kulonga, nigutenda guwelepi moyu gwangu, neni nherepa na nahera vidoda vyangu?

10 Shibaba sha upaya na vipimu vya upaya vyoseri ndo nkalalilu kwa Mtuwa Mlungu.

11 Ata mwana kamanikana kwa mirandu yakuyi, handa matendu gakuyi ndo maheri na gaminika.

12 Makutu lyalipikanira na Masu lyaliwona, vyoseri viwili kavitenda Mtuwa Mlungu.

13 Nagufira kugonja nagwiza kuwera mhushu, guweri masu na gwenga haguweli na shiboga shivuwa.

14 Yakahemera kalonga shifaandiri, shifaandiri, kumbiti pakawuka kalizyuma kapungulirwa beyi.

15 Kwana zahabu na uvuwa wa mabuwi ga beyi nkulu; kumbiti shana mana nkulu ndo visoweru vya mahala.

16 Muntu pakatakula hakamlipili uwanda mhenga gutoli nguwu yakuyi gumtendi kalipi toziya ya wahenga.

17 Shiboga shashipatikanika kwa upaya ndo shinoga, kumbiti shakapanu shiwera handa mhanga kumlomu.

18 Mipangu miherepa itendeka kwa kuligambiziya; pagufira kwanja nkondu mpaka kulihola huti.

19 Visoweru vya kumyowelera muntu kwa vidoda kumtenda muntu kujimiluwindiri, hangu gumshapili muntu yanaka shilomulomu.

20 Yakampangira tati gwakuyi ama mawu gwakuyi, gulangala gwa ukomu wakuyi hagutendwitiya handa koroboyi muluwindu dunu.

21 Uhala yayipatikana kwa kalongola pakwanja, hapeni itekelerwi pawupeleru.

22 Nagutakula, hambuziliri udoda wantendiritwi. Gumtumbiri Mtuwa Mlungu na yomberi hakakutangi.

23 Shibaba sha upayira ndo nkalalilu kwa Mtuwa Mlungu, na vipimiru vyavijimilwandiri ndo shinti shidoda.

24 Maleka ga muntu galonguziwa na Mtuwa Mlungu, kawezahashi muntu kuvimana njira ya kugenda?

25 Nagutula takulu ya kumlavalila Mlungu shintu pota kulihola, shakapanu kanji kulihola kwa shilii shakatakula.

26 Mfalumi yakana luhala kawatenda wakontola wamaniki, kawakoma pota lusungu.

27 Uheri wa muntu ndo gulangala gwa Mlungu, kalolalola goseri yagawera mngati nakamu.

28 Ufiru na waminika vimtenda mfalumi kuwela poneka, ukolamlima wakuyi ugangamaziwa ntambu yakafira Mlungu.

29 Shawalitumbira wantemba ndo makakala gawu, uherepa wa wazewi ndo neziwu zawu.

30 Makomangu na makweshula vilaviya ukontola, viboku vigulula mngati nakamu.