1 Luhala lwa Selemeni,

Mwana yakana luhala ndo nemeru kwa tati gwakuyi; kumbiti mwana mzigizigi ndo hinginika ya mawu gwakuyi.

2 Lunda yayipatikaniti kwa njira idoda ifaandiri, kumbiti kutenda yagamfiriziya Mlungu gamlopola muntu kulawa mkuhowa.

3 Mtuwa Mlungu kawalekandiri yawatenda yagamfiriziya wapati njala, kumbiti kazilema matamata za wakontola.

4 Mawoku ga mleri gajega uhushu, kumbiti liwoku lya muntu mgangamala umtenda kuwera mlunda.

5 Yakana luhala kajojonira shaka sha mabenangu, kugonja shaka sha kubenanga ndo soni.

6 Muntu mheri kalijegera tekelera ulamweni, kumbiti mlomu gwa mkontola gufifa unkesera.

7 Yawatenda maheri waholwi kwa tekelera, kumbiti wakontola hawalyaluwi nakamu.

8 Yakana luhala mumoyu kajimira kugambiziya, kumbiti mzigizigi yakatakula pota kulihola hakagamiri.

9 Muntu yakalikala Mlungu ntambu yakafila kalikala poneka, kumbiti muntu yakagenda munjira yayipotuziya hakamaniki.

10 Yakakupira kwa nfiru idoda, hakanjishi ntabiku, kumbiti yakaberiziya kwa ugangamala kajega ponga.

11 Mlomu gwa mtenda maheri ndo mbwiru ya ukomu, kumbiti visoweru vya mkontola gafifa makontola.

12 Maya gajega ndewu, kumbiti ufiru ugibikira madoda goseri.

13 Mmulomu mwa wana umani mwana luhala, kumbiti yawahera mahala hawakomangwi.

14 Yawana luhala watula umani, kumbiti kutakula kwa wazigizigi kujega matenduwa kalongola.

15 Vintu vya muntu mlunda ndo liboma lyakuyi, kumbiti uhushu wa mhushu umjegera maagamiziya.

16 Shibenamgongu sha mtu mheri ndo ukomu, kumbiti shakapata muntu mkontola shimjegera toza.

17 Yakajimira mabeliziwu kagenda muukomu, kumbiti yakalema kuberiziwa kagamira.

18 Yakamkalira yumonga kwa bada ndo mfyangu, yakampayira muntu ndo mzigizigi.

19 Pavisoweru vitangala pakosandiri vidoda, kumbiti yakalulewelera lulimi lwakuyi kana luhala.

20 Visoweru vya muntu mheri ndo handa madini gaherepa ga feza,kumbiti maholu ga muntu mkondola gahera mana yoseri.

21 Visoweru vya muntu mheri viwafaa wantu wavuwa, kumbiti wazigizigi wahowa toziya wahera mahala.

22 Tekelera za Mtuwa Mlungu ndo zyazijega mpatiru na lihengu lya muntu zongerandiri hinginika.

23 Kwa mzigizigi kutenda makontola ndo handa kudinga, kumbiti wantu yawana mahala wanemelera luhala.

24 Shakashitira muntu mkontola ndo shanakashipati, kumbiti shakashifira muntu mheri ndo shakapananwa.

25 Shimbepera pashipita mkontola ndo yagagamira, kumbiti muntu mheri kagangamiziwa mashaka goseri.

26 Limawu ntambu yalijega wazira mumenu ama lyosi ntambu yaliwawa mumasu, ndo ntambu yakawera mleri kwa yakamlagaliliti.

27 Kumguwira Mtuwa Mlungu, kongera mashaka ga kulikala, kumbiti vinja vya wakontola haviweri mifupi.

28 Litumbiru lya muntu mheri lipelera kunemelera, kumbiti liloleru lya mkontola lipelera hera.

29 Mtuwa Mlugu ndo yakawalolera yawamfiriziya, kumbiti yawatenda makontola hakawaagamiziyi.

30 Wantu waheri hapeni wawusiwi nakumu muisi, kumbiti wakontola hapeni walikali muisi.

31 Mlomu gwa muntu mheri gutakula mirandu ya luhala, kumbiti lulimi lwa muntu mkontola halulimbatulwi.

32 Milomu ya wantu waheri wavimana yagajimilika kutakulwa, kumbiti milomu ya wakontola wazumba makontola hera.