1 Yakasakula gakuyi hera kalitula gweka na wayaguyi, kakalala pakagambiziwa mlandu goseri mheri.

2 Mzigizigi kafiriziwandiri na umani, kwakuyi sha mana ndo shili shakaliho hera.

3 Shaka ukontola pawiza na beziya yiza viraa, pamuhera na soni yiza malongalonga.

4 Visoweru viweza kuwera mbwiru ya luhala ndo handa mashi matali ga bahari, handa shishemba sha mashi gatuga.

5 Iherepa ndiri kumpendeleya muntu mkontola, ama kusinda kumtendera muntu yakahera vidoda galii gakafiruwa kutenderwa.

6 Visoweru vya mzigizigi vijega ndewi, kila shakatakula shijega makomangu.

7 Visoweru vya mzigizigi vimwagamiziya mweni, mlomu gwakuyi ndo mgomiziwu gwa kugomera mweni.

8 Visoweru vya msongiziya ndo handa viboga vinoga, vyeni visuluka magenda mpaka kumtima.

9 Muntu mleri mlihengu lyakuyi, ndo handa mhalibisiya.

10 Litawu lya Mtuwa Mlungu ndo liboma liganagala, yakatenda maheri katugira kawera ponera. 11 Kumbiti mlunda kalihola lunda ndo liboma lyakuyi, mweni kagatenda aga ndo shibambaza shitali shashimlolera.

12 Matumbiru ga mumoyu gajega maagamiziya, kumbiti unanaga ujega ligoya.

13 Kwankula pamberi pa kupikanira ndo uzigizigi na soni.

14 Moyu gwa muntu iweza kuhepelera, ulweri, kumbiti moyu pagumegeka haguhepeleri hashi?

15 Muntu yakana mahala kalipanana umani, likutu lya yakana mahala lisakula umani.

16 Lifupu limvugulira njira muntu ulii yakalaviya, liweza kumfikiziya muntu kulongolu kwa mkulu.

17 Yomberi yakawera gwa kwanja kujega masitaka kawoneka kuyowera nakaka, mpaka pakalilaviya muntu yumonga kumkosiya.

18 Simbi imalira ushingani, ijega maamuliri pakati pa wakulu yawasingana.

19 Mlongu yakatenderitwi shidoda ndo kakamala kukolaniziwa kuliku kukomanga mji yaguzyengetiziwi shibambaza, ndewu zikoweka handa makufuli ga liboma.

20 Visoweru vya luhala vya muntu viweza kumwikutuziya handa shiboga shihelepa, visoweru vihelepa vimtosheya. 21 Lulimi lwana makakala ga kujega ukomu na kulaga, yawafira kulutendera weri hawalii mabwajubwaju gakuyi.

22 Yakapata mdala kapata shintu shiheri, na yomberi kalipanana upenderewu kulawa kwa Mtuwa.

23 Mhushu kaluwa kwa unanaga, ila mlunda kankula kwa ukalipa.

24 Maganja wavuwa waweza kumgusiya muntu, kumbiti kwana maganja waminika kuliku mlongu.