1 Yakaberiziwa mara zivuwa na kuwera kakamala, hakagamiri vumu na hapenikaponi kayi.

2 Wantu waheri pawafanikwa wantu hawanemeleri, kumbiti wakontola pawakolamlima wantu walalama.

3 Yakafira luhala kamnemiziya tati gwakuyi, kumbiti Yakalikolana na mhumba kananga lunda yakuyi.

4 Mfalumi pakakolamlima pota upendelewu, kayitenda isi kuwera gangamala, kumbiti pakafira swinda isi kayiyagamiziya.

5 Yakamzangazanga gwapakwegera gwakuyi, kayalika wavu su kugagomiziya magulu gakuyi.

6 Muntu mdoda kagomera kwa shidoda shakuyi, kumbiti muntu yakatenda maheri kimba na kunemelera.

7 Muntu muheri kavimana mirandu ilii yayifiruwa wahushu kutenderwa, kumbiti muntu yakatenda madoda kavimanandiri mirandu ayi.

8 Yawana beziya wajega ndewi mji goseri, kumbiti yawana luhala wanyamaziya maya.

9 Yakana luhala pakagenda kumahakama na mzigizigi, mzigizigi kawera na maya na kaseka kwa beziya kayi kwahera ponga.

10 Yawafira kwita mwazi wamkalalira muntu yakahera shidoda, kumbiti wantu waheri waulolera ukomu wakuyi.

11 Mzigizigi kalangaziya maya gakuyi pota kufifa, kumbiti yakana luhala kaganyamaziya.

12 Mkolamlima pakapikanira mirandu yaupaya, wakulu yawawera pasi pakuyi hawaweli wakontola.

13 Mhushu na myonera walifana kwa shintu shimu, woseri wawili wapananwa masu na Mtuwa Mlungu.

14 Mfalumi yakalaviyatoza kwa wahushu pota kulola kusheni kwa, kanfiliziya Mlungu, hakauwoni ukolamlima wakuyi uligangamaziya mashaka goseri.

15 Azabu na maberiziwu gajega luhala, kumbiti mwana yakalekitwi katendi ntambu vyakafira mweni kamsoniziya mawu gwakuyi.

16 Wakontola pawakolamlima makontola gongereka, kumbiti wantu yawatenda maheri hawawoni kuguwa kwawu.

17 Gumberiziyi mwana gwaku nayomberi hakakupanani lyoga, yomberi hakagunemiziyi moyu gwaku.

18 Pahala yapawerandiri na malola wantu wagamira, kumbiti yakakola lagiru hakatekelerwi.

19 Mmanda kaberizikandiri kwa visoweru hera, mana tembera kagamana yomberi hapeni kagajimiri.

20 Gumwona muntu yakatakula pota kulihola? Muntu mzigizigi ndo mbaka kuliku yomberi.

21 Yakamzyangazyanga ntumintumi gwakuyi kwanjira uwana, upeleru wakuyi mmanda ayu hakamgaziyi.

22 Yakana maya kasogiziya ndewi, muntu gwa mtiti kajega madoda gavuwa.

23 Mkulitumba kwa muntu gumtenda mweni kalisulusiyi, kumbiti mnanaga gwa rohu hakapananwi ligoya.

24 Yakalikolana na muntu shimbegu kalitenda ulamweni, ata pakalilapa hapeni kayoweli unakaka.

25 Kuwatira wantu ndo kuliyambila ulagamweni, kumbiti yakamtumbira Mtuwa Mlungu kaponeka.

26 Wavuwa wafira kulijegelera kwa mkolamlima, kumbiti muntu kapata shakafiruwa kushipata kulawa kwa Mtuwa Mlungu.

27 Mkontola ndo nkalaliru kwa muntu yakatenda maheri, mtenda maheri ndo nkalaliru kwa mkontola.