1 Moyu gwa mfalumi gwa mumawoku ga Mtuwa Mlungu na kamlonguziya poseri pakafira.

2 Matendu yoseri ya muntu gawoneka teratera pakuyi, kumbiti Mtuwa Mlungu kayipima miyoyu.

3 Kutenda mirandu miheri na ntambu yayifiruwa na Mlungu, kumfiriziya Mtuwa Mlungu kuliku kumlavalira malaviwu.

4 Masu ga yakana mtiti na moyu gwa kulitumba kulangaziya pota kufifa vidoda vya wakontola.

5 Mipangu ya muntu yakana gangamala ijega lunda kwa uvuwa, kumbiti kila yakawera na kalongola kajega uhushu.

6 Lunda yayipatikana kwa mpayu, ndo livuki lyalipita na mgomiziwu gwa kuhowa.

7 Ungesera wa wakontola hawuwatendi wagamiri, toziya walema kutenda yagafiruwa.

8 Njira ya muntu yakatenda vidoda imindikamindika, kumbiti njira ya wantu yatenda maheri italipasiwa.

9 Mbaka kulikala pambeku pampidi pa litala, kuliku kulikala numba yimu na mdala mndewi.

10 Shakafira kutenda muntu mdoda ndo ukontola, kahera lusungu ata kwa gwapakwera gwakuyi.

11 Pagumkoma yakana lidufiya, mpukapuka kapata luhala, pagumfunda yakana luhala, gumpanana umani.

12 Mlungu mweni ndo mheri, kavimana yagatendeka munumba ya wakontola, nayomberi hakawagusiyi wadoda muudoda wawu.

13 Yakalema kupikanira kulira kwa mhushu, yomberi viraa hapenikapikanirwi pakaluwa utanga.

14 Maya ganyamaziwa kwa lifupu lyalilaviwa kwa bada, swinda yayififwa munguwu inyamaziya maya gakalipa.

15 Payitendeka mirandu yayifiruwa wantu waheri wanemelera, kumbiti ijega lyoga kwa wantu wakontola.

16 Muntu yakayerayera munjira ya umani, hakaliwoni ka mushipinga sha wantu yawahowiti.

17 Muntu yakatendera mpiya zakuyi kuhemera vintu vya kunemiziya hakaweri mhushu: yakalihola kuliya na kulanda hapeni kaweri na vintu vivuwa.

18 Mkontola hakapati likomangu pa muntu mheri, yakaminikandiri hakaweri hazalira kwa wantu yawatenda mirandu yayifiruwa.

19 Mbaka kulikala kushiwala, kuliku kulikala na mdala yakanandewi na yakana maya.

20 Mnumba mwa yakana luhala mwana viboga vivuwa viherepa na lipaki, kumbiti mzigizigi kananga lunda vuluvulu.

21 Muntu yagatenda maheri na ufiru, hakalikali mashaka mavuwa na mpatiru na kupananwa ligoya.

22 Yakana luhala kaweza kulopola mji gwa wana makakala, nakushigusiya shibambaza shawashitumbira.

23 Yakalolera mlomu gwakuyi na lulimi lwakuyi, kawera kutali na ntabiku.

24 Yakana malingu na mtiti litawu lyakuyi ndo "Mabeziya," Mirandu yakuyi imema mtiti nentu.

25 Mleri kahowa kwa kutendandiri matamata zakuyi, toziya mawoku gakuyi galema kutenda lihengu.

26 Mkontola mashaka goseri kafira kapati shintu, kumbiti muntu muheri kawapanana wantu kwa ufiru.

27 Tambiku ya mkontola ndo shintu sha shimkalaziya Mtuwa Mlungu: kakalazika nentu payilaviwa kwa nfiru idoda.

28 Kapitawu yakanampayu hakagamili, kumbiti muntu yakapikinira yagafaa hakalikali mashaka goseri.

29 Muntu mkontola kaliranguziya kuwera mgangamala, kumbiti muntu muheri kalihola weri gakutenda.

30 Kwahera luhala, umana, pota shintu shoseri shakapanga muntu. Kwahera shintu shoseri shilii Mtuwa Mlungu kasinda kushitenda.

31 Farasi katandwa toziya ya nkondu, kumbiti ukanka ulawa kwa Mtuwa Mlungu.