1 Mwanagwangu, nagulyaluwa mafunda gangu, mumoyu gwaku kuliholi malagaliru gangu, 2 toziya hagakupanani mashaka gavuwa na haguweli na mpatiru nentu. 3 Ufiru na waminika navilitula gweka na gwenga. Guvitawi musingu mwaku na guvilembi mumoyu mwaku. 4 Pagutenda hangu hagujimiliki na kuzyumika, kulongolu kwa Mlungu na kwa wantu.

5 Gumtumbiri Mtuwa Mlungu kwa moyu gwaku goseri, pota nagulitumbira mahala gaku gamweni. 6 Gumholi Mtuwa Mlungu mukila lyagutenda, nayomberi hakakulonguziyi njira zaku. 7 Naguliwona gamweni kuwera gwana luhala nentu mumoyu gwaku, gumtiri Mtuwa Mlungu na kulitula gweka na ukontola. 8 Pagutenda hangu hayiweli afya mushimba yaku na kutenda mihonju yaku iweri na makakala. 9 Gumpanani ligoya Mtuwa Mlungu kwa kumlavilira lunda zaku na kwa viboga vya kwanja vyaku vyoseri. 10 Panu hanja zaku hazimemi viboga nentu na mapipa gaku hagamemi divayi yasyayi.

11 Mwanagwangu, nagubeziya Mtuwa Mlungu pakakugambiziya, pota nagukalazika kwa makalapiru gakuyi. 12 Toziya Mtuwa Mlungu kawakalapira walii yakawafira, gambira tati ntambu yakamkalapira mwana gwakuyi yakamfira. 13 Mbaka muntu yakayambula luhala, muntu ulii yakapata kuvimana, 14 toziya luhala ndo luhelepa kuliku madini ga feza na lwana mota kuliku zahabu. 15 Luhala lwana mana kuliku madini ga feza, kwahera shagushifira shashiweza kulinganira na ashi. 16 Ku liwoku lyakuyi lya kumliwu kwana luhala, kuliwoku lyakuyi lya kumshigi lyana lunda na ligoya. 17 Njira zakuyi ndo ziherepa, zoseri ndo njira za ponga muponga. 18 Luhala ndo mtera gwa ukomu kwa woseri yawampata, hawatekeleri woseri yawamkola.

19 Mtuwa Mlungu kanyawiti pasipanu kwa luhala lwakuyi,

kwa umani wakuyi kanyawa lyela pahala pakuyi.

20 Kwa umani wakuyi mbwiru zilaviyiti mashi

na mawundi gatulusiya mangami.

21 Mwanagwangu, naguleka luhala na umani,

naguvileka viwuki pamasu gaku, 22 navyeni havitendi gulikali mashaka gavuwa na malembeziya gaherepa musingu mwaku. 23 Panu haguwezi kugenda zaku kwa ponga na hapenigulikwali. 24 Pagulikala hapeniguweri na lyoga, pagugonja hagupati mpota zinoga. 25 Hapenigutira vitiliziwu vya vumu, ama makomangu kulawa kwa wakontola, 26 Toziya Mtuwa Mlungu hakaweri litumbiru lyaku, hakakuloleri nagwiza kugomiziwa mmigomiziwu.

27 Nagumwima muntu yakafira kutangwa, handa gwana uwezu wa kutenda hangu. 28 Nagumgambira gwapakwegera gwaku kagendi zakuyi mpaka shirawu, shaka gwenga guweza kumpanana shakafira leru. 29 Nagupanga makontola kwa gwapakwegera gwaku, yakalikala pakwegera na gwenga pakakwamini. 30 Nagulilewa na muntu pota toziya payiwera hakenikutenderi mlandu goseri mdoda. 31 Nagumwonera weya muntu gwa ndewi, pota nagujera ntambu yakatenda. 32 Toziya wakontola ndo nkalaliru kwa Mtuwa Mlungu, kumbiti yomberi kankuwatenda wamaganja wakuyi walii yawatenda yagafiruwa na Mlungu. 33 Mtuwa Mlungu kapangira numba za wakontola, kumbiti katekelera numba za wantu yawatenda yagafiruwa na Mlungu. 34 Yomberi kawabeziya yawambeziya, kumbiti kawapanana upenderewu yawalisereziya. 35 Yawana luhala hawahali ligoya, kumbiti wazigizigi hawapati soni.