1 Ligoya lyakapananwa mzigizigi limfaandiri, ndo handa balafu ya shiyangazi, ama mvula shaka sha kubenangu.

2 Shilikwinta ama mbayuwayu yawatukirandiri,handa mpangira yahera toziya hapeniimpati.

3 Shiboku kwa farasi shimpingapinga kwa punda na luhonga kwa mgongu gwa mzigizigi.

4 Nagumwankula mzigizigi teratera na uzigizigi wakuyi, nagwiza kulifana nayu.

5 Gumwankuli mzigizigi teratera na uzigizigi wakuyi, nakiza kuliwona yomberi kana luhala nentu.

6 Yakamlagalira mzigizigi, ndo handa kulilimbatula magulu ama kulisakulira ntabiku.

7 Visoweru vyana luhala mumulomu mwa mzigizigi, ndo handa magulu ga shibyeketu yagatyeteka.

8 Kumpanana mzigizigi ligoya, ndo handa kutawa libuhi kuluhembelu.

9 Mzigizigi yakajera kutendera visoweru vyana luhala, ndo handa mlowera yakajera kutupula lusontu muliwoku lyakuyi.

10 Muntu yakamtula mlihengu mzigizigi ama mlowera, ndo handa yakaguma msali pota kulola kamtenda kila muntu.

11 Mzigizigi yakawuyirawuyira uzigizigi wakuyi, ndo handa ng'ang'a yakaliya vyakatapikiti.

12 Hashi gumwona muntu yakaliwona kana luhala pamasu pakuyi? Mbaka kumtumbira mzigizigi kuliku muntu handa ayu.

13 Mleri kalonga, kwana simba kunjira aku, simba ka munjira nkulu.

14 Handa ligomi ntambu yalizyengeta mubawaba zakuyi, ndo handa mleri ntambu yakaligalambula pashitanda shakuyi.

15 Mleri katula liwoku lyakuyi musahani ya shiboga, kumbiti kasinda kulinyasula mpaka kumlomu.

16 Mleri kaliwona kuwera kana luhala, kuliku wantu saba yawaweza kwankula kwa mahala.

17 Yakalingiziya mundewi yayiwerayakuyindiri kana maya, ayu ndo handa muntu yakambata ng'ang'a makutu gakuyi.

18 Handa muntu yakana lukwali ntambu yakashinigira mambamba, ama misali yayijega kuhowa, 19 ndo ntambuyakawera muntu yakampotuziya gwapakwegera, shakapanu kalongi, weriti ntenda lidufiya hera.

20 Bila mbawu, motu guzimika bila gwakwang'anira, ndewi imalilika.

21 Gambira makala pampindi pa makala na handa mbawu pampindi pa motu, ndo mndewu ntambu yakasongiziya ndewi.

22 Visoweru vya yamsongiziya ndo handa shiboga shinoga, visuluka mpaka mmutima mwa muntu.

23 Visoweru vinoga vyavilawa mumlomu mwa mdoda, ndo handa vyombu vya ukaka vyavikulugitwi.

24 Yakana unywanywa kafifa unywanywa wakuyi kwa visoweru viherepa, kumbiti ukondola umema mngati mmoyu gwakuyi. 25 Tembera visoweru vyakuyi vikwegiziya, nagumwamini, toziya mumoyu mwakuyi mumema mirandu mivuwa yayikalalira. 26 Pamonga kafifa nkalaliru yakuyi, kumbiti nfiru zakuyi zidoda hazimaniki kulongolu kwa wantu.

27 Yakambawira muyaguyi lirindi, hakapatukili ulamweni; yakabilingisiya libuwi halimuwuyili ulamweni.

28 Lulimi lwalutakula mpayu luwalema walii yaluwatenditi, namlomu gwaguzyangazyanga gujega magamiziya.