1 Visoweru vya Aguri, mwana gwa Yake,

Magambiziya geni muntu ayu kamgambira Itieli,

yina, Itieli na Ukali.

2 Neni ndo mzigizigi kuliku wantu woseri,

nahera mahala geni muntu kaweza kuweranaga.

3 Hanenilifundi luhala,

pota nivimanandiri shintu shoseri kuusu Mlungu Mnanagala.

4 Ndo gaa yakakweniti kumpindi shakapanu kasuluka pasi?

Ndo gaa yakalibatiti lyega mumawoku gakuyi?

Ndo gaa yakabilinga mashi mushitambala?

Ndo gaa yakatuliti mbaka yoseri ya upeleru wa pasipanu?

Litawu lyakuyi ndo gaa?

Ama litawu lya mwanagwakuyi mpalu ndo gaa? Handa guvimana gung'ambili.

5 Visoweru vyoseri vya Mlungu ndo vya nakaka, yomberi ndo ngawu yawu woseri yawamtugira. 6 Nagongera shisoweru muvisoweru vyakuyi, nakiza kukukalipira na gwenga guwoneka gwampaya.

7 Mirandu ayi miwili nikuluwa gwee Mlungu, pota nagumbelera pamberi nenefuwi: 8 Gumbusiliri upaya na uzyanga, nagumpanana uhushu pota ulunda, ila gumpanani shiboga shanishifira kula lishaka, 9 naniza kwikuta na kukulema, pantakula Mtuwa Mlungu ndo gaa? Ama naniza kuwera mhushu na kwiwa na kuligira litawu lyaku gwee Mlungu gwangu.

10 Nagumshongera ntumintumi kwa mtuwa gwakuyi, nakiza kukupangira, guwoneki gwana makosa.

11 Kwana wantu weni wawapangalira watati wawu, kayi wawatekelerandiri wamawu wawu.

12 Kwana wantu weni waliwona kuwera waheri, kumbiti hawenelekiziwi vidoda vyawu.

13 Kwana wantu walidumba ng'anji, wabeziya kila shintu shawashiwona.

14 Kwana wantu weni menu gawu ndo gakalipa handa ligumba likola kuwili na magegu gawu handa vimagi. Wawera kala kuwamemena wahushu muisi, na wantu yawanafiru muwamu mwa wantu.

15 Mruba kana wahinga wawili yawatakula "Gumpanani"

Kwana vintu vitatu vyeni nakamu vikutandiri, yina vintu vyamsheshi vyavitakulandiri, itosheya

16 Kulisembi,

mtima gwa mdala yakalerandiri,

litapaka lyalikutandiri mashi na motu gwagutakulandiri,

itosheya

17 Handa muntu pakamjongera tati gwakuyi, na kubeziya kujimira kwa mawu gwakuyi, masu gakuyi hagadonolangwi na kunguru gwa kululalanda na nkashanga hawamliyi.

18 Kwana mirandu mitatu yayiwera ya kulikangasha kwaneni, yina, mirandu msheshi yaniyimanandiri:

19 Njira ya shipanga kuliyera,

njoka ntambuyakatyanga kulitalawu,

meri ntambu yayityanga mubahari

na ufiru wawumkwega mpalu kwa mdala.

20 Matendu ga mdala mhumba ndo aga: Yomberi kaliya, kalipukuta mlomu na kulonga, "Ntendandiri shidoda shoseri!"

21 Kwana mirandu mitatu yeni ipalendemeziya pasipanu, yina, mirandu yamsheshi yeni pawezandiri kuhepelera:

22 Mmanda yakawera mfalumi,

mzigizigi yakikuta shiboga,

23 mdala yakafiruwandiri kuyugwa pakayugwa

na yaya yakatola lupenu lwa bibi gwakuyi.

24 Kwana viumbi vyamsheshi vididiki ng'anji pasipanu, kumbiti vyana mahala nentu:

25 Awa ndo wasungu, wang'ong'olu wahera makakala, kumbiti walitulira shiboga shawu toziya ya shaka sha shiyangazi;

26 pimbi, wankanyama yawahera uwezu, kumbiti walinyawira seemu za kulikala mulitalawu;

27 wanjombi wahera mlonguziya, kumbiti woseri wagendagenda pamuhera muvipinga.

28 Shitunu: Guweza kumbata muliwoku, kumbiti waweza kwingira mumaboma ga shifalumi.

29 Kwana viumbi vitatu vyeni kutyanga kwawu kuherepa, yina, kwana viwumbi msheshi vyeni kutyanga kwawu kwa malingu:

30 Simba, shigongolu yakana makakala kuliku woseri pota kamtirandiri shigongolu yumonga yoseri;

31 njogolu yakagenda kwa maringu, kayi mbuzi pongu

na mfalumi kulongolu kwa wantu wakuyi.

32 Handa gutenda uzigizigi na gulizyuma mweni ama handa gupanga mirandu midoda, gudiwi mlomu gwaku. 33 Toziya pagugapima maweri hagupati siyagi, pagumkoma muntu mpalu hakalawi mwazi, viravilii kusongiziya maya kujega ndewi.