1 Pagulikala kuliya pamuhera na mkolamlima, nagulyaluwa ata padidini kuwera gwapamuhera na gaa. 2 Guleweleri nentu matamata gaku, payiwera gwenga gufira nentu kuliya. 3 Nagwana matamata na viboga vyakuyi vinoga, mana viweza kukuzyanga.

4 Naguligaziya su kupata ulunda, guweri na luhala kulilewelera. 5 Vumu ulunda uwuka, guwera handa gupata mbapatiru vumu, nakuguluka kumpindi nakwagamira handa nkachanga.

6 Naguliya shiboga sha muntu yakana malema, pota nagwanamatamata kuliya viboga vyakuyi vinoga. 7 Mana mumoyu mwakuyi kawalanga shaguliya, hakakugambiri guliyi na Kulanda. Kumbiti mumoyu mwakuyi kapamuherandiri na gwenga. 8 Haguhiluli vyaguliyiti, kulonga mayagashii kwaku koseri hakuweri hera.

9 Nagutakula visoweru vyaku kulongolu kwa mzigizigi, toziya hakabeziyi visoweru vyaku vya luhala.

10 Naguwusiya shimaniziwu sha mbaka ya makashu, pota nagwingilira malambu ga washiwa,

11 toziya Mtuwa Mlungu, mlopola na yakana makakala, yomberi hakavikomaniri virii vyawafiruwa kupata kulongolu kwaku.

12 Gutenderi moyu gwaku kupikanira mafunda, gutuliweri makutu gaku kupikanira visoweru vya umani.

13 Naguleka kumfunda mwana, mana pagumkoma kwa shiboku hapakahowi. 14 Pagumsyatanga shiboku, hagulopoli ukomu wakuyi kulawa mkuhowa.

15 Mwanagwangu, moyu gwako paguwera gwana mahala, moyu gwangu haguweli gwana nemeru: 16 Moyu gwangu hagutendishereku, shaka mlomu gwaku pagutakula visoweru viherepa.

17 Moyu gwaku naguwawonera weya yawana vidoda, ila gwendeleyi kumguwira Mtuwa Mlungu mashaka goseri. 18 Nakaka kwana litumbiru lya shakapanu toziya yagwenga na shilii shaguhepelera hepenishiweri hera.

19 Gupikanili mwanagwangu, guweri na luhala na kayi guliholi nentu ntambu yagulikala. 20 Naguwera yumu gwa walowera, pota walwaliya yawafira vinofu, 21 mana walowera na walwaliya upeleru haweli wahushu, na uleri utenda muntu kavali malapulapu.

22 Gumpikaniri tati gwaku yakakuleriti, nagumbeziya mawu gwaku pakawera mzewi.

23 Guhemeli unakaka pota naguushuwuza, guhemeli luhala na mafunda na mahala.

24 Tati gwa mwana yakatenda maheri kana nemeru nkulu, yakamwiwula mwana yakana luhala hakamnemeleri. 25 Guwaleki tati gwaku na mawu gwaku wanemeleri, mawu yakamwiwuliti na kanemeleri.

26 Mwanagwangu gumpikaniri weri, gunfati neni ntambu yantenda, 27 toziya mhumba ndo handa lirindi litali lya kuyambira wantu, mdala mhenga ndo handa linegu libabani. 28 Yomberi kanyatira handa mpoka, kawatenda wapalu wavuwa waminikindiri.

29 Ndo gaa yakatenda umatu? Na gaa yakana hinginika? Na gaa yakana ndewi? Na gaa yakalalamika? Na gaa yakatenduwa pota toziya? Na gaa yakana masu masheri? 30 Ndo walii yawawukandiri pawahanganyia viloweru, walii yawagenda kusakula viloweru vya vihanganikitwi. 31 Naguyifira divayi toziya ya usheri wakuyi, ata handa imetameta mugilasi na kuselela mpolimpoli paguyilanda. 32 Upeleru itama handa njoka, isoma handa njoka yakana usungu. 33 Masu gaku hagawoni vimulimuli, namahala gaku hagaliholi makontola. 34 Haguweli handa muntu yakagonja pakati pa bahari, handa muntu yakagonja pampindi pa mpanda ya meli. 35 Hagutakuli, wasyatangiti, kumbiti ntenduwandiri, wankomangiti, kumbiti nivimanandiri. Hanimuki ndii? Guleki nsakuli shilandu shimonga.