1 Mwanagwangu, gukoli visoweru vyangu na guzituli lagaru zyangu. 2 Gufati lagalira zyangu na gwenga hagulikali. Gugaloleri mafundu gangu handa lisu lyaku. 3 Shaka shoseri gugaholi malagaliru gangu na gugatuli mumoyu gwaku. 4 Gulugambiri luhala, gwenga ndo dada gwangu na mahala gwenga ndo ganja gwagu. 5 Aga agakutuli kutali na mdala mhumba, havituli kutali na visoweru vinoga vya mdala yakaminikandiri.

6 Lishaka limu nsunguliriti kunja kupitira lidilisha lya numba yangu, 7 niwawona wantemba wavuwa wapukapuka, na yumu gwawu kaweriti mzigizigi. 8 Ayu kaweriti kakugendagenda munjira ilii, pakwegera na numba yakalikala mdala tunga. Su kayifata njira yayigenda ukaya kwa mdala ayu, 9 iweriti shaka sha pashimii, luwindu na pashiru viweriti lyanjiti kala kwingira. 10 Vumu mdala kaliwona na mntemba ayu; kaweriti kavala handa mhumba na kaweriti na yakana mipangu yakuyi. 11 Kaweriti mdala yakana umatu na yakahera soni na kaweriti kalikalandiri ukaya: 12 Katepu munjira, katepu kusoku, mumapandanjira hapenigumkosi pakagwadira. 13 Kamkisikiliti mntemba ayu na kumnonera na kwa visoweru vinoga, kamgambira pota soni, 14 ndaviya tambiku zangu za mapatanu, leru ndo malira shanongiti. 15 Ndo mana ndawa su nikwanki nikusakula kwa nfiru nikupata. 16 Nyalika shitanda shangu weri, kwa shuka za rangi nfufu kulawa Misri. 17 Ndekeriti utuli, manimani, udi na mdalasini. 18 Gwizi tugonji pamuhera mpaka mandawira, gwizi tulinemiziyi kwa kuligonja. 19 Mpalu gwangu kwahera ukaya kagenda mwanja gwa kutali. 20 Katola libulungutu lya mpiya, hapanikawuyi ukaya mpaka mpeleru gwa mwezi. 21 Kamgambiriti visoweru vivuwa vya kazyangwazyangwa, na kamkwenga kwa visoweru vyakuyi vinoga. 22 Panu kamfata mdala ayu magenda handa ng'ombi shipalu yakagenda mumachinjiru handa mpalapi yakabatwa mumgomiziwu, 23 mpaka pakaliwoniti kawera handa wamsoma msali mumoyu, kuwera handa mpongu yakagendera muwavu, kavimanitindiri kuwera mekautendi ukomu wakuyi.

24 Hangu wanawangu, mumpikaniri, mviyambili makutu visoweru vyaniwagambira. 25 Namjimira moyu gwaku kumfata mdala handa ayu, pota nampita munjira yakuyi. 26 Toziya kawagusiya wapalu wavuwa na kutenda wapalu watangala walaguwi. 27 Numba yakuyi ndo njira ya kugenda kulisembi na ndo njira ya kusulukira kuhowa.