1 Mwanagwangu, handa gulilaviya kumtanga gwapakwegera gwaku, payiwera gutakula hagutendi shintu tunga toziya ya muntu yumonga, 2 handa gulipata kwa visoweru vyaku gamweni, handa guligomiziya kwa shilii shagutakuliti hagutendi. 3 Guvimani gwa pasi pa ukulu wa muyagu, hangu mwanagwangu, pagufira kulilopola gufiruwa gutendi hangu gumgenderi na kulinanagaziyi kwa muntu ayu kalongola gumluwi kakupanani ulekeru waku. 4 Nagujimira kugonja, pota kusizira. 5 Gulilopoli kwa kulilaviya mumgomiziwu agu, ntambu ya mbawala ama mpongu yakampota yakamwinditi.

6 Gwee mleri, gukamsunguliri mehi, guliholi ntambu yakalikala su gupati luhala. 7 Mehi kahera mlonguziya, mkulu, pota mkolamlima, 8 kumbiti walitulira shiboga shaka sha mabenangu, kajojonira shiboga shakuyi shaka pashiwera shitangala shipatikana shkubenanga. 9 Gwee mleri, hagugonji panu mpaka ndii? Hagwimuki ndii mumpota zaku? 10 Gulonga, guleki ng'onji shididini hera, guleki ndaviyi mpota shididini, guleki mawoku goyeri shididini. 11 Shaka ashi uhushu hawukukankali handa mpoka, na kuperuwa hakukufati handa mashinjashinja.

12 Muntu mpotoziya na muntu mkontola, kayerayera pakalonga visoweru vyawupotuziya. 13 Kakupira lisu kuwapotuziya wamonga, na kuyowera kwa nzyayu, na kulanguziya wantu kwa vyala su kupayira, 14 su kamema upyota mumoyu mwakuyi na kapanga kutenda makontola na kasongeziya ndewi kila pahala. 15 Kulawirana na mirandu ayi madoda ntabiku haimkankali vumu, hakatenduwi nentu hapakaponi kayi.

16 Kwana vintu sita vyakavikalalira Mtuwa Mlungu, yina vintu saba vyeni ndo nkalaliru kwakuyi.

17 Masu ga mtiti na lulimi lwa mpayu na mawoku yagalaga wantu yawatenditindiri vidoda,

18 Moyu gwagupanga makontola na magulu yagatuga kutenda makontola,

19 Kapitawu gwa mpayu yakatakula mpayu na muntu yakasongiziya ndewu pakati pa walongu.

20 Mwanagwangu, gukoli malagalira ga tati gwaku, pota kulyaluwa mafunda ga mawu gwaku, 21 gugatuli mumoyu gwaku mashaka goseri, gugatawi handa ukufu musingu mwaku. 22 Hagakulonguziyi munjira mwaku, hagakuloleri shaka pagugonja, hagakugambiziyi shaka paguwera masu paliwala. 23 Toziya malagalira aga ndo handa koroboyi na lagiru ali ndo handa langala. Maberiziya gakuyi ndo handa njira yayilonguziya muukomu. 24 Hagakuloleri kulawirana na mdala mdoda, havikushapili na visoweru vinoga vya mdala mhumba. 25 Nagumfira mdala ulii kwa kuherepa kwakuyi, pota nagujimira kugomoziwa kwa masu gakuyi ga kalembula. 26 Toziya ya uhumba muntu kaweza kuwera mhushu mpaka kaluwa libumunda, toziya ya mdala gwa muntu yumonga kakutenda kuhowiziyi kila shintu.

27 Muntu kaweza kutula motu pashifuwa na nguwu zaku kulungulira? 28 Hashi muntu kaweza kutimbanga makala ga motu na nzayu zaku hapazilunguliri? 29 Ndo ntambu yakawera mpalu yakagonja na mdala gwa myaguyi, yoseri yakamshinkula mdala ulii hapakalekwi kukomangwa. 30 Wantu wambereziyandiri shimbegu pakiwa toziya ya njala, 31 kumbiti pawambata kafiruwa kalipi mala saba, kayi hakalaviyi lunda yoseri yakaweranayi. 32 Kumbiti mpalu yakagonja na mdala gwa muntu ayu kahera mahala nakamu, nayomberi kalyagamiziya mweni. 33 Hakapati vironda na hakabeziwi na soni yanakayipati hapeniimuwuki. 34 Toziya weya wa mpalu umtenda kuwera kakalipi nakamu, shaka pakawuzilira hapenikaweri na lusungu. 35 Hapenikajimiri malipu goseri, pota kunyamaziwa na mafupu goseri.