1 Naguwawonera weya wantu wakontola, pota nagufira kuwera pamuhera nawa, 2 toziya maholu gawu goseri ndo muunkesera, kwahera shisoweru shoseri shiheri shashilawa mmilomu mwawu.

3 Numba inyawiwa kwa luhala na kuganagamaziwa kwa umani.

4 Kwa mahala vyumba vyakuyi vimemiziwa vintu vifiriziya na vya beyi nkulu.

5 Mgangamala yakana luhala kana likakala nentu, muntu yakana umani kana likakala nentu: 6 Toziya kwa mlonguziwu guherepa guweza kulikomanga nkondu na yapawera na wagambiziya wavuwa kwana ukanka.

7 Kwa mzigizigi luhala ndo lukamala kulumana, pakuliwona pa magambaziya hapenigumamuli mlomu.

8 Yakaliholera kutenda makontola mashaka goseri, hakashemwi muntu gwa ndewi. 9 Mpangu gwakaliholera mzigizigi ndo vidoda, wantu wamlema yakana beziya.

10 Pagutwezuka shaka sha ntabiku, gulimani gwenga makakala gaku ndo madidika.

11 Gumlopoli muntu yakatolwa kulaguwa hera, naguleka kumlopola yakagenda kulikitulwa. 12 Nagutakula, tuvimanandiri mana Mlungu yakapima miyoyu ya wantu kawona, yomberi hakakulipi kulinganira na matendu yaku

13 Mwanagwangu, gulii lwashi mana ndo iherepa, lisega lyana lwashi ndo linoga mumlomu. 14 Hangu ndo ntambu yalunoga luhala mumoyu gwaku, pagulupata haguweli na maloleru maheri, pota litumbiru lyaku hapeniliweri lyahera.

15 Nagugwadira handa mkontola mumakawu ga muntu mheri, pota nayikomanga numba yakuyi; 16 tembera muntu mheri kaguwa mara zitangala, mara zoseri kagoloka kayi, kumbiti muntu mkontola kagamiziwa na mirandu idoda.

17 Nagunemelera kuguwa kwa mnkondu gwaku, Nagusekelera mumoyu mwaku kulikwala kwakuyi, 18 mana Mtuwa Mlungu nakiza kuliwona ali nakakalaziwa, nakuwusiyi kutali maya gakuyi na yomberi.

19 Nagukalala toziya ya watenda madoda, pota naguwawonera weya wantu wakontola, 20 mana mkontola hapakaweri na maheri, shakapanu ukomu wakuyi hawudosolwi dosu.

21 Mwanagwangu, gumguwiri Mtuwa Mlungu na kumtendera ligoya mfalumi, pota nagulikolanawa na walii yawagalambukagalambuka, 22 mana wantu handa awa walaguwa vumu. Gaa yakaweza kuvimana madoda galaviwa na Mtuwa Mlungu ama mfalumi?

23 Aga viraa ndo matakula ga wana luhala: Kupendeleya muntu mukutozwa iherepandiri. 24 Yakamlekeziya muntu yakana shidoda, kapangirwa na wantu na kukalalirwa na wantu wa maisi gamonga. 25 Kumbiti yawawazibu wakontola hawapati nemeleru, na tekelera weri haziwiziri.

26 Lyankulu lya nakaka, ndo handa lilangaziwu lya uganja.

27 Gumaliri mahengu gaku ga kunja, gutandi kila shintu kulirambu, shakapanu gunyawi numba yaku.

28 Nagumpitaulira gwapakwegera gwaku, pota nagutakula mpayu kwa yomberi. 29 Nagutakula, hanimtendi ntambu yakantenditi! Hanimwuziliri muntu ulii kwa shilii shakantendiriti!

30 Mpitiriti pakwegera na lirambu lya mleri, lirambu lya mzabibu lya muntu mzigizigi, 31 nilikangasha kuwona limera misontu, magugu gagibikira pahala pakuyi poseri, na shibambaza shakuyi sha mabuwi shibomoka. 32 Pamoniti aga, nilihola, upeleru wakuyi lifunda shintu. 33 Gugonja shididini, gusiziri shididini kukusa mawoku gaku hera goyeri, 34 uhushu hawukukankali handa mpoka, nakupunguluwa handa muntu yakana vintu vya kulikomangira.