1 Azi ndo mesali zimonga za mfalumi Selemani yazilembitwi kayi na walemba wa Hezekia, mfalumi gwa Yuda.

2 Ukwisa wa Mlungu kufifa mirandu, kumbiti mfalumi kakwiswa kwa galii gakatakula.

3 Ntambu yayiwera mpindi ya kutali nentu na pasipanu, kumbiti miyoyu ya wafalumi ilolwalolwandiri.

4 Guwusiyi uhakata mumadini ga feza na mponda vintu hakakunyawiri shintu shiherepa; 5 Guwawusiyi wakontola kulongolu kwa mfalumi na ukolamlima wakuyi hawugangamali mushilii shashifiruwa kushitenda.

6 Nagulijegelera kwa mfalumi, pota nagulitenda mlonguziya; 7 mbaka mfalumi mweni kakugambiri gwizi gulikali kulongolu, kuliku kusoniziwa kulongolu kwa mkulu.

8 Nagulopukera kugajega kumahakama, shakapanu hagutendi hashi, kapitawu yumonga pakatakula visoweru vimonga vya kukusoniziya?

9 Tutendi lipatanu na myagu mundewi yenu gweka yenu, na kila yumu gwenu nakalaviya bada ya myaguyi, 10 wantu nawiza kuvimana kuwera kwana bada na soni yaku hapeniiwuki.

11 Shisoweru shashitakulwa shaka shashifaa, ndo handa uherepa wa zahabu pampindi pa madini ga feza.

12 Libeliziwu lya yakana luhala kwa muntu yakapikanira, ndo iherepa kuliku peti ya zahabu ama shintu shashiwanya kwa madini maherepa ga zahabu.

13 Mlagilagi mwaminika kamsekeziya ulii yakamtumiti, gambira mashi gazizimira shaka sha mabenagu,.

14 Handa mawundi na lyega pota mvula, ndo teratera na muntu yakalitumba kulaviya mafupu nakalaviyandiri.

15 Kwanjira ya uhepelera mkolamlima kaweza kugambiziwa, lulimi lunama lumega mihonju.

16 Pagupata lwashi guliyi seemu ya kutosheya, nagwiza kutosiwa na kuhilula. 17 Nagumtyangira gwapakwegera gwaku mara zivuwa, nagwiza kumtosiya na yomberi kakukalaliri.

18 Muntu yakalaviya ukapitawu wa upaya kwa muyaguyi, ndo atali handa shindonga na ligumba na msali gukalipa.

19 Kumtumbira muntu yakaminikandiri shaka sha ntabiku, ndo handa linu liwola ama ligulu yaliteguka.

20 Kumwimbira muntu yakana hinginika, ndo handa kuvula nguwu shaka sha mpepu ama kulekera munu mushironda.

21 Mnkondu gwaku pakawera na njala gumupanani shiboga, pakimiluwa, gumupanani mashi ga kulanda, 22 hangu hagumtendi kapati soni nentu, handa makala ga motu mumtuyi gwakuyi, na Mtuwa Mlungu hakakupanani lifupu.

23 Lyega lyalilawa kushana lijega mvula, ntambuiraa kumtakula muntu kwa udoda gujega nkalaliru.

24 Mbaka kulikala pambwega pampindi pa litala lya shitwiku, kuliku kulikala ukaya pamuhera na mdala yakana ndewu.

25 Handa mashi gazizimira kwa muntu yakimluwa, ndo visoweru viheri kulawa kutali.

26 Muntu yakana luhala pakajimira kufata mirandu ya mkontola, ndo mbwiru yayidodisiwa ama linogu lyalitimbulitwi.

27 Iherepandiri kuliya lwashi luvuwa ng'anji, ntambuira ifaandiri kulijegelera nentu.

28 Muntu yakasinda kugalewelera maya gakuyi, ndo handa mji yagwahera shibambaza.