1 Kwankula mpolimpoli kunyamaziya maya, kumbiti shisoweru shikalipa shisongiziya maya.

2 Lulimi lwa yakana luhala lupalasiya umani, kumbiti milomu ya wazigizigi watakula uzigizigi.

3 Masu ga Mtuwa Mlungu gawona kila shintu, kamlolalola muntu mheri na muntu mdoda.

4 Visoweru vipoli ndo shanjiru sha ukomu, kumbiti lulimi lalutakula ukontola lubena moyu.

5 Mzigizigi kabeziya mafunda ga tati gwakuyi, kumbiti yakajimira kuberiziwa kana mahala.

6 Ukaya mwa muntu mheri mwana lunda zivuwa, kumbiti mapatu ga wantu wakontola gawajegera ntabiku.

7 Mlomu gwa yakana luhala gujega umani, kumbiti ntambu yayiwerandiri mumiyoyu ya wazigizigi.

8 Malaviwu ga wakontola ndo nkalaliru kwa Mtuwa Mlungu, kumbiti maluwa ga wantu waheri gamunemiziya Mlungu.

9 Matendu ga wakontola ndo nkalaliru kwa Mtuwa Mlungu, kumbiti Mlungu kawafira walii yawatenda mirandu mihera.

10 Azabu ikalipa yapalaa kwa yawaleka kutenda mirandu maheri, yoseri yakakalalira kuberiziwa hakahowi.

11 Handa Mtuwa Mlungu kavimana yagawera kulilirindi litali, maholu ga muntu hagawezi hashi kulififa kulongolu kwakuyi?

12 Yakana beziya kafirandiri kuberuwa, kasakulandiri nakamu magambiziya ga yawana mahala.

13 Moyu gwa nemeleru gukalamusiya sheni, kumbiti utama umega moyu.

14 Wana mahala wasakula umani, kumbiti wazigizigi waliliyiziya uzigizigi.

15 Kwa yakatabisiwa kila lishaka ndo lidoda, kumbiti kwa yakana moyu gukalamuka kasekela mashaka goseri.

16 Mbaka kuwera na shintu shididini pamuhera na kumguwira Mtuwa Mlungu, kuliku kuwera na lunda ivuwa pamuhera na ntabiku.

17 Mbaka kuliya shiboga pahala yapawera na ufiru, kuliku kuliya vinofu vinonu pahala pana ngalaliru.

18 Muntu gwa maya idoda kajega ndewi, kumbiti yakayewukandiri kwa maya kanyamaziya ndewu.

19 Njira ya mleri imema misontu, kumbiti njira ya mwaminika ndo lupalahera handa njira nkulu.

20 Mwana yakana luhala kamnemiziya tati gwakuyi, kumbiti mzigizigi kambeziya mawu gwakuyi.

21 Uzigizigi ndo nemeleru kwa muntu yakahera na mahala, kumbiti yakana luhala kasyagula njira yayiwera teratera.

22 Mipangu isinda kuwera na mpatiru toziya ya kukosa magambiziya, kumbiti kwa wagambiziya wavuwa hakuweri na mpatiru.

23 Kulaviya lyankulu lya nakaka kusekeziya; shisoweru yashifaa kwa shaka shakuyi ndo shiherepa nentu!

24 Njira ya muntu yakana luhala kajega ukomu, hangu humtenda kashapili kwingira pasi palilirindi litali.

25 Mtuwa Mlungu kabomola numba za wana mtiti, kumbiti kalolera lunda za mkenja.

26 Maholu ga wakontola ndo nkalaliru kwa Mtuwa Mlungu, kumbiti visoweru vya wantu waheri vimnemziya.

27 Muntu yakana matamata kawajegera walongu wakuyi ntabiku, kumbiti yakakalalira swinda hakalikali.

28 Moyu gwa muntu muheri gulihola pamberi pa kwankula, kumbiti mlomu gwa mkontola gulaviya ukontola.

29 Mtuwa Mlungu kakutali na wantu wakontola, kumbiti ka pakwegera na wantu waheri kuwapikinira maluwa.

30 Masu ga lusungu gasekeziya moyu, visoweru viheri vijega ponga munshimba.

31 Muntu yakapikanira maberiziwu yagajega ukomu, hakalikali muwamu mwa yawana luhala.

32 Yakalema kufundwa kalibeza mweni, kumbiti yakajimira maberiziya kapata umani.

33 Kumguwira Mtuwa Mlungu kumfunda muntu luhala na unanaga wiza pamberi pa ligoya.